145,000 டொலர் விலையில் உணர்ச்சிகளைப் புரிந்துகொள்ளும் புதிய இயந்திர மனிதன் அறிமுகம்
சீனாவின் ரோபோட்டிக்ஸ் நிறுவனமான யுபிடெக், முற்றிலும் மனிதர்களுக்கான துணையாகவும்,
உணர்வுப்பூர்வமான ஆதரவிற்காகவும் வடிவமைக்கப்பட்ட U1 என்ற அதீத யதார்த்தமான ஹியூமனாய்டு ரோபோவை அறிமுகப்படுத்தியுள்ளது. செயற்கைத் தோலால் மூடப்பட்டு, உண்மையான மனிதர்களைப் போலவே தோற்றமளிக்கும் இந்த ரோபோவில், நுண் துளைகள் மற்றும் கைரேகைகள் வரை தத்ரூபமாக வடிவமைக்கப்பட்டுள்ளது.
இது ஆண் மற்றும் பெண் என இரு வடிவங்களிலும் கிடைக்கிறது.
இதன் செயற்கை நுண்ணறிவு, 20-க்கும் மேற்பட்ட மனித உணர்ச்சிகளை 90 சதவீதத்திற்கும் அதிகமான துல்லியத்துடன் அடையாளம் காணும் திறன் கொண்டது.
இது உங்களுடன் பேசுவது, ஆறுதல் கூறுவது மற்றும் மருந்து உட்கொள்ள வேண்டிய நேரத்தை நினைவூட்டுவது போன்ற பணிகளைச் செய்கிறது.
இந்த ரோபோவின் உயர்தர அல்ட்ரா மாடல்களின் விலை $145,835 வரை உள்ளது. இருப்பினும், ஏற்கனவே 13,000-க்கும் மேற்பட்டோர் இதைப் முன்பதிவு செய்துள்ளதாக யுபிடெக் நிறுவனம் தெரிவித்துள்ளது.
சீனா எதிர்கொள்ளும் வயதான மக்கள் தொகை மற்றும் தனிமையால் வாடும் இளைஞர்களைக் குறிவைத்தே இந்த ரோபோ உருவாக்கப்பட்டுள்ளது.
“நிபந்தனையற்ற அன்பை” வழங்குவதாக வாக்குறுதி அளிக்கும் இந்த இயந்திரம், ஒரு விசித்திரமான ஆறுதலைத் தருகிறது.
என்றாவது ஒருநாள், ஒரு ரோபோவால் மனித உறவுகளுக்கு உண்மையான மாற்றாக இருக்க முடியுமா? என்பதுதான் இப்போதைய பெரிய கேள்வியாக உள்ளது.
