“இந்தியாவின் உண்மையான தலைவர் அம்பானியா?”
– ‘ஸ்டார்லிங்க்’ விவகாரத்தில் எலான் மஸ்க் பகிரங்க தாக்குதல்; இந்திய அரசு விளக்கம்!
இந்தியாவில் செயற்கைக்கோள் இணையச் சேவையை (Satellite Internet) வழங்குவது தொடர்பான மோதலில்,
டெஸ்லா மற்றும் ஸ்பேஸ்எக்ஸ் (SpaceX) நிறுவனங்களின் தலைவர் எலான் மஸ்க், ரிலையன்ஸ் குழுமத் தலைவர் முகேஷ் அம்பானியை நேரடியாகவும் கடுமையாகவும்
சாடி தனது ‘X’ சமூக வலைதளத்தில் அடுத்தடுத்துப் பதிவுகளை வெளியிட்டுள்ளார்.
“அம்பானி அவர்களே, எனது மன்னிப்பை ஏற்றுக்கொள்ளுங்கள்” – எலான் மஸ்க் சாடல்: வெள்ளிக்கிழமை வெளியிட்ட பதிவில் எலான் மஸ்க்,
“அன்புள்ள பிரதமர் அம்பானி அவர்களே, நீங்கள்தான் இந்தியாவின் உண்மையான அதிகாரம் படைத்தவர்
(Real Boss) என்பதை உணராமல் இருந்ததற்கு எனது பணிவான மன்னிப்பை ஏற்றுக்கொள்ளுங்கள்” என்று கிண்டலாகக் குறிப்பிட்டுள்ளார்.
தொடர்ந்து அவர், “இயல்பாகவே இந்திய மக்களை உங்களது ஏகபோக ஆதிக்கத்தின் கீழ் தொடர்ந்து சுரண்டுவதையே நீங்கள் விரும்புவீர்கள். இருப்பினும், ஸ்டார்லிங்க் நிறுவனமும் சந்தையில் போட்டியிட நீங்கள் அனுமதிப்பீர்களா?
மற்ற நாடுகளைப் போலவே இந்தியாவிலும் இணைய வசதியற்ற பல பகுதிகள் உள்ளன. இதனால் குழந்தைகள் கல்வி கற்கும் வாய்ப்பையும்,
சிறு வணிகர்கள் உலகச் சந்தையில் பொருட்களை விற்பனை செய்யும் வாய்ப்பையும் இழக்கின்றனர். ஸ்டார்லிங்க் அவர்களின் வாழ்க்கையைச் சிறப்பாக மாற்றும்” என்று பதிவிட்டுள்ளார்.
மேலும், இயற்கை பேரிடர் காலங்களில் தகவல் தொடர்பு அமைப்புகள் செயலிழக்கும்போது
உயிர்களைக் காப்பாற்ற ஸ்டார்லிங்க் அவசியமானது எனவும், இந்தியாவில் இதன் செயல்பாடு மனித உயிர்களைக் காப்பாற்ற உதவும் எனவும் அவர் வாதிட்டுள்ளார்.
சர்ச்சையின் தொடக்கம்:
முன்னதாகப் புதன்கிழமை அன்று ‘X’ தள பயனர் ஒருவருக்குப் பதிலளித்த மஸ்க், இந்தியாவில் குறிப்பிட்ட சில
பெருந்தனவந்தர்களால் (Oligarchs) ஸ்டார்லிங்க் தடுத்து நிறுத்தப்படுவதாகக் குற்றஞ்சாட்டினார்.
“இந்திய மக்கள் மீதான ஏகபோகப் பிடியைத் தக்கவைத்துக்கொள்ள சில பெருந்தனவந்தர்கள் எங்களைத் தடுக்கின்றனர்.
அவர்கள் யார் என்பதை நீங்களே ஊகித்துக் கொள்ளலாம்… இது இந்திய மக்களுக்கு இழைக்கப்படும் குற்றம்!” என்று அவர் குறிப்பிட்டிருந்தார்.
தொடர்ந்து வியாழக்கிழமை பதிவிட்ட அவர், “ஸ்டார்லிங்க் 165-க்கும் மேற்பட்ட நாடுகளில் உரிமம் பெற்றுள்ளது.
இந்திய அரசாங்கத்தின் ஒவ்வொரு சட்டத்தையும் விதிமுறைகளையும் பின்பற்றி 5 ஆண்டுகள் கழிந்துவிட்டன.
அப்படியிருந்தும் இன்னமும் ஏன் உரிமம் வழங்கப்படவில்லை? அம்பானிதான் இந்தியாவின் உண்மையான தலைவரா?” எனக் கேள்வி எழுப்பியிருந்தார்.
மத்திய தொலைத்தொடர்பு அமைச்சகம் மறுப்பு:
எலான் மஸ்க்கின் குற்றச்சாட்டுகளுக்கு வியாழக்கிழமை காலையே விளக்கம் அளித்த இந்திய தொலைத்தொடர்பு அமைச்சகம், இந்தக் குற்றச்சாட்டுகள் ஆதாரமற்றவை என திட்டவட்டமாகத் தெரிவித்துள்ளது.
இதுகுறித்து அமைச்சகம் வெளியிட்ட அறிக்கையில், “செயற்கைக்கோள் தொடர்பு சேவைகளுக்கான ஒழுங்குமுறை கட்டமைப்பு நியாயமற்ற முறையில்
பாரபட்சமாகப் பயன்படுத்தப்படுவதாகக் கூறப்படும் தகவல்கள் தவறானவை. செயற்கைக்கோள் சேவை உட்பட அனைத்து தொலைத்தொடர்பு
சேவைகளுக்கும் அரசு வெளிப்படையான, பாரபட்சமற்ற விதிமுறைகளையே வகுத்துள்ளது” என்று தெளிவுபடுத்தியுள்ளது.
இந்தியாவில் செயற்கைக்கோள் மூலம் தகவல் தொடர்பு வழங்கும் (GMPCS) உரிமத்தை மத்திய அரசிடம் இருந்து பெற்ற மூன்று முக்கிய நிறுவனங்களில்
ஸ்பேஸ்எக்ஸின் ‘ஸ்டார்லிங்க்’ நிறுவனமும் ஒன்றாகும். ஏர்டெல் ஆதரவு பெற்ற ‘யூட்டெல்சாட் ஒன்வெப்’ (Eutelsat OneWeb) மற்றும் ஜியோவின் ‘
ஜியோ சேட்டிலைட் கம்யூனிகேஷன்ஸ்’ (Jio Satellite Communications) ஆகியவை மற்ற இரண்டு நிறுவனங்களாகும்.உரிமம் வழங்கப்பட்டிருந்தாலும், அலைக்கற்றை (Spectrum) ஒதுக்கீடு செய்யப்பட்டு
சேவைகள் தொடங்கப்பட வேண்டுமானால், இந்த நிறுவனங்கள் நாட்டின் பாதுகாப்பு நெறிமுறைகளைப் பூர்த்தி செய்திருக்க வேண்டும்.
தற்போது இந்த நிறுவனங்களுக்கான பாதுகாப்பு மதிப்பீட்டு ஆய்வுகள் (Security Assessment) தீவிரமாக நடைபெற்று வருவதாகவும்,
அந்த நடைமுறைகள் முடிந்த பிறகே அடுத்தகட்ட நடவடிக்கைகள் எடுக்கப்படும் என்றும் அரசு தரப்பில் தெரிவிக்கப்பட்டுள்ளது.
