ஐரோப்பிய ஒன்றியத்தில் (European Union) உள்ள ஒரு நாட்டின் குடியுரிமை (Citizenship) வைத்திருக்கும் ஒருவர், மற்றொரு ஐரோப்பிய ஒன்றிய நாட்டின் குடியுரிமைக்கு விண்ணப்பிக்க முடியுமா , என்ற கேள்வியும் சந்தேகமும் பலரிடம் இருக்கிறது; இதற்கான பதில், சட்டப்படி இதற்கு எந்தத் தடையும் இல்லை என்பதே .
ஆனால் நீங்கள் ஐரோப்பிய ஒன்றிய நாடொன்றின் குடிமகனாக இருந்தாலும், வேறொரு ஐரோப்பிய நாட்டின் குடியுரிமையைப் பெறுவதற்கு, அந்த நாடு நிர்ணயித்துள்ள வழக்கமான விதிமுறைகளை நீங்கள் பூர்த்தி செய்ய வேண்டும்.
ஐரோப்பிய ஒன்றிய குடிமக்களுக்கு மற்ற உறுப்பு நாடுகளில் சுதந்திரமாக வாழவும், வேலை செய்யவும் (Freedom of Movement) ஏற்கனவே உரிமை உள்ளது. இதனால் தங்கும் அனுமதி (Titre de séjour) போன்ற ஆரம்பக்கட்ட தடைகள் அவர்களுக்கு இருப்பதில்லை. இருப்பினும், குடியுரிமை பெற பின்வரும் பொதுவான தகுதிகளை அவர்கள் பூர்த்தி செய்ய வேண்டும்:
தொடர்ச்சியான வசிப்பிடம் (Residence): சம்பந்தப்பட்ட நாட்டில் குறிப்பிட்ட ஆண்டுகள் (பொதுவாக 5 முதல் 10 ஆண்டுகள்) சட்டப்பூர்வமாக வசித்திருக்க வேண்டும்.
மொழி அறிவு (Language Proficiency): அந்த நாட்டின் அதிகாரப்பூர்வ மொழியில் (எ.கா: ஸ்பெயின் என்றால் ஸ்பானிஷ், ஜெர்மனி என்றால் ஜெர்மன்) குறிப்பிட்ட அளவு தேர்ச்சி பெற்றிருக்க வேண்டும்.
பொருளாதாரத் தகுதி (Financial Stability): நிரந்தர வருமானம், வேலை மற்றும் முறையாக வரி செலுத்திய விவரங்கள்.
சமூக ஒருங்கிணைப்பு (Integration): குற்றப் பின்னணி இல்லாமல் இருப்பதோடு, அந்த நாட்டின் சட்டம் மற்றும் கலாச்சார அமைப்புடன் ஒருங்கிணைந்திருக்க வேண்டும்.
மிக முக்கியமான காரணி: இரட்டைக் குடியுரிமை (Dual Citizenship)
விண்ணப்பிப்பது சாத்தியம் என்றாலும், இரட்டைக் குடியுரிமையை அந்த இரண்டு நாடுகளும் அனுமதிக்கின்றனவா என்பதுதான் இங்கு கவனிக்க வேண்டிய மிக முக்கியமான விஷயமாகும். ஒவ்வொரு ஐரோப்பிய நாடும் இரட்டைக் குடியுரிமை குறித்து தமக்கென தனித்தனி சட்டங்களைக் கொண்டுள்ளன:
பிரான்ஸ், இத்தாலி, பெல்ஜியம், அயர்லாந்து மற்றும் சமீபத்திய சட்டத்திருத்தத்தின்படி ஜெர்மனி போன்ற நாடுகள் இரட்டைக் குடியுரிமையை முழுமையாக அனுமதிக்கின்றன. அதாவது, ஒருவர் தனது முதல் ஐரோப்பிய நாட்டுக்குடியுரிமையை இழக்காமலேயே இங்கு இரண்டாவது குடியுரிமையைப் பெறலாம்.
ஆனல் ஒஸ்ரியா, நெதர்லாந்து போன்ற சில நாடுகள் இரட்டைக் குடியுரிமையை பொதுவாக அனுமதிப்பதில்லை (சில விதிவிலக்குகள் தவிர). இந்த நாடுகளின் குடியுரிமையை நீங்கள் பெற விரும்பினால், உங்களின் முதல் நாட்டு குடியுரிமையை இ ரத்து செய்ய (Renounce) வேண்டி வரலாம்.
சுருக்கமாகச் சொன்னால்: ஒரு ஐரோப்பிய ஒன்றிய குடிமகன், இன்னொரு ஐரோப்பிய நாட்டில் குடியேறி, அங்குள்ள சட்டதிட்டங்களின்படி குறிப்பிட்ட காலம் வாழ்ந்த பிறகு, தாராளமாக அந்த நாட்டின் குடியுரிமையைக் கோர முடியும். ஆனால், இரட்டைக் குடியுரிமை தொடர்பான விதிமுறைகள் மட்டும் நாட்டைப் பொறுத்து மாறுபடும்.
