ஸ்பெயினில் 70 ஆண்டாக வசித்த வீட்டில் இருந்து வெளியேற்றப்பட்ட 87 வயது மூதாட்டி- வீதியில் இறங்கிய 25,000 பேர்
ஸ்பெயின் நாட்டின் தலைநகரான மாட்ரிட்டில் கடந்த 70 ஆண்டுகளாக ஒரே வீட்டில் வசித்து வந்த 87 வயது மூதாட்டி மேரிகார்மென் அபாஸ்கல்,
திடீரென அண்மையில் அந்த வீட்டிலிருந்து வெளியேற்றப்பட்டார். அந்த வீட்டின் வாடகை கிட்டத்தட்ட மூன்று மடங்கு உயர்த்தப்பட்டதே இந்த அதிரடி நடவடிக்கைக்குக் காரணம் என்பதால், பொதுமக்கள் மத்தியில் கடும் கோபம் வெடித்தது.
வீட்டை விட்டு வெளியேற்றப்பட்ட அபாஸ்கல், தனக்கு இழைக்கப்பட்ட அநீதிக்கு எதிராகக் குரல் கொடுக்க மக்களைத் தங்களின் போராட்டத்தில் கலந்துகொள்ளுமாறு கேட்டுக்கொண்டு இணையத்தில் ஒரு காணொளியை வெளியிட்டார்.
அவரது இந்த வேண்டுகோள் பொதுமக்களிடையே பெரும் தாக்கத்தை ஏற்படுத்தியதுடன், அவருக்கு ஆதரவாக ஆயிரக்கணக்கானோரை ஒன்றிணைக்கச் செய்தது.
மாட்ரிட் வீதிகளில் திரண்ட சுமார் 25,000-க்கும் மேற்பட்ட மக்கள், தங்கள் கைகளில் வீட்டுச் சாவிகளை ஆட்டியபடியும்,
விசிலடித்தும், தங்களது எதிர்ப்பைப் பதிவு செய்து முழக்கங்களை எழுப்பினர். அதிகரித்து வரும் வீட்டுச் செலவுகளைக் கட்டுப்படுத்தவும்,
பொதுமக்களை வீடுகளிலிருந்து எளிதில் வெளியேற்றுவதைக் கடினமாக்கவும் அரசுகள் கடுமையான சட்ட நடவடிக்கைகளை எடுக்க வேண்டும் என்று அவர்கள் பதாகைகளை ஏந்தி வலியுறுத்தினர்.
வாடகையை விருப்பம் போல் உயர்த்துவதைத் தடை செய்ய வேண்டும் என்றும், சாதாரணக் குடிமக்களுக்கு உரிய வீட்டுப் பாதுகாப்பு வழங்கப்பட வேண்டும் என்றும் போராட்டத்தில் கலந்துகொண்ட மக்கள் தீவிரமாகக் குரல் கொடுத்தனர்.
இந்தச் சம்பவம் ஸ்பெயின் முழுவதுமுள்ள நடுத்தர மற்றும் ஏழை மக்களின் வாடகை நெருக்கடியை வெளிச்சம் போட்டுக் காட்டியுள்ளது.
இதற்கிடையில், 87 வயது மூதாட்டிக்கு ஆதரவாக மக்கள் திரண்டது மற்றும் அவருக்கு ஏற்பட்ட அவலம் குறித்துப் பேசிய ஸ்பெயின் பிரதமர் பெட்ரோ சான்ச்செஸ்,
இந்தச் சம்பவத்தை ஒரு “சமூகத் துயரம்” என்று வர்ணித்துள்ளார். மக்களின் இந்த எழுச்சியைத் தொடர்ந்து,
வீட்டுவசதி மற்றும் வாடகை விவகாரங்களில் அரசு புதிய கட்டுப்பாடுகளைக் கொண்டுவர வேண்டும் என்ற கோரிக்கைகள் வலுப்பெற்றுள்ளன.
