.”பிரான்ஸ் வெளிநாட்டவர்களால் ஆக்கிரமிக்கப்பட்டு வருகிறது!
நாங்கள் வெறுப்பைத் தூண்டவில்லை!” – பிரான்ஸ் அரசியலில் அனல் பறக்கும் மாரின் லு பென்னின் தேர்தல் பிரகடனமும், வெடிக்கும் சர்ச்சைகளும்!
பிரான்சின் ட்ராப்ஸ் (Trappes) நகரில் நடந்த கொடூரமான இனவெறித் தாக்குதலின் ஈரம் காய்வதற்குள், தீவிர வலதுசாரித் தலைவரான மாரின் லு பென் (Marine Le Pen) தனது முதல் தேர்தல் பிரச்சாரக் கூட்டத்தை ஆர்லியன்ஸ் (Orléans) நகரில் அதிரடியாகத் தொடங்கியுள்ளார்.
பிரான்ஸ் அரசியலில் பெரும் புயலைக் கிளப்பியிருக்கும் இந்தக் கூட்டமும், அதன் பின்னணியும் பரபரப்பான பேசுபொருளாகியுள்ளன.
ட்ராப் நகரில் கடந்த வெள்ளிக்கிழமை நடந்த இனவெறித் தாக்குதலில் ஒருவர் கொல்லப்பட்டு, 5 பேர் படுகாயமடைந்த சம்பவம் பிரான்ஸை உலுக்கியுள்ளது.
மாரின் லெ பென்னின் கட்சியான ‘தேசியப் பேரவை’யின் (RN – Rassemblement National) வெளிநாட்டவர் மற்றும் இஸ்லாமியர்களுக்கு எதிரான வெறுப்புப் பேச்சுக்களே இந்தத் தாக்குதலுக்குக் காரணம் என இடதுசாரிகள் கடந்த 48 மணி நேரமாகக் கொந்தளித்து வருகின்றனர்.
ஆனால், ஓர்லியன் நகரில் கூடிய 8,500 ஆதரவாளர்கள் மத்தியில் பேசிய லெ பென், தனது நிலைப்பாட்டில் இருந்து ஒரு அங்குலம் கூடப் பின்வாங்கவில்லை.
ட்ராப்ஸ் தாக்குதல் பற்றி ஒரு வார்த்தை கூடப் பேசாத அவர், அதைக் கட்சியின் தலைவர் ஜோர்டான் பார்டெல்லாவிடம் (Jordan Bardella) விட்டுவிட்டு,
வழக்கம் போல் “பிரான்ஸ் வெளிநாட்டவர்களால் ஆக்கிரமிக்கப்பட்டு வருகிறது” என்ற தனது பிரதான முழக்கத்தையே மீண்டும் கையில் எடுத்தார்.
தேர்தல் பிரச்சாரத்திற்கு ஓர்லியன் நகரை அவர் தேர்ந்தெடுத்ததில் ஒரு பெரிய அரசியல் தந்திரம் ஒளிந்திருக்கிறது.
1429-ல் ஆங்கிலேயர்களை விரட்டியடித்து ஓர்லியன்ஸை மீட்ட வீராங்கனை ஜோன் ஆர்க் (Jeanne d’Arc) போல, இன்றைய பிரான்ஸை வெளிநாட்டவரிடமிருந்து மீட்க வந்த வீராங்கனையாகத் தன்னை அவர் உருவகப்படுத்திக் கொண்டார்.
“வெளிநாட்டு அச்சுறுத்தலில் இருந்து இந்த நாட்டை மீட்பதற்கு முன்பு, ‘வெற்றி சாத்தியமில்லை’ என்ற முடக்கும் எண்ணத்தில்
இருந்து மக்களின் மனங்களை நாம் விடுவிக்க வேண்டும்,” என ஆவேசமாக முழங்கினார் மரின் லு பென்.
ஐரோப்பிய நிதியை முறைகேடாகப் பயன்படுத்திய வழக்கில் கடந்த ஜூலை மாதம் மேல்முறையீட்டில் கண்டனத்திற்கு உள்ளான லு பென்,
தனது பேச்சில் நேரடியாக இஸ்லாமியர்களையோ, ‘பெரும் இடமாற்றம்’ (Grand remplacement) என்ற வார்த்தையையோ பயன்படுத்தவில்லை. அதற்குப் பதிலாக, “கும்பல்கள் வந்து
நமது கட்டடங்களைச் சூறையாடுகின்றன”, “மதக் கோட்பாடுகளின் பெயரால் குடியரசு விதிகள் மீறப்படுகின்றன” போன்ற வார்த்தைகளைப் பயன்படுத்தினார். இதை யாருக்கு எதிராக அவர் சொல்கிறார் என்பதை அங்கு வந்திருந்த கூட்டம் நன்கு உணர்ந்திருந்தது.
