அதிவேக’ ஆடைகளில் (Mode ultra-jetable) ஒளிந்திருக்கும் மரண ஆபத்து: நாம் அணியும் 69 சதவீத இணையவழி ஆடைகளில் உயிர்க்கொல்லி நச்சு இரசாயனங்கள்!
இன்றைய நவீன உலகில், மலிவு விலை என்ற மாயையில் சிக்கி, இணையவழியில் நாள்தோறும் குவியும் ஆடைகள் நமது ஆரோக்கியத்திற்கு வைக்கப்பட்ட மாபெரும் வெடிகுண்டுகள் என்பது உங்களுக்குத் தெரியுமா? ‘ஷீன்’ (SHEIN), ‘டெமு’ (Temu) போன்ற ‘அதிவேக ஆடை’ (Ultra-fast fashion) விற்பனை ஜாம்பவான்கள் மூலம் ஐரோப்பாவிற்குள் நுழையும் ஆடைகளில் 69 சதவீதமானவை மனித உயிருக்கு உலைவைக்கும் நச்சு இரசாயனங்களைக் (Substances chimiques toxiques) கொண்டுள்ளன என்ற அதிர்ச்சியூட்டும் தகவல் தற்போது அம்பலமாகியுள்ளது.
பொதுமக்களின் சுகாதாரத்தைக் காக்க, ஐரோப்பிய ஒன்றியம் இந்த நிறுவனங்கள் மீது புதிய இறக்குமதி வரியையும், கடுமையான கண்காணிப்பு விதிகளையும் பாய்ச்சத் தொடங்கியுள்ளது.
ஐரோப்பிய ஒன்றியம் ஒவ்வொரு ஆண்டும் சுமார் 4.5 மில்லியன் டன் எடையுள்ள இத்தகைய துரித ஆடைகளை இறக்குமதி செய்கிறது. நாள்தோறும் 5.8 மில்லியன் மலிவு விலைப் பொதிகள் (Colis) ஐரோப்பிய எல்லைக்குள் நுழைகின்றன.
மாதந்தோறும் 40 கோடிக்கும் அதிகமான வாடிக்கையாளர்களைத் தன்பால் ஈர்க்கும் இந்த நிறுவனங்கள் விற்கும் ஆடைகளில் 90 சதவீதமானவை, பாலியஸ்டர், நைலான் போன்ற மலிவான செயற்கைப் பாலிமர்களால் (Polymères synthétiques) தயாரிக்கப்பட்டவை.
சுருக்கமாகச் சொல்வதானால், நாம் உடுத்துவது ஆடைகள் அல்ல; மக்கிப்போகாத, காலப்போக்கில் நுண்-பிளாஸ்டிக்குகளாக (Microplastiques) மாறும் மென்மையான பிளாஸ்டிக் உறைகளையே!
இதுவரை, இத்தகைய தயாரிப்புகள் வெளிநாடுகளில் உள்ள தொழிற்சாலைகளிலிருந்து நேரடியாக வாடிக்கையாளர்களுக்கு அனுப்பி வைக்கப்பட்டதால், ஐரோப்பிய ஒன்றியத்தின் இரசாயனப் பரிசோதனைகளிலிருந்து மிக எளிதாகத் தப்பி வந்தன.
ஆனால், புதிய ஐரோப்பியச் சுங்க விதியின்படி (Directive douanière européenne), உள்ளே நுழையும் ஒவ்வொரு பொதிக்கும் மின்னணுத் தடம் (Suivi électronique) கட்டாயமாக்கப்பட்டுள்ளது. இதன் மூலம், அனுமதிக்கப்பட்ட அளவை விட அதிக இரசாயனங்கள் உள்ள ஆடைகளை எல்லையிலேயே (Autorités frontalières) தடுத்து நிறுத்த முடியும்.
ஐரோப்பிய நுகர்வோர் அமைப்பின் (BEUC) நிபுணர் பெல்லே மூஸ் (Pelle Moos) இது குறித்துக் கூறுகையில், “ஒவ்வொரு வினாடியும் சுமார் 200 தயாரிப்புகள் ஐரோப்பாவிற்குள் நுழைகின்றன. இதில் மிகச் சிறிய அளவிலானவை மட்டுமே பரிசோதிக்கப்படுகின்றன. இந்த மலிவு விலை ஆடைகளில் சுமார் 70 முதல் 80 சதவீதம் வரை பாதுகாப்பு விதிமுறைகள் அப்பட்டமாக மீறப்பட்டுள்ளன (Taux de non-conformité),” என மிகுந்த வேதனையுடன் சுட்டிக்காட்டுகிறார்.
