“பிளான் ஏ தோல்வி; பிளான் பி பாரிய பேரழிவாக அமையும்”: ஜனாதிபதி ட்ரம்பிற்கு ஈரானிய வெளியுறவு அமைச்சர் நேரடி எச்சரிக்கை!
ஈரானுக்கு எதிரான துரித இராணுவ வெற்றியை இலக்காகக் கொண்ட அமெரிக்க ஜனாதிபதி டொனால்ட் ட்ரம்பின் ஆரம்பக்கட்டத் திட்டம் முற்றுமுழுதாகத் தோல்வியடைந்துள்ளதாக ஈரானிய வெளியுறவுத்துறை அமைச்சர் அப்பாஸ் அராக்ஷி (Abbas Araghchi) மிகக் கடுமையான விமர்சனத்தை முன்வைத்துள்ளார். அமெரிக்காவுடனான எவ்விதமான போர்நிறுத்தப் பேச்சுவார்த்தைகளுக்கும் ஈரான் தயாராக இல்லை எனவும் அவர் திட்டவட்டமாக அறிவித்துள்ளார்.
“இஸ்ரேலுக்கு முன்னுரிமை; அமெரிக்காவிற்குப் பின்னடைவு”
சமூக வலைத்தளமான ‘எக்ஸ்’ (X) தளத்தில் ஜனாதிபதி ட்ரம்பை நேரடியாக விளித்துப் பதிவிட்டுள்ள அமைச்சர் அராக்ஷி, அமெரிக்காவின் வெளியுறவுக் கொள்கைகளைக் கடுமையாகச் சாடியுள்ளார். “திரு. ஜனாதிபதி அவர்களே, ஈரானை இராணுவ ரீதியில் துரிதமாகவும் நேர்த்தியாகவும் வீழ்த்தும் உங்களின் ‘பிளான் ஏ’ (Plan A) தோற்றுவிட்டது. இனி நீங்கள் முன்னெடுக்கவுள்ள ‘பிளான் பி’ (Plan B) அதைவிடப் பாரியதொரு வரலாற்றுத் தோல்வியையே சந்திக்கும்” என அவர் எச்சரித்துள்ளார்.
மேலும், வரலாற்றுச் சிறப்புமிக்க இராஜதந்திர ஒப்பந்தமொன்றை எட்டுவதற்கான வாய்ப்புகளை அமெரிக்காவே சிதைத்துவிட்டதாகக் குறிப்பிட்ட அவர், “மத்திய கிழக்கில் இஸ்ரேலுக்கு எப்போதும் முதலிடம் (Israel First) வழங்கும் உங்கள் கொள்கை, இறுதியில் அமெரிக்காவை அதலபாதாளத்திற்கே (America Last) தள்ளும்” எனவும் சுட்டிக்காட்டியுள்ளார்.
“நம்பகத்தன்மையற்ற அமெரிக்காவுடன் பேச்சுவார்த்தை இல்லை”
சர்வதேச ஊடகமான ‘NBC’ செய்தி நிறுவனத்திற்கு வழங்கிய விசேட செவ்வியொன்றில் கருத்துத் தெரிவித்த அராக்ஷி, ஈரான் ஒருபோதும் போர் நிறுத்தத்திற்காக அமெரிக்காவிடம் கையேந்தவில்லை எனத் தெரிவித்தார். “அமெரிக்காவுடன் மீண்டும் பேச்சுவார்த்தை நடத்துவதற்கு எவ்வித முகாந்திரமும் இல்லை. கடந்த காலங்களில் இரண்டு தடவைகள் நாம் பேச்சுவார்த்தைகளில் ஈடுபட்டிருந்தோம். ஆனால், அந்தப் பேச்சுவார்த்தைகள் நடைபெற்றுக்கொண்டிருந்த மத்தியிலேயே அமெரிக்கா எம்மீது தாக்குதல்களை மேற்கொண்டது” எனத் தெரிவித்து, அமெரிக்காவின் இராஜதந்திர நம்பகத்தன்மையை அவர் நேரடியாகக் கேள்விக்குள்ளாக்கினார்.
ஹோர்முஸ் நீரிணையில் உலகளாவிய அச்சுறுத்தல்
சர்வதேச எண்ணெய் வர்த்தகத்தின் உயிர்நாடியாகக் கருதப்படும் ஹோர்முஸ் நீரிணை (Strait of Hormuz) குறித்தும் அவர் முக்கிய தகவலொன்றை வெளியிட்டார். “ஈரான் தற்போதைக்கு குறித்த நீரிணையை மூடவில்லை. எனினும், போர் அச்சுறுத்தல் காரணமாகவே வர்த்தகக் கப்பல்களும் எண்ணெய் தாங்கிகளும் அப்பாதையூடாகப் பயணிக்க மறுக்கின்றன. ஆயினும், இந்தப் போர் நிலைமை தொடரும் பட்சத்தில், எந்தவொரு அதிரடியான நிலைப்பாட்டையும் எடுக்க ஈரான் தயங்காது” எனத் தெரிவித்து, உலகளாவிய எண்ணெய் விநியோகத்தில் ஏற்படக்கூடிய பாரிய நெருக்கடி குறித்த மறைமுக எச்சரிக்கையையும் அவர் விடுத்துள்ளார்.
அமெரிக்க ஜனாதிபதி டொனால்ட் ட்ரம்பின் நேரடி இராணுவ அச்சுறுத்தல்களுக்கு மத்தியில், ஈரானிய அமைச்சரின் இந்த ஆவேசமான அறிக்கை, மத்திய கிழக்கில் சமாதானத்திற்கான கதவுகள் முற்றுமுழுதாக அடைக்கப்பட்டுள்ளமையையே வெளிக்காட்டுவதாக சர்வதேச அரசியல் அவதானிகள் சுட்டிக்காட்டுகின்றனர்.