“ஆர்.என் கட்சி வெறுப்பைத் தூண்டவில்லை” – ஆதரவாளர்களின் கொதிப்பு!
ட்ராப் தாக்குதலுக்கும் தங்கள் கட்சியின் கொள்கைகளுக்கும் எந்தத் தொடர்பும் இல்லை என லு பென்னின் ஆதரவாளர்கள் திட்டவட்டமாக மறுக்கின்றனர்.
டிலான் (21 வயது): “ஆர்.என் கட்சி வெறுப்பைத் தூண்டுகிறது என்பது சுத்தப் பொய். மாரின் லு பென்னின் பேச்சு தேசப்பற்றை அடிப்படையாகக் கொண்டது; அவர் பிரெஞ்சு சட்டங்களை மதிக்க வேண்டும் என்று மட்டுமே கூறுகிறார்.”
நதாலி (43 வயது, போர்ச்சுகீசிய அகதியின் மகள்): “மனநலம் குன்றியவர்கள் எல்லா இடங்களிலும் இருக்கிறார்கள். அவர்கள் செய்யும் வன்முறைகளுக்கு அரசியல்வாதிகள் பொறுப்பல்ல. எங்கள் கட்சி இஸ்லாமியத் தீவிரவாதத்தை மட்டுமே எதிர்க்கிறதே தவிர, இஸ்லாமியர்களை அல்ல.”
இசபெல் (56 வயது): “இடதுசாரிகள் வேண்டுமென்றே எங்கள் மீது அவதூறு பரப்புகிறார்கள். குடியரசின் சட்டங்களை மதிக்கும், பிரான்ஸை நேசிக்கும் இஸ்லாமியர்களை நாங்கள் எப்போதும் வரவேற்கிறோம்.”
பார்டெல்லாவின் பேச்சும், ‘மறுமலர்ச்சி’ வாக்குறுதியும்:
ட்ராப் துப்பாக்கிச் சூடு பற்றிப் பேசும் பொறுப்பை ஏற்ற கட்சியின் தலைவர் ஜோர்டான் பார்டெல்லா, அந்தச் சம்பவத்தை ஒரு நிமிடத்திற்கும் குறைவாகவே தொட்டுச் சென்றார்.
“ஒரு பயங்கரவாதி அப்பாவி மக்கள் மீது 12 வயது குழந்தை உட்பட பலரை நோக்கித் துப்பாக்கிச் சூடு நடத்தியுள்ளான். அவனுக்குக் கடுமையான தண்டனை வழங்கப்பட வேண்டும்”
என்று கூறிய அவர், அதை ஒரு ‘இனவெறித் தாக்குதல்’ என்று குறிப்பிடத் தவிர்த்துவிட்டார்.
மாறாக, லிமோஜஸ் (Limoges) நகரசபை எரிக்கப்பட்ட சம்பவத்தைப் பற்றி மிக உருக்கமாகப் பேசிய அவர், அதை நோட்ரே-டேம் (Notre-Dame) தேவாலய தீ விபத்தோடு ஒப்பிட்டுப் பேசி கூட்டத்தினரின் உணர்வுகளைத் தூண்டினார்.
இறுதியாக, தாங்கள் ஆட்சிக்கு வந்தால் பிரான்சில் மீண்டும் சட்டம் ஒழுங்கை நிலைநாட்டி, மக்களுக்கு நம்பிக்கையைத் தருவோம் என்று லு பென் உறுதியளித்தார்.
தனது தேர்தல் அறிக்கையின் முக்கியக் கருப்பொருளாக “பிரான்சின் மறுமலர்ச்சி” (Renaissance pour la France) என்பதை அவர் முன்வைத்தார்.
“இஸ்லாமியத் தீவிரவாதம்,” “தீவிர இடதுசாரிகளின் அராஜகம்,” மற்றும் “சுற்றுச்சூழல் வாதிகளின் தடைகள்” ஆகியவற்றைத் தற்காலத்தின் ‘இருண்ட காலங்கள்’ என்று வர்ணித்த அவர்,
இந்த இருளைப் போக்க பிரான்சுக்கு ஒரு பிரம்மாண்டமான மறுமலர்ச்சி தேவை என்று கூறி, தனது தேர்தல் களத்தை விறுவிறுப்பாகத் தொடங்கியுள்ளார்!
