பாரிஸ் PSG அணியின் வெற்றிப் பேரணி: கலவரக்காரர்களை வீட்டை விட்டு வெளியேற்ற ஃபிரான்கோன்வில் நகர முதல்வர் அதிரடி!
பாரிஸ் செயின்ட்-ஜெர்மைன் அணி ஐரோப்பிய சாம்பியன்ஸ் லீக் கோப்பையை வென்றதைத் தொடர்ந்து பிரான்சின் பல பகுதிகளில் வன்முறை வெடித்தது. குறிப்பாக, வால்-து-வாஸ் (Val-d’Oise) மாவட்டத்தில் உள்ள ஃபிரான்கோன்வில் (Franconville) நகரில் அரங்கேறிய கலவரங்களுக்கு முற்றுப்புள்ளி வைக்கும் வகையில், குற்றவாளிகளுக்கு அபராதம் விதிப்பதுடன் அவர்களை வீடுகளிலிருந்து வெளியேற்றும் கடுமையான நடவடிக்கைகளை நகர நிர்வாகம் கையில் எடுத்துள்ளது.
காவல்துறையினர் மீது தாக்குதல் மற்றும் அதிருப்தி
ஹங்கேரியின் தலைநகரான புடாபெஸ்டில் நடந்த இறுதிப் போட்டியில் ஆர்சனல் அணியை வீழ்த்திப் பாரிஸ் அணி சாம்பியன் பட்டம் வென்றது. இந்த வெற்றியைக் கொண்டாடும் சாக்கில், ஃபிரான்கோன்வில் நகரில் பல இளைஞர்கள் காவல் துறையினர் மீது பெட்ரோல் குண்டுகள் மற்றும் கற்களை வீசித் கொடூரத் தாக்குதலில் ஈடுபட்டனர். நகரக் கண்காணிப்புக் கேமராக்கள் மூலம், வெறும் நாற்பது நிமிடங்களில் மூன்று குற்றச் செயல்களில் ஈடுபட்ட பதினான்கு வயதுச் சிறுவன் ஒருவன் கைது செய்யப்பட்டான். ஆனால், அவன் உடனடியாக விடுவிக்கப்பட்டதைச் சுட்டிக்காட்டியுள்ள நகர முதல்வர் சேவியர் மெல்கி (Xavier Melki), இது முற்றிலும் ஏற்றுக்கொள்ள முடியாத ஒரு முடிவு எனத் தனது கடும் கண்டனத்தைப் பதிவு செய்துள்ளார்.
அபராதம் மற்றும் வீட்டை விட்டு வெளியேற்றும் நடவடிக்கை
வன்முறையாளர்களைச் சட்டத்தின் பிடியிலிருந்து தப்ப விடப்போவதில்லை என நகர முதல்வர் சேவியர் மெல்கி திட்டவட்டமாக அறிவித்துள்ளார். பொதுச் சொத்துக்களுக்கோ அல்லது நகரத்தின் கட்டமைப்புக்கோ சேதம் விளைவித்த ஒவ்வொரு நபருக்கும், அதற்கான இழப்பீட்டுத் தொகையைச் செலுத்துவதற்கான ரசீது நேரடியாக அனுப்பப்படும். ஒருவேளை குற்றவாளி சிறுவனாக இருந்தால், அந்த முழு அபராதத் தொகையையும் அவனது பெற்றோர்கள் செலுத்த வேண்டும் என உத்தரவிடப்பட்டுள்ளது. இது தவிர ஒவ்வொரு குற்றச் செயலுக்கும் நகர நிர்வாகம் சார்பில் அதிகாரப்பூர்வமாகப் புகார் அளிக்கப்படும்.
மேலும், வன்முறையில் ஈடுபட்டவர்கள் அரசு மானியத்துடனான சமூகக் குடியிருப்புகளில் (Logement social) வசிப்பவர்களாக இருந்தால், அவர்களை உடனடியாக வீட்டை விட்டு வெளியேற்றுவதற்கான சட்டரீதியான நடவடிக்கைகள் வீட்டு நிர்வாகம் மூலம் எடுக்கப்படும். தனியார் குடியிருப்புகளில் வசிப்பவர்களுக்கும் இதே கடுமையான நடைமுறை பின்பற்றப்படும் என நகர முதல்வர் எச்சரித்துள்ளார். ஒரு வீட்டில் வாடகைக்கு வசிப்பவர்கள் தங்களது சுற்றுப்புறத்தில் அமைதியைப் பேண வேண்டியது அடிப்படைச் சட்டம் என்பதை அவர் தனது முகநூல் அறிக்கையில் சுட்டிக்காட்டியுள்ளார்.
நாடு முழுவதும் தொடரும் கைது நடவடிக்கைகள்
பிரான்ஸ் உள்துறை அமைச்சர் லாரன்ட் நுனெஸ் (Laurent Nuñez) வெளியிட்டுள்ள சமீபத்திய தரவுகளின்படி, நாடு முழுவதும் இத்தகைய வன்முறைச் சம்பவங்களில் ஈடுபட்ட 780 நபர்கள் இதுவரை கைது செய்யப்பட்டுள்ளனர். இவர்களில் 457 பேர் தீவிரத் தடுப்புக்காவலில் வைக்கப்பட்டுள்ளனர். இது கடந்த ஆண்டை ஒப்பிடுகையில் 32 சதவீதம் அதிகமாகும். கலவரத்தின் வடுக்கள் இன்னும் மறையாத நிலையில், தலைநகர் பாரிஸின் பல முக்கிய வீதிகளில் வன்முறையாளர்கள் அடித்து நொறுக்கிய பொருட்களையும் குப்பைகளையும் அகற்றும் பணியில் தூய்மைப் பணியாளர்கள் தற்போது முழுவீச்சில் ஈடுபட்டுள்ளனர்.
