பங்குச்சந்தைகளில் பேரதிர்ச்சி: குறைக்கடத்தி நிறுவனங்களுக்குக் கடும் அடி – செயற்கை நுண்ணறிவுச் சந்தையில் என்ன நடக்கிறது?

உலகளாவிய பங்குச்சந்தைகளில் (Marchés boursiers) பெரும் வீழ்ச்சி ஏற்பட்டுள்ளது. குறிப்பாக, செயற்கை நுண்ணறிவு (IA – Intelligence Artificielle) வளர்ச்சியால் உச்சத்திலிருந்த குறைக்கடத்தி (Semi-conducteurs) மற்றும் நுண்சில்லுகள் (Puces) உற்பத்தி நிறுவனங்களின் பங்குகள் தற்போது கடுமையாகச் சரிந்துள்ளன.

இந்தத் திடீர் வீழ்ச்சிக்கான காரணங்களும் உலகளாவிய சந்தைகளின் நிலவரமும் என்னவென்று விரிவாகப் பார்ப்போம்.

தென்கொரியப் பங்குச்சந்தையான ‘கோஸ்பி’ (Kospi) குறியீடு ஏப்ரல் மாதத்திற்குப் பிறகான தனது மாபெரும் வீழ்ச்சியைப் பதிவு செய்துள்ளது. முன்னணி நிறுவனங்களான சாம்சங் எலெக்ட்ரானிக்ஸ் (Samsung Electronics) மற்றும் எஸ்.கே ஹைனிக்ஸ் (SK Hynix) பங்குகளின் கடும் சரிவால், அங்கு வர்த்தகம் (Échanges) தற்காலிகமாக நிறுத்தப்படும் சூழல் உருவானது. நேற்றைய இரவு நேர வர்த்தக முடிவில், கோஸ்பி 10.5 சதவீதம் சரிந்து 6,051.19 புள்ளிகளாக வீழ்ந்தது.

சாம்சங் பங்குகள் 12 சதவீதமும், எஸ்.கே ஹைனிக்ஸ் பங்குகள் 12.7 சதவீதமும் சரிவைக் கண்டுள்ளன.

சீனாவின் அசுர வளர்ச்சியும் முதலீட்டாளர்களின் அச்சமும் செயற்கை நுண்ணறிவுத் துறையில் கோடிகளில் லாபம் ஈட்டிய சர்வதேச நிறுவனங்களின் பங்குகள் தற்போது ஆட்டம் காண முக்கியக் காரணம், சீனப் புத்தாக்க நிறுவனங்கள் (Start-up) மற்றும் சீன நுண்சில்லு உற்பத்தியாளர்களின் கடுமையான போட்டியே ஆகும்.

இதற்கு மிகச் சிறந்த உதாரணமாக, சீன நுண்சில்லு நிறுவனமான சி.எக்ஸ்.எம்.டி (CXMT) தனது முதல் நாள் வர்த்தகத்திலேயே 466 சதவீதம் லாபத்தை ஈட்டி முதலீட்டாளர்களைப் பிரமிக்க வைத்துள்ளது.

தொழில்நுட்ப நிறுவனங்களுக்கான ஷாங்காயின் ‘ஸ்டார் மார்க்கெட்’ (STAR Market) பங்குச்சந்தையில் இந்நிறுவனம் சுமார் 8.6 பில்லியன் டொலர்களை (சுமார் 7.6 பில்லியன் யூரோக்கள்) திரட்டியுள்ளது உலக அரங்கில் பெரும் அதிர்வலையை ஏற்படுத்தியுள்ளது.

தென்கொரியாவைத் தொடர்ந்து ஆசியாவின் பிற பங்குச்சந்தைகளிலும் சரிவு எதிரொலித்தது:

டோக்கியோவின் நிக்கெய் 225 (Nikkei 225): 4% சரிந்து 62,350.18 புள்ளிகள்.

தைவானின் டாயெக்ஸ் (Taiex): 3.9% சரிவு.

ஷாங்காய் கலவைக் குறியீடு (Shanghai): 1% சரிந்து 3,820.52 புள்ளிகள்.

ஹாங்காங்கின் ஹாங் செங் (Hang Seng): 0.1% லேசான சரிவு.

இந்த ஆசிய வீழ்ச்சிகளுக்கு மத்தியில், ஒஸ்ரேலியப் பங்குச்சந்தை (S&P/ASX 200) மட்டும் விதிவிலக்காக 0.6 சதவீதம் ஏற்றம் கண்டு 8,944.40 புள்ளிகளில் முடிவடைந்தது.

பங்குச்சந்தைகள் ஒருபுறமிருக்க, கச்சா எண்ணெய் விலையும் தொடர்ந்து சரிந்து வருகிறது. அமெரிக்கா மற்றும் ஈரான் இடையே கடந்த மூன்று நாட்களாகத் தாக்குதல்கள் ஏதுமில்லாததாலும், மத்திய கிழக்கு நாடுகளின் சமரச முயற்சிகளால் பேச்சுவார்த்தைக்கான சாத்தியக்கூறுகள் உருவாகியுள்ளதாலும் இந்த விலைத்தளர்வு ஏற்பட்டுள்ளது.

சர்வதேச அளவீடான பிரென்ட் (Brent) கச்சா எண்ணெய் 0.8% சரிந்து பீப்பாய் 85.16 டொலர்களாகவும், அமெரிக்க அளவீடான டபிள்யூ.டி.ஐ (WTI) 0.9% சரிந்து 81.86 டொலர்களாகவும் உள்ளன.

அமெரிக்காவின் வால் ஸ்ட்ரீட் (Wall Street) பங்குச்சந்தையில் கலவையான நிலையே காணப்பட்டது. எஸ் அண்ட் பி 500 (S&P 500) 0.1 சதவீதத்திற்கும் குறைவான ஏற்றத்தையும், டவ் ஜோன்ஸ் (Dow Jones) 0.5 சதவீத ஏற்றத்தையும் கண்டன.

ஆனால், தொழில்நுட்ப நிறுவனங்கள் நிறைந்த நாஸ்டாக் (Nasdaq) குறியீடு 0.2 சதவீதம் சரிந்து, தொடர்ந்து நான்காவது நாளாகத் தனது வீழ்ச்சியைப் பதிவு செய்துள்ளது.