மும்பையில் சிக்கிய சர்வதேசக் குற்றவாளி ‘பொடி லெசி’ நாளை இலங்கை அழைத்து வரப்படுகிறார்
பாரியளவிலான போதைப்பொருள் கடத்தல் மற்றும் பல கொலைச் சம்பவங்களுடன் தொடர்புடைய ஒழுங்கமைக்கப்பட்ட குற்றவாளியான ஜனித் மதுசங்க எனப்படும் ‘பொடி லெசி’, நாளை (27) அதிகாலை இலங்கைக்கு அழைத்து வரப்படவுள்ளார்.
கடந்த 2024-ஆம் ஆண்டு நீதிமன்றத்தினால் பிணை வழங்கப்பட்டதை அடுத்து, பொடி லெசி ஒரு சட்டத்தரணியின் வாகனத்தில் ஏறி நீதிமன்ற வளாகத்திலிருந்து வெளியேறினார். அதன் பின்னர் காவல்துறையினரின் கண்காணிப்பிலிருந்து தப்பித்து, இரகசியமான முறையில் இந்தியாவுக்குத் தப்பிச் சென்றிருந்தார்.
தலைமறைவாக இருந்த இவரைப் பிடிப்பதற்கு விடுக்கப்பட்ட சர்வதேசப் பிடியாணையைத் (Red Notice) தொடர்ந்து, இந்தியப் புலனாய்வுப் பிரிவினரின் உதவியுடன் 2025-ஆம் ஆண்டு ஜனவரி மாதம் மும்பையில் வைத்து அவர் கைது செய்யப்பட்டார். ஓராண்டு காலமாக இந்தியச் சிறையில் இருந்த அவரை நாடு கடத்துவதற்கான சட்ட நடவடிக்கைகள் தற்போது நிறைவடைந்துள்ளன.
குற்றப்புலனாய்வுத் திணைக்களத்தின் (CID) இரண்டு விசேட அதிகாரிகள் நேற்று இந்தியாவுக்குச் சென்றுள்ளனர். நாளை அதிகாலை பொடி லெசி கட்டுநாயக்க விமான நிலையத்திற்கு அழைத்து வரப்பட்டதும், அவரிடம் பாரிய போதைப்பொருள் கடத்தல்கள் மற்றும் பாதாள உலகக் குழு மோதல்கள் குறித்துத் தீவிர விசாரணைகள் முன்னெடுக்கப்படவுள்ளன.
ஜனித் மதுசங்க எனப்படும் பொடி லெசி, இலங்கையின் தென் மாகாணத்தை மையமாகக் கொண்ட பாதாள உலகக் குழுவின் தலைவர்களில் ஒருவராகக் கருதப்படுகிறார்.
அவர் மீது கடல் வழியாகக் கோடிக்கணக்கான ரூபாய் மதிப்பிலான ஹெரோயின் மற்றும் ஐஸ் (Ice) போதைப்பொருட்களை இலங்கைக்குக் கடத்திய சர்வதேச வலையமைப்பின் முக்கிய புள்ளியாகச் செயல்பட்டமை, தென் மாகாணத்தில் நிகழ்ந்த பல குழு மோதல்கள் மற்றும் பழிவாங்கும் கொலைச் சம்பவங்களில் நேரடியாகவும், ஏவல் மூலமும் ஈடுபட்டமை, கடந்த காலங்களில் சிறைச்சாலையில் இருந்தபோது, அப்போதைய ஜனாதிபதி மற்றும் பாதுகாப்பு உயர் அதிகாரிகளுக்குக் கொலை மிரட்டல் விடுத்தமை , சட்டவிரோத ஆயுதங்களை வைத்திருந்தமை மற்றும் அவற்றைப் பயன்படுத்திப் பொதுமக்களை அச்சுறுத்தியமை ஆகிய குற்றச்சாட்டுக்கள் முன்வைக்கப்பட்டுள்ளன.
ஒரு மிக முக்கியமான குற்றவாளி (High-Profile Criminal) நாடு கடத்தப்படுவதால், கட்டுநாயக்க சர்வதேச விமான நிலையத்தில் முன்னெப்போதும் இல்லாத பாதுகாப்பு ஏற்பாடுகள் செய்யப்பட்டுள்ளன.
விமான நிலையத்திலிருந்து பலத்த பாதுகாப்புடன் கொழும்பிலுள்ள குற்றப்புலனாய்வுத் திணைக்கள (CID) தலைமையகத்திற்கு அவர் கொண்டு செல்லப்படுவார். இதற்காக குண்டு துளைக்காத வாகனங்கள் மற்றும் விசேட பாதுகாப்பு வாகன அணிவகுப்பு (Convoy) பயன்படுத்தப்படவுள்ளது.
சர்வதேச சட்ட விதிகளின்படி, அவர் இலங்கைக்குக் கொண்டு வரப்பட்டதும் சிறைச்சாலை வைத்திய அதிகாரிகளால் முழுமையான மருத்துவப் பரிசோதனைக்கு உட்படுத்தப்படுவார்.
பயங்கரவாதத் தடுப்புச் சட்டம் (PTA) அல்லது போதைப்பொருள் தடுப்புச் சட்டத்தின் கீழ், அவரை நீண்ட நாட்கள் தடுப்புக்காவலில் வைத்து விசாரணை செய்ய காவல்துறையினர் நீதிமன்ற அனுமதி கோரவுள்ளனா் என்பது குறிப்பிடத்தக்கது
