உலகளாவிய செயற்கை நுண்ணறிவு ஆதிக்கப் போர்

உலகளாவிய செயற்கை நுண்ணறிவு ஆதிக்கப் போர்: புதிய கூட்டணியை (Alliance) அறிவித்து அமெரிக்காவிற்கு அதிர்ச்சியளித்த சீன அதிபர் ஷி ஜின்பிங்!

சீனாவின் வர்த்தகத் தலைநகரான ஷாங்காயில் (Shanghai) நடைபெற்று வரும் உலகளாவிய செயற்கை நுண்ணறிவு மாநாட்டில் (Conférence mondiale sur l’IA), பல அதிரடியான அரசியல் மற்றும் தொழில்நுட்பக் காய்களைச் சீனா நகர்த்தியுள்ளது. எதிர்காலத் தொழில்நுட்ப உலகில் அமெரிக்காவின் தனிப்பெரும் ஆதிக்கத்திற்கு முற்றுப்புள்ளி வைக்கும் விதமாக, ஒரு புதிய சர்வதேசக் கூட்டணியைச் சீன அதிபர் ஷி ஜின்பிங் (Xi Jinping) அதிகாரப்பூர்வமாக அறிவித்துள்ளார்.

இந்த மாநாட்டில் உரையாற்றிய சீன அதிபர், “செயற்கை நுண்ணறிவு வளர்ச்சி என்பது ஒரு தனித்த நாட்டின் தனி ஆவர்த்தனமாக (Solo) இருக்கக் கூடாது; அது சர்வதேச ஒத்துழைப்பின் மாபெரும் கூட்டிசையாக (Symphonie) ஒலிக்க வேண்டும்,” எனச் சூளுரைத்தார்.

தேசியப் பாதுகாப்பு (Sécurité nationale) என்ற போர்வையில், ஒரு நாடு தனது பாதுகாப்பை மற்ற நாடுகளின் மீது திணிப்பதையும், பிற நாடுகளின் தொழில்நுட்ப வளர்ச்சியைத் தடுப்பதையும் கூட்டாக எதிர்க்க வேண்டும் என அவர் அறைகூவல் விடுத்துள்ளார். இது அமெரிக்காவை நோக்கிய நேரடித் தாக்குதலாகவே அரசியல் நோக்கர்களால் (Analystes politiques) பார்க்கப்படுகிறது.

உலக அரங்கில் தனது செல்வாக்கை நிலைநிறுத்தச் சீனா உருவாக்கியுள்ள புதிய ஆயுதம்தான், நேற்று ஜூலை 16 அன்று முறைப்படி தொடங்கப்பட்ட ‘உலகச் செயற்கை நுண்ணறிவு ஒத்துழைப்பு அமைப்பு’ (Organisation mondiale de coopération sur l’intelligence artificielle – WAICO).

ஷாங்காயைத் தலைமையிடமாகக் கொண்டு செயல்படும் இந்தக் கூட்டணியில், பிரேசில் (Brésil), தென்னாப்பிரிக்கா (Afrique du Sud), ரஷ்யா (Russie), மலேசியா (Malaisie), இந்தோனேசியா மற்றும் செனகல் (Sénégal) உள்ளிட்ட 29 நாடுகள் நிறுவன உறுப்பினர்களாக இணைந்துள்ளன. வளரும் நாடுகளை (Pays en développement) ஒருங்கிணைப்பதன் மூலம், ஐக்கிய நாடுகள் சபையில் (Nations Unies) எதிர்காலச் செயற்கை நுண்ணறிவு தொடர்பான சட்டதிட்டங்களை (Réglementations) வகுப்பதில் சீனா தனது குரலை ஓங்கி ஒலிக்கச் செய்யத் திட்டமிட்டுள்ளது.

அமெரிக்க-சீனத் தொழில்நுட்பப் போர் (Guerre technologique)

செயற்கை நுண்ணறிவுத் துறையில் யாருக்கு முதலிடம் என்பதில் அமெரிக்காவிற்கும் சீனாவிற்கும் இடையே ‘நுண்மின்சில்லைப் போர்’ (Guerre des puces / Chip War) உச்சத்தை எட்டியுள்ளது.

அதிநவீன நுண்மின்சில்லைகளைச் (Semi-conducteurs) சீனாவுக்கு ஏற்றுமதி செய்ய அமெரிக்கா கடுமையான தடைகளை விதித்துள்ளது. இதற்குப் பதிலடியாக, இவற்றைத் தயாரிக்கத் தேவையான அரிய வகை கனிமங்களின் (Minéraux rares) ஏற்றுமதியைச் சீனா முடக்கியுள்ளது.

அதிநவீனத் தொழில்நுட்பத்தில் அமெரிக்கா சற்று முன்னிலையில் இருந்தாலும், மாபெரும் தரவு மையங்களை (Centres de données) இயக்குவதிலும், இத்துறைக்குத் தேவையான மாபெரும் மின்சாரத்தை (Électricité) தடையின்றி மலிவாக வழங்குவதிலும் சீனா அமெரிக்காவை விடப் பல மடங்கு வலிமையுடன் திகழ்கிறது.

இதுவரை இணையத்தை (Internet) அமெரிக்காவின் கண்டுபிடிப்பாகப் பார்த்து, அதிலிருந்து தன்னைத் துண்டித்துக் கொண்டு உள்நாட்டிற்குள் சுருங்கியிருந்த சீனா, தற்பொழுது தனது நிலைப்பாட்டை முற்றிலுமாக மாற்றிக்கொண்டுள்ளது. உலக நாடுகள் செயற்கை நுண்ணறிவை முழுமையாகத் தழுவுவதற்கு முன்பாகவே, முந்திக்கொண்டு அதற்கான உலகளாவிய சட்டங்களை (Politiques mondiales) எழுதத் தொடங்கியுள்ளது.

அமெரிக்கா சர்வதேச இணையப் பொறிமுறைகளிலிருந்து (Diplomatie cybernétique) மெல்ல மெல்லப் பின்வாங்கி வரும் தற்போதைய சூழலைப் பயன்படுத்திக்கொண்டு, வளரும் நாடுகளின் (Pays du Sud) ஆதரவோடு உலகத் தொழில்நுட்ப அரங்கில் ஒரு புதிய அதிகார மையத்தை உருவாக்கச் சீனா முழுவீச்சில் களமிறங்கியுள்ளது!