பிரான்ஸை உலுக்கும் வறட்சி! – 66 சதவீத நிலத்தடி நீர்மட்டம் ஆபத்தான நிலைக்குச் சரிவு என எச்சரிக்கை
பிரான்ஸில் தொடர்ச்சியாக நிலவி வரும் கடும் வறட்சி காரணமாக, நாட்டின் நிலத்தடி நீர்மட்டத்தில் மூன்றில் இரண்டு பங்கு பகுதிகள் இயல்பான அளவை விடக் மிகக் குறைந்த மட்டத்திலேயே காணப்படுவதாக அதிர்ச்சித் தகவல்கள் வெளியாகியுள்ளன.
பிரான்ஸ் தேசிய புவியியல் ஆய்வு மையமான BRGM வெளியிட்டுள்ள மாதாந்த மதிப்பீட்டு அறிக்கையில், நிலத்தடி நீர் இருப்பு தொடர்பான தற்போதைய தரவுகள் மிகவும் கவலையளிக்கும் வகையில் அமைந்துள்ளதாகக் குறிப்பிடப்பட்டுள்ளது.
ஒக்டோபர் 8ஆம் திகதி வெளியிடப்பட்ட இந்த உத்தியோகபூர்வ அறிக்கையானது, செப்டம்பர் 30 வரையிலான நிலத்தடி நீர்மட்டத் தரவுகளை அடிப்படையாகக் கொண்டு தயாரிக்கப்பட்டுள்ளது.
இதன் தரவுகளின்படி, பிரான்ஸ் முழுவதும் கண்காணிக்கப்படும் நிலத்தடி நீர்நிலைகளில் சரியாக 66 சதவீதமானவை வழக்கமான சராசரி அளவை விடக் குறைவாகவே பதிவு செய்யப்பட்டுள்ளன.
கடந்த 2025ஆம் ஆண்டு அக்டோபர் மாத தொடக்கத்தில் இந்நிலைமை 31 சதவீதமாக மட்டுமே காணப்பட்ட நிலையில், தற்போது வறட்சியின் தாக்கம் இருமடங்காக அதிகரித்துள்ளது.
கடைசியாகக் கடந்த கோடை காலத்தில் வீசிய தீவிரமான வெப்ப அலைகள் மற்றும் மழையின்மை காரணமாகவே இந்நிலை தோன்றியுள்ளது.
குறிப்பாக, செப்டம்பர் மாதத்தில் பெய்ய வேண்டிய இயல்பான மழை வீழ்ச்சியில் 70 சதவீத வீழ்ச்சி பதிவாகியிருந்தது. அத்துடன், கோடைக் காலத்தில்
அதிகரித்த நீர் நுகர்வு மற்றும் தொடர்ச்சியான வறட்சி நிலைமைகள் காரணமாக நிலத்தடி நீர் நிலைகள் வேகமாக வற்றி வருகின்றன.
தற்போதைய கணக்கெடுப்புகளின்படி, நாட்டின் 81 சதவீதமான கண்காணிப்பு மையங்களில் நீர்மட்டம் தொடர்ந்து சரிவடைந்து கொண்டே செல்வது கண்டறியப்பட்டுள்ளது.
வெறும் 7 சதவீதமான இடங்களில் மட்டுமே நிலத்தடி நீர் மீண்டும் நிரம்பும் செயல்முறை அரைகுறையாகத் தொடங்கியுள்ளது. பிரான்சின் கிழக்கு மற்றும் மத்திய பிராந்தியங்களில் உள்ள பல நிலத்தடி நீர்நிலைகள் ஆபத்தான நிலையை எட்டியுள்ளதாக ஆய்வாளர்கள் எச்சரிக்கின்றனர்.
சமீப நாட்களாகப் பிரான்சின் சில பகுதிகளில் பலத்த மழை மற்றும் கனமழை புயல்கள் வீசி வந்தபோதிலும்,
அவை நிலத்தடி நீர்மட்டத்தை உயர்த்தப் போதுமானதாக இல்லை எனத் தெரிவிக்கப்பட்டுள்ளது. அதிவேகமாகப் பெய்யும் புயல் மழை மண்ணுக்குள் ஊடுருவாமல்,
வெள்ளப் பெருக்காக ஓடி வீணாவதே இதற்குக் காரணம் ஆகும். நிலத்தடி நீர்நிலைகள் மீள நிரம்புவதற்கு மிதமான மற்றும் தொடர்ச்சியான மழைப்பொழிவே தற்போதைய தேவையாக உள்ளது.
எதிர்வரும் குளிர்காலத்திற்குள் நிலத்தடி நீர் இருப்பு சீரடையாவிட்டால், அடுத்த கோடைக் காலத்தில் மிக மோசமான நீர் நெருக்கடி ஏற்படக்கூடும் என அஞ்சப்படுகிறது.
இதன் காரணமாக, பிரெஞ்சு அரசு பல்வேறு பிராந்தியங்களில் குடிநீர் மற்றும் நுகர்வு நீர் பயன்பாட்டிற்கு விதிக்கப்பட்டுள்ள கடுமையான கட்டுப்பாடுகளைத் தொடர்ந்து அமலில் வைத்துள்ளதோடு, பொதுமக்களையும் சிக்கனமாக நீரைப் பயன்படுத்துமாறு கேட்டுக்கொண்டுள்ளது.