நாம் அணியும் ஆடைகளில் உள்ள ஆபத்து நமது உடலுக்குள் எப்படிச் செல்கிறது என்பது அதைவிடப் பயங்கரமானது. நமது உடல் வெப்பமும், வியர்வையும் (Sueur) ஒரு இயற்கையான கரைப்பானாகச் செயல்பட்டு, ஆடைகளில் உள்ள நச்சு இரசாயனங்களை நேரடியாக நமது தோலின் வழியாக உடலுக்குள் கடத்துகின்றன.
குழந்தைகள் தங்களின் ஆடைகளைக் கடிக்கும்போது இது இன்னும் அபாயகரமாக மாறுகிறது. ஐரோப்பிய ஒன்றியத்திற்கு வரும் விழிப்பூட்டல்களில் 72 சதவீதமானவை, கடுமையான ஒவ்வாமை (Réactions allergiques), இரசாயனத் தீக்காயங்கள் மற்றும் உள்ளுறுப்பு பாதிப்புகளை ஏற்படுத்துவதாக எச்சரிக்கின்றன.
இந்த ஆடைகளிலும் அணிகலன்களிலும் பலவிதமான ஆபத்தான வேதிப்பொருட்கள் மறைந்துள்ளன:
தாலேட்டுகள் (Phtalates): பிளாஸ்டிக்கை மென்மையாக்கப் பயன்படும் இவை, ஹார்மோன் குறைபாடுகளையும், கருத்தரிப்புச் சிக்கல்களையும் ஏற்படுத்துகின்றன.
என்றென்றும் அழியாத நச்சுகள் (PFAS – Polluants éternels): ஆடைகளை நீர் புகாதவாறு (Imperméables) மாற்றப் பயன்படும் இவை, மனித உடலுக்குள் தங்கி நோய் எதிர்ப்புச் சக்தியை அழிப்பதுடன், புற்றுநோயையும் தூண்டுகின்றன.
ஃபார்மால்டிஹைட் (Formaldéhyde): ஆடைகள் சுருங்காமல் இருக்கப் பயன்படும் இது, நீண்ட காலத் தொடர்பால் புற்றுநோயை உருவாக்கும் அபாயம் கொண்டது.
கன உலோகங்கள் (Métaux lourds): மலிவான நகைகள் மற்றும் ஆடைகளில் எடையைக் கூட்ட ஈயம் (Plomb) மற்றும் காட்மியம் (Cadmium) பயன்படுத்தப்படுகின்றன. இதில் ஈயம் என்பது மூளை வளர்ச்சியைக் கடுமையாகப் பாதிக்கும் கொடிய நரம்பு நச்சாகும் (Neurotoxine).
‘கிரீன்பீஸ்’ (Greenpeace) அமைப்பின் 2025-ஆம் ஆண்டின் ஆய்வறிக்கைப்படி, பரிசோதிக்கப்பட்ட ‘ஷீன்’ நிறுவனத் தயாரிப்புகளில் 32 சதவீதம் ஐரோப்பிய இரசாயனப் பாதுகாப்பு வரம்புகளை (REACH) மீறியிருந்தன. சில ஆடைகளில் அனுமதிக்கப்பட்ட அளவை விட 200 மடங்கு அதிக நச்சுகள் இருந்தன.
எல்லாவற்றிற்கும் மேலாக, ‘டெஸ்டாசாட்’ (Testachats) என்ற அமைப்பு பரிசோதித்த 45 குழந்தைகளுக்கான பொம்மைகளில் 60 சதவீதமானவை முழுமையான பாதுகாப்பு அச்சுறுத்தல்களைக் கொண்டிருந்தன; அதில் ஒரே ஒரு பொம்மை மட்டுமே முழுமையாகப் பாதுகாப்பு விதிகளைப் பின்பற்றியிருந்தது என்பது பெருத்த அவலமாகும்.
மலிவு விலை என்ற வலையில் விழுந்து, நாமும் நமது குழந்தைகளும் நாள்பட்ட கொடிய நோய்களை விலை கொடுத்து வாங்கிக் கொண்டிருக்கிறோம் என்பதே இந்த ஆய்வுகள் நமக்கு உணர்த்தும் கசப்பான உண்மையாகும்.
