“நேரம் ஓடிக்கொண்டிருக்கிறது!” ஐரோப்பிய தொலைக்காட்சி நிறுவனங்களுக்கு வெடிகுண்டு மிரட்டல்!
ஐரோப்பாவின் பல நாடுகளில் உள்ள தொலைக்காட்சி நிறுவனங்களுக்கு அனுப்பப்பட்ட வெடிகுண்டு மிரட்டல் மின்னஞ்சல்களால்
அவசர வெளியேற்ற நடவடிக்கைகள் மேற்கொள்ளப்பட்டதுடன், சில தொலைக்காட்சி ஒளிபரப்புகளும் பாதிக்கப்பட்டுள்ளன.
மிரட்டல் செய்தியில் இடம்பெற்றிருந்த வாசகம் பலரது கவனத்தையும் ஈர்த்துள்ளது.
“நேரம் ஓடிக்கொண்டிருக்கிறது!”
நவம்பர் 6ஆம் திகதி, அயர்லாந்தின் தேசிய ஒலிபரப்பு நிறுவனமான RTÉ, பிரித்தானியாவின் Sky மற்றும் பல்கேரியாவின் Nova TV உள்ளிட்ட ஊடக நிறுவனங்களுக்கு பாதுகாப்பு அச்சுறுத்தல்கள் வந்துள்ளன.
அயர்லாந்தின் டப்ளின் நகரில் அமைந்துள்ள RTÉ நிறுவன வளாகத்திலிருந்து பணியாளர்கள் வெளியேற்றப்பட்டனர்.
பொலிஸார் கட்டடங்களை விரிவாகச் சோதனையிட்டதால், வழக்கமான செய்தி ஒளிபரப்புக்குப் பதிலாக இசையும் முன்பதிவு செய்யப்பட்ட அறிவிப்பும் ஒலிபரப்பப்பட்டன. இந்த இடையூறு சுமார் மூன்று மணித்தியாலங்கள் வரை நீடித்தது.
பல்கேரியாவின் சோபியா நகரில் உள்ள Nova TV செய்தியறையும் பாதுகாப்பு காரணங்களுக்காக வெளியேற்றப்பட்டது. பொலிஸார் சோதனைகளை முடித்த பின்னர் பணியாளர்கள் மீண்டும் பணிக்குத் திரும்பினர்.
குறித்த மின்னஞ்சல்களில், ஊடக நிறுவனங்களின் கட்டடங்களுக்குள் வெடிகுண்டுகள் வைக்கப்பட்டுள்ளதாகவும், அவை 45 நிமிடங்களில் வெடிக்கும் என்றும் மிரட்டல் விடுக்கப்பட்டிருந்தது.
மேலும், “Mikhail Andropov” என்ற பெயரில் கையொப்பமிடப்பட்டிருந்த ஒரு செய்தியில், ஐரோப்பாவில் மேலும் பல இடையூறுகள் ஏற்படலாம் என்றும் எச்சரிக்கப்பட்டிருந்தது.
இந்த மிரட்டல்களின் பின்னணியில் யார் இருக்கிறார்கள் என்பது இதுவரை உறுதிப்படுத்தப்படவில்லை.
இதற்கு முன்னரும் ஐரோப்பாவின் பல நாடுகளில் விமானங்களைக் குறிவைத்து போலியான வெடிகுண்டு மிரட்டல்கள் விடுக்கப்பட்டதால் விமானப் பயணங்கள் திசைதிருப்பப்பட்டதுடன், பாதுகாப்புச் சோதனைகளும் மேற்கொள்ளப்பட்டன.
அயர்லாந்து பிரதமர் மைக்கேல் மார்ட்டின், இந்தச் சம்பவங்களுக்குப் பின்னால் தனிநபர்களா அல்லது ஒருங்கிணைக்கப்பட்ட குழுவா என்பது இன்னும் தெரியவில்லை எனத் தெரிவித்துள்ளார்.
முக்கியமாக, பாதிக்கப்பட்ட தொலைக்காட்சி நிறுவனங்களில் நடத்தப்பட்ட சோதனைகளின்போது வெடிகுண்டுகள் எதுவும் கண்டுபிடிக்கப்படவில்லை.
எனினும், ஒரு மின்னஞ்சல் மூலமாகவே ஊடக நிறுவனங்களின் இயல்பான செயற்பாடுகளை முடக்கக்கூடிய நிலை ஐரோப்பாவின் பாதுகாப்பு குறித்து புதிய கேள்விகளை எழுப்பியுள்ளது.
ஐரோப்பாவில் இத்தகைய பாதுகாப்பு அச்சுறுத்தல்களைத் தடுக்க அரசாங்கங்கள் இன்னும் கடுமையான நடவடிக்கைகளை எடுக்க வேண்டுமா?
உங்கள் கருத்து என்ன?
