யாழ்ப்பாணத்தில் மசாஜ் நிலையமா?

யாழ்ப்பாணத்தில் மசாஜ் நிலையமா?

20 ஏக்கர் அரச காணி திட்டத்திற்கு மக்கள் எதிர்ப்பு

யாழ்ப்பாணம் வடமராட்சி கிழக்கு பகுதியில் உள்ள வெற்றிலைக்கேணி மற்றும் ஆழியவளை பகுதிகளை உள்ளடக்கிய சுமார் 20 ஏக்கர் அரச காணியை, இந்தியாவைச் சேர்ந்த தனியார் நிறுவனமொன்றுக்கு குத்தகை அடிப்படையில் வழங்கி, ஆயுர்வேதம், ஆன்மீகம் மற்றும் சுற்றுலாத்துறையுடன் தொடர்புடைய திட்டமொன்றை முன்னெடுப்பதற்கு முன்மொழிவு முன்வைக்கப்பட்டுள்ளதாக தெரிவிக்கப்படுகிறது.

வடமராட்சி கிழக்கு பிரதேச செயலகத்தில் கடந்த 28ஆம் திகதி பாராளுமன்ற உறுப்பினர் ரஜீவன் ஜெகச்சந்திரமூர்த்தி தலைமையில் நடைபெற்ற கலந்துரையாடலில் இந்தத் திட்டம் தொடர்பில் பேசப்பட்டுள்ளது.

🔴 திட்டத்திற்கு மக்கள் எதிர்ப்பு

தமது பகுதியில் நூற்றுக்கணக்கான குடும்பங்கள் இன்னும் நிரந்தர காணியின்றி வாழ்ந்து வரும் நிலையில், மக்களுக்கு வழங்கக்கூடிய அரச காணியை தனியார் நிறுவனத்திற்கு வழங்குவதற்கு எதிர்ப்பு தெரிவிப்பதாக மக்கள் கூறுகின்றனர்.

மேலும், வடமராட்சி கிழக்கு பகுதி வரலாற்று முக்கியத்துவம் வாய்ந்ததுடன், பல்வேறு தியாகங்களைத் தாங்கிய மண் எனக் குறிப்பிட்டுள்ள மக்கள், தங்களுக்கு மசாஜ் நிலையம் உள்ளிட்ட இத்தகைய திட்டங்கள் தேவையில்லை எனத் தெரிவித்துள்ளனர்.

இப்பகுதியில் சட்டவிரோத செயற்பாடுகளை கட்டுப்படுத்த வேண்டிய நிலையில், இளைய தலைமுறையை பாதிக்கக்கூடிய பொழுதுபோக்கு நிலையங்கள் உருவாக்கப்படுவதற்கு முயற்சிப்பது ஏற்றுக்கொள்ள முடியாதது என்றும் மக்கள் சுட்டிக்காட்டியுள்ளனர்.

🟡 பாராளுமன்ற உறுப்பினர் விளக்கம்

மக்களின் எதிர்ப்புத் தொடர்பில் கருத்து தெரிவித்த பாராளுமன்ற உறுப்பினர் ரஜீவன் ஜெகச்சந்திரமூர்த்தி, யாழ்ப்பாண மாவட்டத்தின் பொருளாதார அபிவிருத்தியை முன்னிலைப்படுத்தியே குறித்த திட்டம் பரிந்துரைக்கப்பட்டுள்ளதாக தெரிவித்துள்ளார்.

குறித்த திட்டத்தின் மூலம் சுமார் 1,200 மில்லியன் அமெரிக்க டொலர் முதலீடு மேற்கொள்ளப்படவுள்ளதாகவும் அவர் குறிப்பிட்டுள்ளார்.

ஆன்மீகம் மற்றும் ஆயுர்வேத மருத்துவத்துறையை சுற்றுலாத்துறையுடன் இணைக்கும் வகையிலான திட்டமாகவே இது முன்மொழியப்பட்டுள்ளதாகவும் அவர் தெரிவித்துள்ளார்.

மேலும், அரசாங்கத்தின் முழுமையான வழிகாட்டுதலின் கீழ் திட்டம் முன்னெடுக்கப்படும் எனவும், இது கொழும்பில் காணப்படும் சாதாரண ஸ்பா நிலையங்களைப் போன்றதல்ல என்றும் அவர் விளக்கமளித்துள்ளார்.

⚠️ திட்டம் தொடர்பில் மக்கள் மத்தியில் எதிர்ப்பும், அதிகாரிகள் தரப்பில் பொருளாதார அபிவிருத்தி குறித்த விளக்கங்களும் வெளியாகியுள்ள நிலையில், இந்த விவகாரம் தொடர்பில் மேலும் கவனம் திரும்பியுள்ளது.