“முட்டாள்தனமான பேச்சு!”

“முட்டாள்தனமான பேச்சு!” – பிரான்ஸ் கலவரங்களுக்குக் குடியேறிகளே காரணம் என்ற டிரம்பின் குற்றச்சாட்டைத் திட்டவட்டமாக நிராகரித்த பிரான்ஸ்

பிரான்சில் கடந்த வார இறுதியில் வெடித்த மாபெரும் கலவரங்களுக்கும், குடியேறிகளுக்கும் (migrants) முடிச்சுப் போட்டு அமெரிக்க அதிபர் டொனால்ட் டிரம்ப் முன்வைத்த விமர்சனங்களைப் பிரான்ஸ் திட்டவட்டமாக நிராகரித்துள்ளது.

இந்த விவகாரம் தற்போது சர்வதேச அரசியல் களத்தில் பெரும் விவாதத்தைக் கிளப்பியுள்ளது.

டிரம்பின் குற்றச்சாட்டும், மக்ரோனின் பதிலடியும்!

“ஐரோப்பா தனது எல்லைகளை உடனடியாக மூடிவிட்டு, குற்றவாளிகளை வெளியேற்றாவிட்டால் ஐரோப்பாவின் கதை முடிந்துவிடும். பிரான்சிலும் இத்தாலியிலும் நடக்கும் இந்தக் கலவரங்களுக்குப் பள்ளிகள் சார்ந்த பிரச்சினைகள் காரணமல்ல; நாட்டை வெறுக்கும் வெளிநபர்கள் உள்ளே நுழைந்ததே முக்கியக் காரணம்,” என அமெரிக்க அதிபர் டொனால்ட் டிரம்ப் வெள்ளை மாளிகையில் வைத்துத் தெரிவித்தார்.

ஆனால், கத்தாரில் சுற்றுப்பயணம் மேற்கொண்டுள்ள பிரான்ஸ் அதிபர் இமானுவேல் மக்ரோன் இந்தக் கருத்தைக் கடுமையாகச் சாடினார். “வெளிநாட்டுத் தலைவர்கள் உட்படப் பலரும் கூறும் இதுபோன்ற கருத்துகள் முற்றிலும் முட்டாள்தனமானவை. இந்தக் கலவரங்களின் பின்னணியில் வெளிநாட்டுத் தலையீடு இருப்பதற்கான எந்த ஆதாரமும் இல்லை,” என அவர் பதிலடி கொடுத்தார்.

டிரம்பின் இந்தக் கருத்தைப் பிரான்ஸ் மாணவர்களும் நிபுணர்களும் சிறிதும் பொருட்படுத்தவில்லை. போராட்டத்தைக் களத்தில் நின்றபடி பார்த்த 17 வயதான பள்ளி மாணவர் பிலால் நர்ஜிஸ்ஸி கூறுகையில், “இது முட்டாள்தனமான பேச்சு. மக்களிடம் பயத்தை ஏற்படுத்துவதையே தீவிர வலதுசாரிகள் தங்களின் அரசியலாகக் கொண்டுள்ளனர். நாங்கள் மாணவர்களின் நியாயமான கோரிக்கைகளில்தான் முழு கவனம் செலுத்துகிறோம்” என்றார்.

ராஜதந்திரம் மற்றும் அரசியல் பகுப்பாய்வுக்கான சிந்தனைக் குழுவான ‘ஐரோப்பியப் பார்வை மற்றும் பாதுகாப்பு ஆய்வுகளுக்கான நிறுவனத்தின்’ (Institute for European Perspective and Security Studies) தலைவர் இமானுவேல் டுபுய் (Emmanuel Dupuy) அரசியல் இதனை இன்னும் தெளிவாக விளக்குகிறார்: “டிரம்பின் இந்த வாதம் முழுக்க முழுக்க அமெரிக்க வாக்காளர்களைக் குறிவைத்தது. வரவிருக்கும் அமெரிக்க இடைக்காலத் தேர்தல்களில் (midterm elections), ஜனநாயகக் கட்சியினர் வெற்றிபெற்றால் அமெரிக்காவுக்கும் பிரான்சின் நிலைமைதான் வரும் என வாக்காளர்களை அச்சுறுத்தவே இந்தச் செயற்கையான வாதத்தை அவர் பயன்படுத்துகிறார்.”

