சுப்பர் 6 போட்டியில் இலங்கைக்கு இலகு வெற்றி
மலேசியாவில் நடைபெற்றுவரும் இரண்டாவது ஐசிசி 19 வயதுக்குட்பட்ட மகளிர் ரி20 உலகக் கிண்ண தொடரில் கடைசி சுப்பர் சிக்ஸ் போட்டியில் அவுஸ்திரேலியாவை 12 ஓட்டங்கள் வித்தியாசத்தில் வீழ்த்திய இலங்கை ஆறுதல் வெற்றியுடன் நாடு திரும்பவுள்ளது.
இலங்கை பந்துவீச்சாளர்களின் சிறப்பான பந்துவீச்சுகளும் லிமன்சா திலக்கரட்னவின் பந்துவீச்சு மற்றும் அதிசிறந்த களத்தடுப்பு என்பனவும் இலங்கையை வெற்றி அடையச் செய்தன.
இந்தப் போட்டியில் அவுஸ்திரேலியா தோல்வி அடைந்த போதிலும் அவ்வணி ஏற்கனவே அரை இறுதியில் விளையாட தகுதிபெற்றிருந்தது.
பாங்கி YSD-UKM கிரிக்கெட் ஓவல் மைதானத்தில் இன்று பகல் நடைபெற்ற முதலாம் குழுவுக்கான சுப்பர் சிக்ஸ் போட்டியில் முதலில் துடுப்பெடுத்தாடிய 19 வயதுக்குட்பட்ட இலங்கை மகளிர் அணி 20 ஓவர்களில் 8 விக்கெட்களை இழந்து 99 ஓட்டங்களைப் பெற்றது.
பதிலுக்கு துடுப்பெடுத்தாடிய 19 வயதுக்குட்பட்ட அவுஸ்திரேலிய மகளிர் அணி 20 ஓவர்களில் 8 விக்டெக்களை இழந்து 87 ஓட்டங்களைப் பெற்று தோல்வி அடைந்தது.
ஆனால், 15ஆவது ஓவரில் 3 விக்கெட்களை இழந்து 64 ஓட்டங்களைப் பெற்று வலுவான நிலையில் இருந்த அவுஸ்திரேலியா அதன் பின்னர் 23 ஓட்டங்கள் வித்தியாசத்தில் 5 விக்கெட்களை இழந்து தோல்வியைத் தழுவியது.
