வெர்சாய் (Versailles) நகரை வந்தடைந்தது ‘அவா’ (Awa): கிராண்ட் பாரிஸ் எக்ஸ்பிரஸ் (Grand Paris Express) தடம் 18-இன் (Ligne 18) சுரங்கப் பணிகள் முழுமையாக நிறைவு!
பாரிஸ் மற்றும் இல-து-பிரான்சு (Île-de-France) பிராந்தியத்தின் பொதுப் போக்குவரத்து வரலாற்றில் ஒரு மாபெரும் மைல்கல் எட்டப்பட்டுள்ளது. ‘கிராண்ட் பாரிஸ் எக்ஸ்பிரஸ்’ (Grand Paris Express) திட்டத்தின் மிக முக்கிய வழித்தடங்களில் ஒன்றான தடம் 18-க்கான (Ligne 18) சுரங்கப் பணிகள் வெற்றிகரமாக நிறைவடைந்துள்ளன.
இவ்லின் (Yvelines) மாவட்டத்தில் உள்ள வரலாற்றுச் சிறப்புமிக்க வெர்சாய் (Versailles) நகரை, ‘அவா’ (Awa) எனப் பெயரிடப்பட்ட பிரம்மாண்டமான சுரங்கக் குடையி (Tunnelier) வந்தடைந்ததன் மூலம் இந்தப் பணிகள் முழுமை பெற்றுள்ளன.
கடந்த 2024-ஆம் ஆண்டு ஜூன் மாதம் கியூயான்கோர்ட் (Guyancourt) நிலையத்திலிருந்து தனது பயணத்தைத் தொடங்கிய ‘அவா’ சுரங்கக் குடையி, நிலத்தடியில் சுமார் 6.8 கிலோமீட்டர் தூரத்தைக் குடைந்து சாதனை படைத்துள்ளது.
கடந்த 2025 ஜூன் மாதம் வெர்சாயின் சடோரி (Satory) பகுதியை வந்தடைந்த இந்த இயந்திரம், ஜூலை 15, 2026 அன்று ‘ஸ்டேட் டெஸ் சாண்டியர்ஸ்’ (Stade des Chantiers) கட்டுமானப் பகுதியில் தனது நீண்ட நெடிய குடையும் பணியை (Creusement) அதிகாரப்பூர்வமாக முடித்துக்கொண்டது எனப் பெருந்தி்ட்டங்களுக்கான நிறுவனம் (Société des Grands Projets) அறிவித்துள்ளது.
சுரங்கம் தோண்டும் கடினமான பணிகள் முடிவடைந்துவிட்ட நிலையில், தடம் 18-இன் மேற்குப் பகுதிக்கான (Tunnel Ouest) உள்கட்டமைப்பு மற்றும் தளவாடப் பணிகள் தற்போது தொடங்கவுள்ளன.
இனி இந்தச் சுரங்கத்திற்குள் தண்டவாளங்களைப் (Rails) பொருத்துவது, ஒளியிழைக் கம்பிகள் (Fibre optique) மற்றும் மின் வடங்களை (Câbles électriques) அமைப்பது, கண்காணிப்புக் கேமராக்களை நிறுவுவது போன்ற பணிகள் முழுவீச்சில் நடைபெறும். அதோடு, இந்தப் பாதையில் அமையவுள்ள தொடருந்து நிலையங்களுக்கான கட்டுமானப் பணிகளும் (Travaux de génie civil) வேகமெடுக்கவுள்ளன.
இந்த முழுமையான தடம் 18-ஐ உருவாக்க ‘அவா’ மட்டுமின்றி மேலும் இரண்டு பிரம்மாண்ட இயந்திரங்களும் இரவும் பகலுமாக உழைத்துள்ளன:
கரோலின் (Caroline): 2017 டிசம்பரில் மாசியிலிருந்து (Massy) புறப்பட்டு, 2023 ஜூன் மாதம் ஓர்லி விமான நிலையம் (Aéroport d’Orly) வரை 6.2 கிலோமீட்டர் தூரத்தைக் குடைந்தது.
செலின் (Céline): 2021 நவம்பரில் பலேசோவிலிருந்து (Palaiseau) புறப்பட்டு, 2023 அக்டோபரில் மாசி வரை 6 கிலோமீட்டர் தூரத்தைக் குடைந்தது.
அவா (Awa): 2024 ஜூனில் கியூயான்கோர்ட்டிலிருந்து புறப்பட்டு, இந்த ஜூலை 2026-இல் வெர்சாய் வரை 6.8 கிலோமீட்டர் தூரத்தைக் குடைந்து முடித்துள்ளது.
இந்த மாபெரும் திட்டத்தின் முதல் பகுதியாக, மாசி-பலேசோ (Massy-Palaiseau) முதல் கிறிஸ்ட் டி சாக்லே (Christ de Saclay) வரையிலான தடம், இந்த ஆண்டு (2026) இறுதிக்குள் மக்கள் பயன்பாட்டிற்கு (Mise en service) கொண்டுவரப்படும் என எதிர்பார்க்கப்படுகிறது. வழித்தடத்தின் எஞ்சிய பகுதிகள் 2030-ஆம் ஆண்டிற்குள்ளாகவே முழுமையாகச் செயல்படத் தொடங்கும்.
இந்தத் திட்டத்தின் மூலம், வெர்சாய் நகருக்குச் சடோரி (Satory) மற்றும் சாண்டியர்ஸ் (Chantiers) என இரண்டு புதிய, அதிநவீனத் தொடருந்து நிலையங்கள் கிடைக்கவுள்ளன என்பது இப்பகுதி மக்களிடையே பெருமகிழ்ச்சியை ஏற்படுத்தியுள்ளது. See less
