கடந்த சில நாட்களாகக் குளிர்ந்த காற்றும் மழையுமாக இருந்த பிரான்சின் வானிலை, அடுத்த வாரம் மீண்டும் தலைகீழாக மாறப்போகிறது. ஆப்பிரிக்காவிலிருந்து வரும் வெப்பக் காற்றின் காரணமாக, அடுத்த சில நாட்களில் வெப்பநிலை சுமார் 10°C வரை உயர்ந்து, நாட்டின் பல பகுதிகளில் 36°C வரை சுட்டெரிக்கவுள்ளது.
கோடைகாலம் அதிகாரப்பூர்வமாகத் தொடங்குவதற்கு முன்பே வரும் இரண்டாவது பெரிய வெப்ப அலை (Vague de chaleur) இதுவாகும்.
திங்கள் மற்றும் செவ்வாய் (ஜூன் 15 – 16): படிப்படியான வெப்ப உயர்வு
திங்கட்கிழமை: நாடு முழுவதும் நல்ல வெயில் அடிக்கும். தென்பகுதிகளான போர்டோ (Bordeaux) மற்றும் பெர்பிக்னான் (Perpignan) ஆகிய இடங்களில் அதிகபட்சமாக 32°C வெப்பம் பதிவாகும். மோண்ட்பெல்லியே மற்றும் துலூஸ் பகுதிகளில் 31°C-ம், லியோனில் 27°C-ம் இருக்கும். பாரிஸ் (25°C), ராம்ஸ் (22°C) மற்றும் லில் (20°C) ஆகிய வடக்குப் பகுதிகளில் வெப்பம் சற்று இதமாகவே இருக்கும்.
செவ்வாய்க்கிழமை: வெயிலின் தாக்கம் தொடர்ந்து அதிகரிக்கும். நௌவெல்-அக்விடெய்ன் மற்றும் ஆக்சிதானி பகுதிகளில் 30°C வரையும், ஓவெர்ன்-ரோன்-ஆல்ப்ஸ் பகுதிகளில் 33°C வரையும் வெப்பம் உயரும். கேப் (Gap) பகுதியில் மட்டும் லேசான மழைக்கு வாய்ப்புள்ளது.
புதன் மற்றும் வியாழன் (ஜூன் 17 – 18): முதல் உச்சக்கட்ட வெப்பம்
புதன்கிழமை: பிரான்ஸ் முழுவதும் வானம் தெளிவாகக் காணப்படும். பாரிஸில் வெப்பநிலை 31°C ஆக உயரும். ஸ்ட்ராஸ்பேர்க் மற்றும் நாந்த் பகுதிகளில் 30°C-ம், பௌர்ஜஸ் மற்றும் லிமோஜஸில் 32°C-ம், சலோன்-சுர்-சோனில் 33°C-ம் வெப்பம் பதிவாகும்.
வியாழக்கிழமை (முதல் உச்சம்): இந்த வாரத்தின் முதல் அதிகபட்ச வெப்பம் வியாழக்கிழமை பதிவாகும். ஆக்செர் (Auxerre) நகரில் வெப்பம் 35°C-ஐத் தொடும். பாரிஸ், நாந்த் , லியோன் ஆகிய நகரங்கள் 34°C வெப்பத்தில் தகிக்கும். போர்டோவில் 33°C-ம், துலூஸில் 32°C-ம் இருக்கும். மேலும், இரவு நேரங்களிலும் வெப்பம் குறையாமல் குறைந்தபட்சமாக 20°C வெப்பம் நீடிக்கும் என ‘வானிலை பிரான்ஸ்’ (Météo France) எச்சரித்துள்ளது.
வெள்ளி மற்றும் வார இறுதி (ஜூன் 19 – 21): இசைத் திருவிழாவில் தகிக்கும் வெயில்!
வெள்ளிக்கிழமை: வியாழக்கிழமையைப் போலவே கடுமையான வெப்பம் நீடிக்கும். ஆனால், வடக்குப் பகுதிகளில் மட்டும் வெப்பத்துடன் சேர்த்து மழையும் பெய்யக்கூடும்.
வார இறுதி (கோடையின் தொடக்கம்): ஜூன் 20 மற்றும் 21 ஆகிய திக திகளில் கோடைகாலம் அதிகாரப்பூர்வமாகத் தொடங்குகிறது. இந்த நாட்களில் நாட்டின் பெரும்பகுதிகளில் வெப்பநிலை 30°C-ஐத் தாண்டும். பாரிஸில் வெப்பம் 35°C ஆக இருக்கும். வடக்குப் பகுதிகளில் மட்டும் கோடை மழையை எதிர்பார்க்கலாம்.
இசைத் திருவிழா (Fête de la musique – ஜூன் 21): இசைத் திருவிழா கொண்டாடப்படும் ஞாயிற்றுக்கிழமையன்று, இந்த வாரத்தின் புதிய உச்சக்கட்ட வெப்பம் பதிவாகும்.
ஆக்செர், லிமோஜஸ் மற்றும் சலோன்-சுர்-சோன் ஆகிய நகரங்களில் மக்கள் 36°C வெப்பத்தில் மூச்சுத்திணற நேரிடும். பாரிஸ், டூர்ஸ், விச்சி, லியோன் போன்ற முக்கிய நகரங்களிலும் வெப்பநிலை ஏறக்குறைய 36°C-ஐ நெருங்கும் என வானிலை ஆய்வாளர்கள் தெரிவித்துள்ளனர்.
கடுமையான வெப்பம் நிலவ உள்ளதால், மக்கள் போதிய அளவு தண்ணீர் குடிக்கவும், வெயிலின் தாக்கத்திலிருந்து தங்களைக் பாதுகாத்துக்கொள்ளவும் அறிவுறுத்தப்படுகிறார்கள்
