மன்னார் கடற்பகுதியில் விபத்தில் சிக்கிய 02 மீனவர்கள் மீட்பு!
மன்னார் வடக்கு கடற்பகுதியில் விபத்தில் சிக்கிய ஒரு நாள் மீன்பிடிப் படகில் இருந்த இரு மீனவர்கள், கொழும்பு கடல்சார் தேடல் மற்றும் மீட்பு ஒருங்கிணைப்பு மையத்தின் ஒருங்கிணைப்பில், கடற்படையினரால் இன்று (21/08) அதிகாலை மேற்கொள்ளப்பட்ட விசேட தேடல் மற்றும் மீட்பு நடவடிக்கையின் மூலம் பாதுகாப்பாக மீட்கப்பட்டுள்ளனர்.
யாழ்ப்பாணம் குருநகர் மீன்பிடித் துறைமுகத்திலிருந்து கடந்த சனிக்கிழமை (19/09) இரண்டு மீனவர்களுடன் புறப்பட்ட ஒரு நாள் மீன்பிடிப் படகு மீண்டும் மீன்பிடித் துறைமுகத்திற்கு திரும்புவதில்லை என்றும், அந்தப் படகைக் கண்டுபிடிப்பதற்கு கடற்படையின் உதவியை வழங்குமாறும், மீன்பிடி மற்றும் நீர்வாழ் வளங்கள் திணைக்களத்தினால் கொழும்பு கடல்சார் தேடல் மற்றும் மீட்பு ஒருங்கிணைப்பு மையத்திற்கு அறிவிக்கப்பட்டது.
அந்த அறிவித்தலுக்கு உடனடியாக பதிலளித்த கொழும்பு கடல்சார் தேடல் மற்றும் மீட்பு ஒருங்கிணைப்பு மையம், அந்த கடற்பகுதியில் மீன்பிடி நடவடிக்கைகளில் ஈடுபடும் படகுகளுக்கு இது தொடர்பில் விழிப்புணர்வை ஏற்படுத்துமாறு மீன்பிடி மற்றும் நீர்வாழ் வளங்கள் திணைக்களத்திற்கு அறிவுறுத்தியதுடன், தேடல் மற்றும் மீட்பு நடவடிக்கையை மேற்கொள்வதற்காக வடக்கு மற்றும் வடமத்திய கடற்படை தளங்களுக்கும் அறியத்தந்தது.
அதன்படி, வடமத்திய கடற்படை கட்டளையினால் மேற்கொள்ளப்பட்ட தேடல் மற்றும் மீட்பு நடவடிக்கையின் மூலம், தலைமன்னாருக்கு வடக்கு கடற்பகுதியில் எரிபொருள் இன்றி செயலிழந்து மிதந்து கொண்டிருந்த ஒரு நாள் மீன்பிடிப் படகு கண்டுபிடிக்கப்பட்டதை அடுத்து, அதில் இருந்த இரண்டு மீனவர்களும் இவ்வாறு பாதுகாப்பாக மீட்கப்பட்துன், மேலும் அந்த மீனவர்களும் ஒரு நாள் மீன்பிடிப் படகும் தலைமன்னாருக்குக் கொண்டுவரப்பட்டதுடன், அங்கு மீனவர்களுக்குத் தேவையான மனிதநேய உதவிகளும் வழங்கப்பட்டன.
