இறக்குமதி செய்யப்படும் அழகுசாதனப் பொருட்கள் மற்றும் காலணிகள் தொடர்பில் நுகர்வோர் விவகார அதிகாரசபையினால் நாடளாவிய ரீதியில் விசேட சோதனைகளும் விசாரணைகளும் முன்னெடுக்கப்பட்டுள்ளன.
இதற்கமைய, ஆகஸ்ட் 18 மற்றும் 19 ஆகிய திகதிகளில் 108 சோதனைகள் மேற்கொள்ளப்பட்டதுடன், பொருட்களைப் பெற்றுக்கொண்ட விதத்தை உறுதிப்படுத்துவதற்கான பற்றுச்சீட்டுகள் அல்லது விலைப்பட்டியல்களை (Invoices) சமர்ப்பிக்கத் தவறிய 84 வணிக நிலையங்கள் அடையாளம் காணப்பட்டுள்ளன.
இதன்போது சருமத்தை பொலிவாக்கும் கிரீம்கள், முகம் மற்றும் உடல் பூச்சுகள், வாசனைத் திரவியங்கள், கூந்தல் தயாரிப்புகள் மற்றும் விளையாட்டு காலணிகள் உள்ளிட்ட பல்வேறு இறக்குமதி பொருட்கள் பரிசோதனைக்கு உட்படுத்தப்பட்டதாக நுகர்வோர் விவகார அதிகாரசபை தெரிவித்துள்ளது.
சரியான ஆவணங்கள் இல்லாத மற்றும் பொருட்களைப் பெற்றுக்கொண்ட விநியோகஸ்தர்களை அடையாளம் காண முடியாத சந்தர்ப்பங்களில், சுமார் 1.5 மில்லியன் ரூபாய் சந்தைப் பெறுமதியுடைய பொருட்கள் அதிகாரிகளால் பொறுப்பேற்கப்பட்டுள்ளன.
குறித்த வர்த்தகர்களுக்கு எதிராக சட்ட நடவடிக்கை எடுக்கப்பட்டுள்ளதுடன், பொருட்களின் விநியோக வழித்தடம் மற்றும் அதனுடன் தொடர்புடைய நபர்களை அடையாளம் காண்பதற்கான மேலதிக விசாரணைகளும் முன்னெடுக்கப்பட்டு வருகின்றன.
இதேவேளை, 2026 ஆம் ஆண்டில் இதுவரை கிரீம்கள் மற்றும் திரவ வகை அழகுசாதனப் பொருட்கள் தொடர்பில் மாத்திரம் சுமார் 785 சோதனைகள் நடத்தப்பட்டு, சம்பந்தப்பட்ட வர்த்தகர்களுக்கு எதிராக வழக்குத் தொடரப்பட்டுள்ளதாகவும் நுகர்வோர் விவகார அதிகாரசபை குறிப்பிட்டுள்ளது.
அதிகாரசபையினால் வெளியிடப்பட்டுள்ள 83 ஆம் இலக்க கட்டளைக்கு அமைய, பொருட்களைப் பெற்றுக்கொண்ட விதத்தை உறுதிப்படுத்தக்கூடிய முறையான ஆவணங்களை தம்வசம் வைத்திருப்பது உற்பத்தியாளர்கள், விநியோகஸ்தர்கள், களஞ்சியப்படுத்துபவர்கள் மற்றும் வர்த்தகர்களின் பொறுப்பாகும் என்றும் வலியுறுத்தப்பட்டுள்ளது.
