நேபாளத்தில் பேருந்து ஆற்றில் விழுந்து விபத்து – 18 பேர் உயிரிழப்பு
நேபாளத்தின் போக்காராவிலிருந்து (Pokhara) தலைநகர் காத்மாண்டு நோக்கிச் சென்று கொண்டிருந்த பயணிகள் பேருந்து ஒன்று, அதிகாலை சுமார் 1:15 – 1:30 மணியளவில் தாதிங் (Dhading) மாவட்டத்தில் உள்ள திரிசூலி ஆற்றில் (Trishuli River) கவிழ்ந்து விபத்துக்குள்ளானது.
இந்த விபத்தில் இதுவரை 18 பேர் உயிரிழந்துள்ளதாக உறுதி செய்யப்பட்டுள்ளது. பலியானவர்களில் வெளிநாட்டுப் பயணியும் (நியூசிலாந்து நாட்டைச் சேர்ந்தவர் எனத் தகவல்) அடங்குகின்றாா்.
மேலும் சுமார் 26-க்கும் மேற்பட்டோர் காயமடைந்துள்ளனர். அவர்கள் சிகிச்சைக்காக காத்மாண்டு மற்றும் உள்ளூர் மருத்துவமனைகளில் அனுமதிக்கப்பட்டுள்ளனர். காயமடைந்தவர்களில் ஜப்பான் மற்றும் டச்சு நாடுகளைச் சேர்ந்த பெண்களும் அடங்குவர்.
பிரிதிவி நெடுஞ்சாலையில் (Prithvi Highway), காத்மாண்டுக்கு மேற்கே சுமார் 80-90 கி.மீ தொலைவில் உள்ள பெனிகாட் ரோராங் (Benighat Rorang) பகுதியில் பேருந்து சுமார் 300 மீட்டர் பள்ளத்தில் உருண்டு ஆற்றுக்குள் விழுந்தது.
விபத்து நடந்தவுடன் நேபாள இராணுவம், ஆயுதப்படை மற்றும் உள்ளூர் மக்கள் இணைந்து மீட்புப் பணிகளில் ஈடுபட்டனர். இரவு நேரமாக இருந்ததால் மீட்புப் பணிகளில் சவால்கள் ஏற்பட்டன.
முதற்கட்ட விசாரணையில், பேருந்து அதிவேகமாகச் சென்றதே விபத்துக்குக் காரணம் எனச் சந்தேகிக்கப்படுகிறது. இருப்பினும், நேபாளத்தின் மலைப்பாங்கான சாலைகள் மற்றும் போதிய உள்கட்டமைப்பு வசதிகள் இல்லாததும் இத்தகைய விபத்துகளுக்கு முக்கிய காரணங்களாகக் கூறப்படுகின்றன.
இதே திரிசூலி ஆற்றில் கடந்த 2024 ஆம் ஆண்டு இரண்டு பேருந்துகள் விழுந்து பெரும் உயிர்ச்சேதம் ஏற்பட்டது குறிப்பிடத்தக்கது.
