பிரித்தானியாவில் விமானப்படை பயிற்சி ஜெட் விமானம் விபத்துக்குள்ளானது!!
விமானிகள் இருவரும் பாராசூட் மூலம் உயிர் தப்பினர்!
பிரித்தானியாவின் வேல்ஸ் பகுதியில் அமைந்துள்ள ஆர்.ஏ.எப் வெலி (RAF Valley) விமானப்படை தளத்திலிருந்து
புறப்பட்ட ரோயல் விமானப்படைக்குச் சொந்தமான ‘ஹாக் டி2’ (Hawk T2) ரக பயிற்சி ஜெட் விமானம் ஒன்று புறப்பட்ட சிறிது.
நேரத்திலேயே விபத்துக்குள்ளாகியுள்ளது. ஆங்கிள்சி (Anglesey) தீவில் உள்ள விமானப்படை தளத்திலிருந்து புறப்பட்டபோது,
விமானத்தில் தீப்பொறிகள் கிளம்பியதை நேரில் கண்டவர்கள் தெரிவித்துள்ளனர்.
விமானம் கட்டுப்பாட்டை இழந்து செங்குத்தாக மேல்நோக்கிச் சென்றதைத் தொடர்ந்து,
அதிலிருந்த இரண்டு விமானிகளும் அவசரகால பொறிமுறை (Ejection) மூலம் பாராசூட் வழியாக வெளியேறித் தரையிறங்கினர்.
விமானம் விழுந்து வெடித்துச் சிதறிய போதிலும், விமானிகள் இருவரும் பாரிய காயங்கள் ஏதுமின்றி உயிர் தப்பியுள்ளனர்.
அவர்கள் லேசான காயங்களுடன் சிகிச்சை பெற்று வருவதாக வடக்கு வேல்ஸ் காவற்துறை உறுதிப்படுத்தியுள்ளது.
இச்சம்பவம் தொடர்பில் விசாரணைகள் ஆரம்பிக்கப்பட்டுள்ளதாக பிரித்தானிய ரோயல் விமானப்படை அறிவித்துள்ளது.
ஹாக் டி2 ரக விமானங்கள் பிரித்தானிய விமானப்படையின் நவீன போர் விமானிகளுக்கான பயிற்சியில் முக்கியப் பங்கு வகிக்கின்றன.
எனினும், இந்த ரக விமானங்களின் எஞ்சின்களில் தொடர்ச்சியாக ஏற்படும் தொழில்நுட்பக் கோளாறுகள் மற்றும் நம்பகத்தன்மை குறைபாடுகள் காரணமாக,
முன்னதாக ஆர்.ஏ.எப் உயர் அதிகாரிகளால் விமர்சனங்கள் முன்வைக்கப்பட்டிருந்தன. இதன் காரணமாக 2023-ஆம் ஆண்டில் பிரித்தானிய விமானப்படையின்
28 ஹாக் டி2 ரக விமானங்கள் முழுமையாகத் தற்காலிகமாகத் தரையிறக்கப்பட்டு ஆய்வு செய்யப்பட்டமை குறிப்பிடத்தக்கது.
