தொழில்நுட்ப உலகில் புதிய மைல்கல் – எந்தவொரு மேற்பரப்பையும் சோலார் பேனலாக மாற்றும் பெயிண்ட்
எதிர்கால தூய்மையான ஆற்றல் என்பது நம்மைச் சுற்றியுள்ள சுவர்களில் பூசப்படும் பெயிண்ட்டாக மாறக்கூடும்.
சூரிய ஒளி மற்றும் காற்றில் உள்ள நீர் நீராவியைப் பயன்படுத்தி எரிபொருளைத் தயாரிக்கும் இந்த பெயிண்ட் தொழில்நுட்பம், அறிவியல் புனைகதை போலத் தோன்றினாலும், இது சாத்தியம் என்பதை விஞ்ஞானிகள் நிரூபித்துள்ளனர்.
RMIT பல்கலைக்கழக ஆராய்ச்சியாளர்கள், ‘செயற்கை மாலிப்டினம் சல்பைடு’ மற்றும் ‘டைட்டானியம் ஆக்சைடு’ ஆகியவற்றை ஒன்றாக இணைத்து இந்த சூரிய ஆற்றல் பெயிண்ட்டை உருவாக்கியுள்ளனர்.
இந்த வேதிப்பொருள் காற்றில் உள்ள ஈரப்பதத்தை உறிஞ்சி, சூரிய ஒளியின் உதவியோடு தண்ணீரை ஹைட்ரஜன் மற்றும் ஆக்சிஜனாகப் பிரிக்கிறது. இதில் கிடைக்கும் ஹைட்ரஜனைத் தூய்மையான எரிபொருளாகப் பயன்படுத்த முடியும்.
சாதாரண சோலார் பேனல்கள் சூரிய ஒளியை நேரடியாக மின்சாரமாக மாற்றுகின்றன. ஆனால், இந்த பெயிண்ட் அவ்வாறு செய்யாமல், சூரிய ஒளியால் தூண்டப்படும் ஒரு வேதியியல் அமைப்பாகச் செயல்படுகிறது.
இது ஒரு ஊக்கியைப் பயன்படுத்தி வேதிவினையை ஏற்படுத்தி, ஆற்றல் சேமிப்பிற்கான ஹைட்ரஜனை உற்பத்தி செய்கிறது.
நகரங்களில் உள்ள கட்டிடங்கள், கூரைகள் மற்றும் சுவர்கள் என அனைத்துப் பரப்புகளிலும் தினமும் அதிகளவு சூரிய ஒளி படுகிறது.
எனவே, இத்தொழில்நுட்பம் மேம்படுத்தப்பட்டால், நம்மைச் சுற்றியுள்ள சாதாரண சுவர்கள்கூட எதிர்காலத்தில் ஆற்றலை உற்பத்தி செய்யும் மையங்களாக மாறும் என்பதால் இந்த யோசனை பெரும் வரவேற்பைப் பெற்றுள்ளது.
இருப்பினும், இப்போதைக்கு இது ஒரு ஆரம்பகட்ட ஆராய்ச்சி மட்டுமே என்பதைப் புரிந்துகொள்ள வேண்டும். வீடுகளுக்கு உடனடியாகப் பயன்படுத்தக்கூடிய ஒரு முழுமையான பொருளாக இது இன்னும் மாறவில்லை.
இதன் செயல்திறன், ஆயுட்காலம், உற்பத்திச் செலவு மற்றும் ஹைட்ரஜனைப் பாதுகாப்பாகச் சேகரிக்கும் முறைகள் ஆகியவற்றை விஞ்ஞானிகள் இன்னும் மேம்படுத்த வேண்டியுள்ளது.
எதிர்காலத்தில் சூரிய ஆற்றல் என்பது வீட்டின் கூரைகளில் இருக்கும் சோலார் பேனல்களோடு மட்டும் நின்றுவிடாது.
அது நம்மைச் சுற்றியுள்ள அனைத்துச் சுவர்களிலுமே ஒருங்கிணைந்த ஒரு தொழில்நுட்பமாக மாறப்போகிறது என்பது மட்டும் உறுதி.
