பிரான்சின் ஏவியான் நகரில் நடைபெற்று வரும் ஜி7 நாடுகள் கூட்டமைப்பின் உச்சி மாநாட்டிற்கு இடையே, உக்ரைனிய அதிபர் வோலோடிமிர் ஜெலென்ஸ்கி மற்றும் அமெரிக்க ஜனாதிபதி டொனால்ட் டிரம்ப் ஆகியோர் மிக முக்கியமானதொரு சந்திப்பை நடத்தியுள்ளனர்.
இந்த உயர்மட்டப் பேச்சுவார்த்தையில் அமெரிக்க வெளியுறவுத்துறைச் செயலர் மார்கோ ரூபியோ மற்றும் உக்ரைனின் தேசிய பாதுகாப்பு மற்றும் பாதுகாப்புச் சபையின் செயலர் (மற்றும் பாதுகாப்பு அமைச்சர்) ருஸ்டெம் உமரோவ் ஆகியோரும் கலந்துகொண்டனர்.
உக்ரைன் மீதான ரஷ்யாவின் போர் நான்கு ஆண்டுகளைக் கடந்து நீடித்து வரும் சூழலில், இரு நாட்டுத் தலைவர்களின் இந்த நேருக்கு நேர் சந்திப்பு உலகரங்கில் பெரும் முக்கியத்துவம் பெற்றுள்ளது.
சந்திப்பிற்குப் பின் தனது உத்தியோகபூர்வ சமூக வலைத்தளப் பக்கத்தில் புகைப்படங்களைப் பகிர்ந்த உக்ரைனிய அதிபர் ஜெலென்ஸ்கி, “இரு நாடுகளின் நிலைப்பாடுகளையும் எப்போதும் ஒருங்கிணைப்பது மிக முக்கியமானது” என்று குறிப்பிட்டுள்ளார்.
மேலும், உக்ரைனின் வான் பாதுகாப்புத் திறனை வலுப்படுத்துவது மற்றும் ரஷ்யாவை போரை நிறுத்தச் செய்வதற்கான இராஜதந்திர நகர்வுகள் குறித்தும் இந்த சந்திப்பில் ஆலோசிக்கப்பட்டதாக அவர் தெரிவித்தார்.
இதற்கிடையே, செய்தியாளர்களிடம் பேசிய அமெரிக்க ஜனாதிபதி டொனால்ட் டிரம்ப், ஜெலென்ஸ்கியுடனான சந்திப்பு மிகவும் திருப்திகரமாக அமைந்ததாகக் குறிப்பிட்டதோடு, போர்க்களத்தில் இரு தரப்பிலும் எண்ணற்ற இளம் உயிர்கள் பலியாவதை சுட்டிக்காட்டி, “ரஷ்யா நிச்சயமாக ஓர் அமைதி உடன்படிக்கைக்கு வர வேண்டும்” என்று வலியுறுத்தியுள்ளார்
