நிதி நெருக்கடியில் சிக்கும் பிரான்ஸ்!!
1978ஆம் ஆண்டுக்குப் பிறகு இதுவரை இல்லாத அளவுக்கு உயரும் பிரான்ஸின் கடன் – அதிகரிக்கும் நிதி நெருக்கடி
பிரான்சின் பொதுக்கடன் விகிதம் இந்த ஆண்டு 119.3 சதவீதத்தை எட்டவுள்ளதாகப் பிரெஞ்சு நிதியமைச்சகம் அறிவித்துள்ளது. நாட்டின் வரலாற்றில் 1978ஆம் ஆண்டுக்குப் பின்னர் பதிவாகும் மிக உயர்ந்த அளவு இதுவாகும்.
ஐரோப்பிய ஒன்றியத்தின் விதிமுறைகளின்படி உறுப்பு நாடுகள் தங்கள் பொதுக்கடனை ஜிடிபியில் 60 சதவீதத்திற்குள் வைத்திருக்க வேண்டும். ஆனால், பிரான்சின் கடன் இந்த எல்லையைத் தாண்டி இரட்டிப்பாகியுள்ளதுடன், 2027-க்குள் இது 121.7 சதவீதமாக மேலும் அதிகரிக்கும் எனவும் கணிக்கப்பட்டுள்ளது.
தொடர்ந்து உயர்ந்துவரும் நிதிப் பற்றாக்குறையே நாட்டின் கடன் சுமை தானாக அதிகரிக்க முக்கியக் காரணமாகக் கூறப்படுகிறது. ஐரோப்பிய ஒன்றியத்தின் வரம்பான 3 சதவீதத்தைத் தாண்டி, கடந்த ஆண்டு பற்றாக்குறை 5.1 சதவீதமாக இருந்த நிலையில், இந்த ஆண்டு அது 5.4 சதவீதமாக உயரும் என எதிர்பார்க்கப்படுகிறது.
இந்தச் சிக்கலைச் சமாளிக்க, பிரதமர் செபாஸ்டியன் லெகோர்னு தலைமையிலான அரசு 2027ஆம் ஆண்டுக்கான வரவு-செலவுத் திட்டத்தில் 54 பில்லியன் யூரோக்கள் மதிப்பிலான மாபெரும் நிதிவெட்டு மற்றும் செலவினக் குறைப்புத் திட்டங்களை அறிவித்துள்ளது.
எனினும், ஓய்வூதியதாரர்களுக்கான வரிச் சலுகைகளைக் குறைப்பது போன்ற உணர்வுபூர்வமான நடவடிக்கைகளுக்குப் பாராளுமன்றத்தில் கடுமையான எதிர்ப்புகள் எழுந்துள்ளன. வரவிருக்கும் தேர்தல்களையும் கருத்தில் கொண்டு நாடாளுமன்றமே இதுகுறித்த இறுதி முடிவுகளை எடுக்க வேண்டிய கட்டாயம் ஏற்பட்டுள்ளது.
பலவீனமான நுகர்வோர் செலவினங்கள் மற்றும் சர்வதேச எரிசக்தி விலை உயர்வு போன்ற காரணங்களால் பிரான்சின் பொருளாதார வளர்ச்சி பாதிக்கப்பட்டுள்ளபோதிலும், சரியான துரித முடிவுகளை எடுத்தால் தற்போதைய நெருக்கடியிலிருந்து மீள முடியும் என நிபுணர்கள் நம்பிக்கை தெரிவித்துள்ளனர்.
