வடமாகாண தரப்படுத்தல் மதிப்பீட்டில் மன்னார் மாவட்டம் முதலிடம் பெற்று சாதனை!

வடமாகாண தரப்படுத்தல் மதிப்பீட்டில் மன்னார் மாவட்டம் முதலிடம் பெற்று சாதனை!

கிராம மற்றும் மாதர் கிராம அபிவிருத்திச் சங்கங்களின் செயல்திறன் மதிப்பீட்டில் பல விருதுகளை வென்ற மன்னார் நகர பிரதேச செயலகம்

வடமாகாண கிராம அபிவிருத்தித் திணைக்களத்தினால் கிராம அபிவிருத்திச் சங்கங்கள் மற்றும் மாதர் கிராம அபிவிருத்திச் சங்கங்களின் செயற்பாடுகளை மதிப்பீடு செய்து, தரப்படுத்தல் மற்றும் சான்றிதழ் வழங்கும் நிகழ்வு நேற்று யாழ்ப்பாணம் திருவள்ளுவர் பண்பாட்டு மையத்தில் நடைபெற்றது.

இந்நிகழ்வில் மன்னார் மாவட்ட அரசாங்க அதிபர் திரு. கே. கனகேஸ்வரன் சிறப்பு விருந்தினராகக் கலந்துகொண்டார்,

செயல் திறன் மதிப்பீட்டின் பல்வேறு பிரிவுகளிலும் மன்னார் மாவட்டத்தைச் சேர்ந்த சங்கங்கள் மற்றும் அலுவலர்கள் பல முக்கிய விருதுகளைப் பெற்றுச் சாதனை படைத்துள்ளனர்.

மாகாண மட்டத்தில் முதலிடங்களைப் பெற்ற சங்கங்கள்

மாகாண மட்டத்திலான தரப்படுத்தல் மதிப்பீட்டில் 80 புள்ளிகளைப் பெற்று முதலிடத்தைப் பெற்ற மூன்று மாதர் கிராம அபிவிருத்திச் சங்கங்களில், மன்னார் நகர பிரதேச செயலகப் பிரிவைச் சேர்ந்த கீரி மற்றும் உப்புகுளம் வடக்கு மாதர் கிராம அபிவிருத்திச் சங்கங்கள் இடம்பிடித்துள்ளன.

அதேவேளை, மாகாண மட்டத்தில் கிராம அபிவிருத்திச் சங்கங்களுக்கான முதலிடத்தை பள்ளிமுனை மேற்கு கிராம அபிவிருத்திச் சங்கம் பெற்றுக்கொண்டதுடன், உயிர்த்தராசன்குளம் கிராம அபிவிருத்திச் சங்கம் மூன்றாம் இடத்தையும் பெற்றுள்ளது.

மாவட்ட மட்டத்திலும் மன்னார் நகர பிரதேச செயலகத்தின் ஆதிக்கம்

மாவட்ட மட்டத்திலான தரப்படுத்தல் மதிப்பீட்டிலும் மன்னார் நகர பிரதேச செயலகப் பிரிவைச் சேர்ந்த சங்கங்கள் முக்கிய இடங்களைப் பெற்றுள்ளன.

கிராம அபிவிருத்திச் சங்கங்கள்:

* பள்ளிமுனை மேற்கு – முதலிடம்

* உயிர்த்தராசன்குளம் – இரண்டாம் இடம்

* சின்னக்கடை – மூன்றாம் இடம்

மாதர் கிராம அபிவிருத்திச் சங்கங்கள்:

* உப்புகுளம் வடக்கு மற்றும் கீரி – இணைந்த முதலிடம்

* ஜீவபுரம் – மூன்றாம் இடம்

சிறந்த அலுவலர்களுக்கும் விருதுகள்

சங்கங்களின் செயற்பாடுகளுக்கு சிறந்த ஒத்துழைப்பை வழங்கியமைக்காக பட்டித்தோட்டம் (MN-71) மற்றும் உப்புகுளம் வடக்கு (MN-82) ஆகிய கிராமங்களைச் சேர்ந்த கிராம அலுவலர்களுக்குச் சிறந்த கிராம அலுவலர் விருதுகள் வழங்கிக் கௌரவிக்கப்பட்டன.

மேலும், மாகாண மட்டத்தில் சிறந்த கிராம அபிவிருத்தி அலுவலருக்கான முதலிடத்தை மன்னார் நகர பிரதேச செயலகத்தின் கிராம அபிவிருத்தி அலுவலர் பெற்றுக்கொண்டார். சிறந்த மாவட்ட கிராம அபிவிருத்தி அலுவலருக்கான விருதையும் மன்னார் மாவட்ட கிராம அபிவிருத்தி அலுவலர் தன்வசப்படுத்தினார்.

அத்துடன், சங்கங்களைச் சிறந்த முறையில் வழிநடத்தி அவற்றின் செயற்பாடுகளை வலுப்படுத்தியமைக்காக மாகாண மட்டத்தில் சிறந்த பிரதேச செயலாளருக்கான விருதுகளில் மன்னார் நகர பிரதேச செயலாளர் முதலிடத்தைப் பெற்றுக்கொண்டார்.

கிராம மட்டத்திலான அமைப்புகளின் செயற்பாடுகளை வலுப்படுத்துதல், மக்களின் பங்களிப்பை அதிகரித்தல் மற்றும் மக்களின் தேவைகளை மையமாகக் கொண்ட அரச சேவைகளை முன்னெடுத்தல் ஆகியவற்றில் மன்னார் மாவட்டம் மேற்கொண்டுவரும் முயற்சிகளுக்குக் கிடைத்த அங்கீகாரமாக இந்த வெற்றி பார்க்கப்படுகிறது.

குறிப்பாக, மன்னார் நகர பிரதேச செயலகப் பிரிவைச் சேர்ந்த சங்கங்கள் மற்றும் அலுவலர்கள் பல்வேறு பிரிவுகளில் முன்னிலை பெற்றுள்ளமை, கிராமிய அபிவிருத்திப் பணிகளில் அவர்களின் அர்ப்பணிப்பையும் கூட்டு முயற்சியையும் வெளிப்படுத்துவதாக அமைந்துள்ளது.