உணவு வீணாவதைத் தடுக்க பிரான்ஸின் அதிரடி சட்டம்: இனி மீதமாகும் உணவுகள் அனைத்தும் ஏழைகளுக்கு
உணவு வீணாவதைக் குறைக்கவும், உணவின்றித் தவிப்பவர்களுக்கு உதவவும் பிரான்ஸ் ஒரு புரட்சிகரமான சட்டத்தைக் கொண்டு வந்துள்ளது. இதன்படி, பெரிய சூப்பர் மார்க்கெட்டுகள் விற்பனையாகாத, ஆனால் உண்ணக்கூடிய நிலையில் உள்ள உணவுப் பொருட்களைத் தூக்கி எறியாமல், தொண்டு நிறுவனங்களுக்கும் உணவு வங்கிகளுக்கும் தானமாக வழங்குவது கட்டாயமாக்கப்பட்டுள்ளது.
Loi Garotஎன்று அழைக்கப்படும் இந்தச் சட்டம், 400 சதுர மீட்டருக்கும் அதிகமான பரப்பளவு கொண்ட அனைத்து மளிகைக் கடைகளுக்கும் பொருந்தும்.
இந்த விதியைப் பின்பற்றத் தவறும் நிறுவனங்களுக்கு, ஒவ்வொரு விதிமீறலுக்கும் சுமார் 10,000 யூரோக்கள் வரை அபராதம் விதிக்கப்படலாம்.
முன்னதாக, சில விற்பனையாளர்கள் குப்பையிலிருந்து உணவை யாரும் எடுக்கக்கூடாது என்பதற்காக அவற்றை வேண்டுமென்றே அழித்து வந்தனர். புதிய சட்டம் இத்தகைய செயல்களுக்கு முற்றுப்புள்ளி வைத்து, பாதுகாப்பான உணவை ஏழைகளுக்குச் சென்றடைய உறுதி செய்கிறது.
மில்லியன் கணக்கான டன்கள் உணவு வீணாவதைத் தடுக்க வேண்டும் எனப் போராடிய சமூக ஆர்வலர்களின் முயற்சியால் இந்தச் சட்டம் நடைமுறைக்கு வந்தது. பல குடும்பங்கள் உணவிற்காகப் போராடும் சூழலில், நல்ல நிலையில் உள்ள உணவைக் குப்பையில் கொட்டுவது தவறு என்ற கருத்தின் அடிப்படையில் இது கொண்டு வரப்பட்டது.
பிரான்ஸின் இந்த முன்னுதாரணமான நடவடிக்கை இத்தாலி மற்றும் செக் குடியரசு போன்ற பிற ஐரோப்பிய நாடுகளையும் ஈர்த்துள்ளது. அங்கும் இத்தகைய திட்டங்கள் தொடங்கப்பட்டாலும், பிரான்ஸைப் போல அவை இன்னும் முழுமையான கட்டாயச் சட்டமாக மாறவில்லை.
