இலங்கை மத்திய வங்கி அதிரடி: 6 நிறுவனங்கள் மற்றும் அவற்றின் பணிப்பாளர்களின் சொத்துக்கள் முடக்கம்!
இலங்கையிலுள்ள ஆறு தனியார் நிறுவனங்கள் மற்றும் அவற்றின் பணிப்பாளர்கள் தமது அசையும், அசையாச் சொத்துக்களை விற்பனை செய்வதையோ, மாற்றுவதையோ அல்லது கொடுக்கல் வாங்கல்களில் ஈடுபடுத்துவதையோ தடுத்து இலங்கை மத்திய வங்கி (CBSL) முடக்க உத்தரவுகளை பிறப்பித்துள்ளது.
செப்டெம்பர் 22 ஆம் திகதி மத்திய வங்கியினால் வெளியிடப்பட்டுள்ள உத்தியோகபூர்வ ஊடக அறிக்கையில் இவ்விடயம் தெரிவிக்கப்பட்டுள்ளது.
கொழும்பு மேல் நீதிமன்றம் உறுதி செய்து நீடிப்பு:
2011 ஆம் ஆண்டின் 42 ஆம் இலக்க நிதித் தொழில் சட்டத்தின் (Finance Business Act) 44 ஆம் பிரிவின் கீழ் இலங்கை மத்திய வங்கியின் வங்கியல்லா நிதி நிறுவனங்களின் கண்காணிப்புத் திணைக்களத்தின் பணிப்பாளரினால் இந்த உத்தரவுகள் பிறப்பிக்கப்பட்டிருந்தன.
பின்னர் குறித்த முடக்க உத்தரவுகள் கொழும்பு மேல் நீதிமன்றத்தினால் உறுதிப்படுத்தப்பட்டு கால நீடிப்பும் செய்யப்பட்டுள்ளன.
முடக்க உத்தரவுக்கு உள்ளாகியுள்ள நிறுவனங்கள்:
முடக்க உத்தரவு அமுலில் உள்ள நிறுவனங்கள்:
Kasagala Green Plantation (Private) Limited
Ceylon Green Life Plantation (Private) Limited
Singhe Capital Investment Limited
Pro Shop Advertising Holdings (Private) Limited
Athens International Education Centre (Private) Limited
Eyon Lanka Investment & Film Production International Company (Private) Limited
இவற்றுள், கசகல கிறீன் பிளான்டேஷன் மற்றும் சிலோன் கிறீன் லைஃப் பிளான்டேஷன் ஆகிய இரண்டு நிறுவனங்களுக்கும் எதிராக நிதித் தொழில் சட்டத்தின் 42 ஆம் பிரிவின் கீழ் தற்போது விரிவான விசாரணைகள் முன்னெடுக்கப்பட்டு வருவதாகவும் மத்திய வங்கி சுட்டிக்காட்டியுள்ளது.
பின்னணித் தகவல் (உத்தியோகபூர்வ மத்திய வங்கி அறிக்கை அடிப்படையில்):மேற்படி பட்டியலில் உள்ள ஏனைய நான்கு நிறுவனங்களும் சட்டவிரோதமாக பொதுமக்களிடம் வைப்புகளைத் திரட்டியமை மற்றும் நிதித் தொழில் சட்டத்தின் 2 ஆம் பிரிவை மீறி நிதி வணிக நடவடிக்கைகளில் ஈடுபட்டமை ஏற்கனவே உறுதி செய்யப்பட்டுள்ளதாக மத்திய வங்கி தெரிவித்துள்ளது.
சட்டரீதியாக அனுமதி பெற்ற நிறுவனங்களில் மாத்திரமே பொதுமக்கள் தமது பணத்தை வைப்பு செய்ய வேண்டும் என்றும், அங்கீகரிக்கப்படாத நிறுவனங்களில் முதலீடு செய்து ஏமாற வேண்டாம் எனவும் மத்திய வங்கி அறிவுறுத்தியுள்ளது.
