அமெரிக்கப் படைகள் தீவிரம்: போர்நிறுத்த இடைவெளியில் பலப்படுத்தப்படும் ஆயுதக் கிடங்குகள்!
மத்திய கிழக்கில் தற்போது நிலவும் தற்காலிகப் போர்நிறுத்தக் காலத்தைப் பயன்படுத்தி, அமெரிக்கப் படைகள் தங்களை மீண்டும் பலப்படுத்தி வருவதாக அமெரிக்க மத்திய கட்டளையகத்தின் (CENTCOM) தளபதி அட்மிரல் பிராட் கூப்பர் தெரிவித்துள்ளார்.
வியாழக்கிழமை நடைபெற்ற ஊடகவியலாளர் சந்திப்பில் பேசிய அவர், இந்தப் போர்நிறுத்த இடைவேளையில் அமெரிக்க துருப்புக்கள் ஆயுதங்களை மீள்சேகரிப்பதிலும், போர்க்கருவிகளைச் சீரமைப்பதிலும், போர்த் தந்திரங்களை மாற்றி அமைப்பதிலும் தீவிரமாக ஈடுபட்டுள்ளதாகக் குறிப்பிட்டுள்ளார்.
சமீபத்தில் இப்பிராந்தியத்திற்கு மேற்கொண்ட பயணங்களின் அடிப்படையில், அமெரிக்க வீரர்கள் மிகுந்த உத்வேகத்துடன் இருப்பதாக அட்மிரல் கூப்பர் பெருமிதம் தெரிவித்துள்ளார்.
மாறிவரும் சூழலுக்கு ஏற்ப தங்களை விரைவாகத் தகவமைத்துக் கொள்வதில் அமெரிக்க இராணுவம் உலகில் நிகரற்றது என்றும், அதனைத் தான் தற்போது களத்தில் நேரடியாகக் காண்பதாகவும் அவர் குறிப்பிட்டுள்ளார்.
இந்தப் பலப்படுத்தல் நடவடிக்கைகள், ஒருவேளை பேச்சுவார்த்தைகள் தோல்வியடைந்து போர் மீண்டும் தொடங்கும் பட்சத்தில், அமெரிக்காவின் பலத்தைத் தீர்மானிக்கும் காரணியாக அமையும் எனக் கருதப்படுகிறது.
