நெல்லுக்கான உத்தரவாத விலை மற்றும் அரிசிக்கான கட்டுப்பாட்டு விலைகள் தொடர்பிலான வர்த்தமானி அடுத்தவாரம் வெளியிடப்படுமென வர்த்தக, வாணிப,உணவு பாதுகாப்பு மற்றும் கூட்டுறவு அபிவிருத்தி அமைச்சர் வசந்த சமரசிங்க தெரிவித்தார்.
கொழும்பில் நடைபெற்ற நிகழ்வில் கலந்து கொண்ட பின்னர், ஊடகங்களுக்குக் கருத்து தெரிவிக்கையிலேயே அவர் மேற்கண்டவாறு குறிப்பிட்டார்.
இதுபற்றி அவர் மேலும் தெரிவித்ததாவது, “சந்தையில் நிலவும் அரிசித் தட்டுப்பாட்டுக்குத் தீர்வு காண்பதற்கு அரசாங்கம் உரிய நடவடிக்கைகளை எடுக்கவில்லையெனக் குற்றஞ்சாட்டுவோர், அரிசித் தட்டுப்பாட்டுக்கான காரணிகளைக் குறிப்பிடுவதில்லை.
வருடாந்தம் 40 இலட்சம் மெற்றிக் தொன் நெல் உற்பத்தி செய்யப்படுகின்றபோதும் அவற்றில் 10,000 மெற்றிக் தொன் அளவிலான நெல்லே அரசாங்கத்தால் கொள்வனவு செய்யப்படுகிறது.
2023 மற்றும் 2024 ஆம் ஆண்டு காலப்பகுதியில் விவசாயிகளிடமிருந்து சுமார் 5,000 மெற்றிக் தொன் அரிசையே அரசாங்கம் கொள்வனவு செய்தது.
அத்துடன் நெல்லை கொள்வனவு செய்து அவற்றை களஞ்சியப்படுத்தி வைக்கும் வசதி அரசாங்கத்திடம் இருக்கவில்லை. இவ்வாறான காரணிகளால்தான், தற்போது அரிசிக்குத் தட்டுப்பாடு ஏற்பட்டுள்ளது.
அரசுக்குச் சொந்தமான நெற்களஞ்சியங்களை புனரமைப்பதற்கு உரிய நடவடிக்கைகளை முன்னெடுத்துள்ளோம். இம்முறை பெரும்போக அறுவடையின் போது விவசாயிகளிடமிருந்து 03 இலட்சம் மெற்றிக் தொன் வரையிலான நெல்லை கொள்வனவு செய்வோம்.
நெல்லுக்கான உத்தரவாத விலை மற்றும் அரிசிக்கான கட்டுப்பாட்டு விலை தொடர்பிலான வர்த்தமானி அடுத்தவாரம் வெளியிடப்படும். விவசாயிகளையும், நுகர்வோரையும் பாதுகாப்பதற்கு உரிய நடவடிக்கை எடுக்கப்படும்.
பிரதான அரிசி உற்பத்தியாளர்களிடம் அரசாங்கம் அடிபணிந்துள்ளதாக எதிர்க்கட்சிகள் குறிப்பிடுவது முற்றிலும் பொய்யானது. அரிசி தட்டுப்பாட்டுக்கு நிலையான தீர்வு காண்பதே அரசாங்கத்தின் பிரதான நோக்கம்.
விவசாயிகளிடமிருந்து நெல்லை கொள்வனவு செய்து அதனை அரிசியாக்கி சாதகமான விலைக்கு சந்தைக்கு விநியோகிப்பதற்கான திட்டங்களைச் செயற்படுத்தி உள்ளோம்.இவ்வாறு அவர் குறிப்பிட்டார்.
