வவுனியா புரவசம்குளத்தில் பரவிய காட்டுத்தீ: விரைந்து செயல்பட்டுக் கட்டுப்படுத்தியது இலங்கை விமானப்படை!!!!!
வவுனியா, புரவசம்குளம் காட்டுப் பகுதியில் திடீரெனப் பரவிய பாரிய காட்டுத்தீயை இலங்கை விமானப்படையின் (SLAF) தீயணைப்பு மற்றும் மீட்புக் குழுவினர் தீவிர முயற்சி மேற்கொண்டு வெற்றிகரமாகக் கட்டுப்பாட்டுக்குள் கொண்டுவந்துள்ளனர்.
வவுனியா புரவசம்குளம் வனப்பகுதியில் வறட்சியான காலநிலை மற்றும் கடும் காற்று காரணமாகக் காட்டுத்தீ திடீரெனப் பரவத் தொடங்கியது. இதனால் அப்பகுதியிலுள்ள சுற்றாடல் மற்றும் அரிய தாவரங்களுக்குப் பெரும் அச்சுறுத்தல் ஏற்பட்டது.
தீ விரைவாக அருகிலுள்ள குடியிருப்புகள் மற்றும் பிரதான வனப்பகுதிகளுக்குப் பரவுவதைத் தடுக்கும் நோக்கில், வவுனியா விமானப்படைத் தளத்தைச் சேர்ந்த தீயணைப்பு மற்றும் மீட்புக் குழுவினர் உடனடியாகச் சம்பவ இடத்திற்கு விரைந்தனர்.
விமானப்படையின் பிரத்யேக தீயணைப்பு வாகனங்கள் மற்றும் நவீன உபகரணங்களைப் பயன்படுத்தி, தீயணைப்புப் படையினர் பல மணிநேரப் போராட்டத்திற்குப் பின்னர் தீயை முழுமையாகக் கட்டுப்படுத்தினர்.
விமானப்படை வீரர்களின் துரித மற்றும் திட்டமிட்ட தலையீட்டினால் காட்டுத்தீ மேலும் பரவாமல் தடுக்கப்பட்டு, பாரிய சுற்றாடல் அழிவும் பொதுமக்களின் உடமைகளுக்கான ஆபத்தும் தவிர்க்கப்பட்டுள்ளது
வறட்சியான காலநிலை நிலவி வருவதால் பொதுமக்கள் காடுகள் மற்றும் வெளிகளில் தீ வைப்பதைத் தவிர்க்குமாறும், இவ்வாறான தீ விபத்துக்கள் ஏற்படும் போது உடனடியாகப் பாதுகாப்புத் தரப்பினருக்குத் தகவல் வழங்குமாறும் அதிகாரிகள் கேட்டுக்கொண்டுள்ளனர்…….
