CNews தொலைக்காட்சியைத் தடை செய்யக் கோரும் இணைய மனுவில் 5 லட்சத்தை நெருங்கும் கையெழுத்துகள்!
பிரான்சின் வலதுசாரி கோடீஸ்வரர் வின்சென்ட் பொலோரேவுக்குச் (Vincent Bolloré) சொந்தமான CNews செய்தித் தொலைக்காட்சியைப் பிரெஞ்சு அலைவரிசையிலிருந்து முற்றிலும் “நீக்க வேண்டும்” என வலியுறுத்தி, தேசியச் சட்டமன்ற இணையதளத்தில் தாக்கல் செய்யப்பட்ட மனுவில் கையெழுத்திட்டவர்களின் எண்ணிக்கை 4,20,000-ஐத் தாண்டி 5 லட்சத்தை விரைவாக நெருங்கி வருகிறது.
லூகாஸ் மாசோனி (Lucas Massoni) என்பவரால் கடந்த ஜூன் மாதம் தொடங்கப்பட்ட இந்த மனு, அக்டோபர் 23 அன்று ‘ட்ராப்’ (Trappes) நகரில் நடைபெற்ற இனவெறித் தாக்குதலைத் தொடர்ந்து சமூக வலைத்தளங்களில் தீவிரமாகப் பரப்பப்பட்டு வருகிறது.
மனுவில் சுட்டிக்காட்டப்பட்டுள்ள முக்கியக் குற்றச்சாட்டுகள்:
ஒழுங்குமுறை ஆணையத்தின் அபராதங்கள்: CNews தொலைக்காட்சி 2019 முதல் பிரெஞ்சு ஊடக ஒழுங்குமுறை ஆணையத்திடமிருந்து (Arcom) 27 முறை எச்சரிக்கைகளையும், மொத்தம் 6,30,000 யூரோ அபராதங்களையும் பெற்றுள்ளதை மனு நினைவுபடுத்துகிறது.
இனவெறி மற்றும் வெறுப்புப் பேச்சு: கருப்பின மக்கள், சிறுபான்மையினர் மற்றும் புலம்பெயர்ந்த சிறுவர்களுக்கு எதிராகத் தொடர்ச்சியாக மேற்கொள்ளப்பட்ட அவதூறு விவாதங்களைச் சுட்டிக்காட்டும் மனு, CNews தொலைக்காட்சியை ஒரு “பிரச்சார இயந்திரம்” எனக் கடுமையாகச் சாடியுள்ளது.
அலைவரிசை ரத்து கோரிக்கை: “பொது அலைவரிசை என்பது தகுதிக்குரியது, அதை மாசுபடுத்தக் கூடாது” எனக் குறிப்பிட்டுள்ள மனுதாரர்கள், தொடர் விதிமீறல்களில் ஈடுபடும் தொலைக்காட்சிகளின் ‘TNT’ உரிமத்தை ஒருதலைப்பட்சமாக ரத்து செய்ய Arcom ஆணையத்திற்கு அதிகாரமுள்ளது என்பதைச் சுட்டிக்காட்டியுள்ளனர்.
அரசியல் தலைவர்களின் கொந்தளிப்பு:
ட்ராப் நகர முதல்வர் அலி ராபே (Ali Rabeh) மற்றும் LFI நாடாளுமன்ற உறுப்பினர் தோமா போர்த் (Thomas Portes) ஆகியோர், “முஸ்லிம்களுக்கு எதிராக வெறுப்பைத் தூண்டி ஆபத்தை விளைவிப்பதில் CNews தொலைக்காட்சிக்கு முக்கியப் பங்குண்டு” எனக் குற்றம் சாட்டியுள்ளனர்.
தேசியச் சட்டமன்ற விதிகளின்படி, இந்த மனுவில் கையெழுத்திடுபவர்களின் எண்ணிக்கை 5 லட்சத்தைக் கடக்கும் பட்சத்தில், இது குறித்து நாடாளுமன்றப் பொதுக் கூட்டத்தில் விவாதிப்பது தொடர்பாகச் சட்டமன்றத் தலைவர்கள் குழு தீர்மானிக்கும் என்பது குறிப்பிடத்தக்கது.
