ஈரானிய ஜனாதிபதியுடன் இந்தியப் பிரதமர் நரேந்திர மோடி தொலைபேசி உரையாடல் 

ஈரானிய ஜனாதிபதியுடன் இந்தியப் பிரதமர் நரேந்திர மோடி தொலைபேசி உரையாடல்:

கடல்வழிப் பாதுகாப்பு மற்றும் இந்தியர்களின் நலன் குறித்து முக்கிய பேச்சுவார்த்தை!

மத்திய கிழக்கில் இஸ்ரேல், அமெரிக்கா மற்றும் ஈரானுக்கு இடையிலான போர் நடவடிக்கைகள் நாளுக்கு நாள் தீவிரமடைந்து வரும் நிலையில்,

ஆசியாவின் முக்கிய வல்லரசான இந்தியா தனது இராஜதந்திர நகர்வுகளைத் துரிதப்படுத்தியுள்ளது. இதன் ஒரு கட்டமாக, இந்தியப் பிரதமர் நரேந்திர மோடி (Narendra Modi) ஈரானிய ஜனாதிபதி மசூத் பெசஷ்கியானுடன் (Masoud Pezeshkian) தொலைபேசியில் தொடர்புகொண்டு மிக முக்கியமான பேச்சுவார்த்தைகளை முன்னெடுத்துள்ளார்.

உட்கட்டமைப்புத் தாக்குதல்களுக்குக் கண்டனம்:

இந்தத் தொலைபேசி உரையாடல் குறித்துப் பிரதமர் மோடி தனது உத்தியோகபூர்வ ‘எக்ஸ்’ (X) சமூக வலைத்தளப் பக்கத்தில் பதிவிட்டுள்ளார். “மத்திய கிழக்குப் பிராந்தியத்தில் அமைந்துள்ள மிக முக்கியமான உட்கட்டமைப்பு வசதிகள் (critical infrastructure) மீது நடத்தப்படும் தாக்குதல்களை வன்மையாகக் கண்டிக்கிறேன்” என அவர் அப்பதிவில் குறிப்பிட்டுள்ளார்.

எரிசக்தி மையங்கள் மற்றும் துறைமுகங்கள் இலக்கு வைக்கப்படுவது ஒட்டுமொத்தப் பிராந்தியப் பொருளாதாரத்தையும் பாதிக்கும் என்ற இந்தியாவின் நிலைப்பாட்டையே இது பிரதிபலிக்கிறது.

கடல்வழிப் பாதைகளின் முக்கியத்துவம்:

சர்வதேச வர்த்தகத்தின் உயிர்நாடியாக விளங்கும் ஹார்முஸ் ஜலசந்தி உள்ளிட்ட கடல்வழிப் பாதைகள் (shipping lanes) எவ்விதத் தடையுமின்றித் திறந்திருக்க வேண்டியதன்

அவசியத்தையும், அதன் பாதுகாப்பை உறுதிப்படுத்த வேண்டியதன் முக்கியத்துவத்தையும் ஈரானிய ஜனாதிபதியிடம் பிரதமர் மோடி திட்டவட்டமாக வலியுறுத்தியுள்ளார்.

இந்தியர்களின் பாதுகாப்பிற்கு நன்றி:

மேலும், போர்ச் சூழலுக்கு மத்தியிலும் ஈரானில் வசிக்கும் மற்றும் பணியாற்றும் இந்தியப் பிரஜைகளின் (Indian nationals) பாதுகாப்பை உறுதி செய்வதற்காக ஈரான் அரசாங்கம் வழங்கி வரும் தொடர்ச்சியான ஆதரவைப் பாராட்டியுள்ள

மோடி, அதற்காகத் தனது மனமார்ந்த நன்றிகளையும் தெரிவித்துள்ளார்.

வல்லரசுகளின் அழுத்தங்களுக்கு மத்தியிலும் ஈரானுடனான தனது வரலாற்று ரீதியான இராஜதந்திர உறவுகளை இந்தியா தொடர்ந்தும் பேணி வருவதையே இந்தச் சந்திப்பு உறுதி செய்துள்ளது.