பள்ளிகளின் உள்கட்டமைப்பு மற்றும் ஆசிரியர் பற்றாக்குறையை முன்னிறுத்தி மாணவர்களால் அமைதியாகத் தொடங்கப்பட்ட இந்தப் போராட்டங்கள், பின்னர் வன்முறையாளர்களால் திசைதிருப்பப்பட்டு பெரும் கலவரமாக வெடித்தது. வாழ்க்கைச் செலவு அதிகரிப்பு உள்ளிட்ட சமூகப் பிரச்சினைகள் மீதான மக்களின் அதிருப்தியும் இதில் கலந்ததால் நிலைமை கைமீறியது. வன்முறைகள் தொடர்பாக 2,000-க்கும் மேற்பட்டோர் (பெரும்பாலும் சிறுவர்கள்) கைது செய்யப்பட்டுள்ளனர்.

பிரெஞ்சு அரசியலமைப்புச் சட்டத்தின்படி, குடிமக்களின் இனம் சார்ந்த தரவுகளைச் சேகரிப்பது சட்டவிரோதமாகும். பிரெஞ்சு அரசும் இந்தக் கலவரங்களைக் குடியேற்றத்தோடு எங்கும் தொடர்புபடுத்தவில்லை. மாறாக, தீவிர இடதுசாரிக் குழுக்களே இந்தக் குழப்பங்களுக்குக் காரணம் என அதிபர் மக்ரோனும், தீவிர வலதுசாரித் தலைவியான மரின் லூ பென்னும் குற்றம் சாட்டியுள்ளனர்.

பிரான்சின் இந்தப் போராட்ட அலைகளைத் தங்களுக்குச் சாதகமாகப் பயன்படுத்திக்கொள்ள ஐரோப்பாவின் சில தலைவர்கள் முயல்கின்றனர். பிரான்சில் கட்டடங்கள் எரியும் காணொளியைப் பகிர்ந்த ஹங்கேரியப் பிரதமர், குடியேற்றத்திற்கு எதிராகத் தாங்கள் ஏன் கடுமையான நிலைப்பாட்டை எடுக்கிறோம் என்பதற்கு இதுவே சான்று என்றார். போலாந்து பிரதமரும் இதையே எதிரொலித்தார்.

ஆனால், நிபுணர் இமானுவேல் டுபுய் இதை மறுக்கிறார். “இதில் கைதானவர்கள் பெரும்பாலும் பள்ளி மாணவர்களும், தொழில்முறை வன்முறைக்குழுக்களுமே. அவர்கள் பல தலைமுறைகளுக்கு முன் குடியேறியவர்களின் வாரிசுகளாகக் கூட இருக்கலாம்; அது இங்கு முக்கியமல்ல. இது சமூக ஒருங்கிணைப்புச் (integration) சார்ந்த பிரச்சினையே தவிர, குடியேற்றம் (immigration) சார்ந்த பிரச்சினை அல்ல” என அவர் தெளிவுபடுத்துகிறார்.

அமெரிக்க உள்நாட்டுப் பிரச்சினைகளைத் திசைதிருப்பும் முயற்சியா?

அமெரிக்காவில் நவம்பர் மாதம் முக்கியத் தேர்தல்கள் நடைபெறவுள்ள நிலையில், அங்கு தேர்தல் காய்ச்சல் தொற்றிக்கொண்டுள்ளது. “மேற்கத்திய தாராளவாதிகள் கருணை என்ற பெயரில் மூன்றாம் உலக நாடுகளைப் பிரான்சிற்குள் இறக்குமதி செய்ததன் விளைவே இது” என அமெரிக்கத் துணை அதிபர் ஜே.டி. வேன்ஸ் (JD Vance) விமர்சித்துள்ளார்.

அதேசமயம், டிரம்ப் தொடங்கிய ஈரான் போர் காரணமாக அமெரிக்காவில் எரிசக்தி விலைகள் புதிய உச்சத்தை எட்டியுள்ளன. இந்த விலைவாசி உயர்வு நெருக்கடியிலிருந்து அமெரிக்க மக்களின் கவனத்தைத் திசைதிருப்பவே,

டிரம்ப் பிரான்ஸ் கலவரங்களை ஒரு கருவியாகப் பயன்படுத்துகிறார் என விமர்சகர்கள் சுட்டிக்காட்டுகின்றனர்.

“இந்தத் தேர்தலில் நாம் சுதாரித்துக்கொள்ளாவிட்டால் என்ன நடக்கும் என்பதைப் பிரான்சைப் பார்த்துத் தெரிந்துகொள்ளுங்கள்” என அமெரிக்க வாக்காளர்களை டிரம்ப் தொடர்ந்து உசுப்பேற்றி வருவது குறிப்பிடத்தக்கது.