விசாரணை என்ற பெயரில் மாணவர்கள் மீது முன்னெடுக்கப்படும் அடக்குமுறை – யாழ் பல்கலைக்கழகத்தில் பாரிய போராட்டம்
ஜனநாயக உரிமைகளைக் கோரி யாழ்ப்பாணப் பல்கலைக்கழக மாணவர்கள் இன்றைய தினம் அனைத்து விரிவுரைகளையும் புறக்கணித்துப் போராட்டத்தில் ஈடுபட்டு வருகின்றனர்.
கடந்த பிப்ரவரி 4-ஆம் திகதி கறுப்புக்கொடி ஏற்றிய விவகாரம் தொடர்பாக, பல்கலைக்கழகத்தின் மூன்று மாணவர்கள் குற்றத்தடுப்புப் பிரிவினரால் விசாரணைக்கு அழைக்கப்பட்டுள்ளமை இந்தப் போராட்டத்திற்கு முக்கிய காரணமாகும்.
ஜனாதிபதி அநுர குமார திசாநாயக்கவின் ஆட்சியிலும் மாணவர்கள் மீதான இவ்வாறான அச்சுறுத்தல்கள் தொடர்வதை நிறுத்த வேண்டும் என மாணவர்கள் வலியுறுத்தி வருகின்றனர்.
பல்கலைக்கழக வளாகத்தினுள் இடம்பெறும் ஜனநாயக ரீதியான செயற்பாடுகளுக்குத் தடை விதிக்கக் கூடாது எனவும், விசாரணைகளை வெளிப்படைத்தன்மையுடன் பல்கலைக்கழக நிர்வாகத்தினூடாகவே நிறைவு செய்ய வேண்டும் எனவும் அவர்கள் கோரிக்கை விடுத்துள்ளனர்.
விசாரணைகளுக்காக அழைத்துச் செல்லப்பட்ட மாணவர்கள் பாதுகாப்பாகத் திரும்பி வரும் வரை இந்தப் போராட்டம் தொடரும் என மாணவர்கள் தெரிவித்துள்ளனர்.
போராட்டத்தின் ஒரு கட்டமாகப் பல்கலைக்கழகத்தின் பிரதான நுழைவாயில் மாணவர்களால் மூடப்பட்டுள்ளதால், பல்கலைக்கழகத்தின் கல்விச் செயற்பாடுகள் முழுமையாக முடங்கியுள்ளன.
