“பிரம்மாண்டமான விமானப்படை.. 118 பில்லியன் டாலர் பட்ஜெட்!” –
இஸ்ரேல் பிரதமர் நெதன்யாகு அதிரடி!
மே 3: “அமெரிக்காவிடம் இருந்து புதிய போர் விமானங்கள் கொள்முதல்!”
“எதிர்காலத்தில் வெளிநாட்டு ஆயுதங்களைச் சார்ந்திருக்க மாட்டோம்! – சொந்தமாகப் போர் விமானங்களைத் தயாரிக்கப் போவதாக இஸ்ரேல் அறிவிப்பு!”
இஸ்ரேலின் வான்வழி ஆதிக்கத்தை மேலும் வலுப்படுத்தும் வகையில், அமெரிக்காவிடம் இருந்து ‘F-35I ஸ்டெல்த்’ (stealth) மற்றும் ‘F-15IA’ ஆகிய இரண்டு புதிய அதிநவீனப் போர் விமானப் படைப்பிரிவுகளை வாங்க உள்ளதாக இஸ்ரேலியப் பாதுகாப்புத்துறை ஞாயிற்றுக்கிழமை காலை அதிகாரப்பூர்வமாக அறிவித்துள்ளது.
வெளிநாட்டு ஆயுத உற்பத்தியாளர்களைச் சார்ந்திருப்பதைக் குறைக்கும் நோக்கில், அடுத்த பத்தாண்டுகளில் இஸ்ரேலின் பாதுகாப்பு பட்ஜெட்டில் கூடுதலாக 350 பில்லியன் ஷெக்கல்களை (சுமார் 118 பில்லியன் டாலர்கள்) சேர்க்க உள்ளதாக நெதன்யாகு தனது வீடியோ அறிக்கையில் தெரிவித்துள்ளார்.
எதிர்காலத்தில் இஸ்ரேல் தனது சொந்த தொழில்நுட்பத்தின் மூலம், “முன்னோடியான இஸ்ரேலியத் தயாரிப்பு விமானங்களை” முழுமையாக உருவாக்கும் என்றும் அவர் உறுதியளித்துள்ளார்.
தெற்கு லெபனான் மற்றும் வடக்கு இஸ்ரேல் பகுதிகளில் எதிர்கொள்ளும் ட்ரோன் அச்சுறுத்தல்களைச் சமாளிக்க ஒரு “சிறப்புத் திட்டத்திற்கு” உத்தரவிட்டுள்ளதாகக் கூறிய அவர், இந்தச் சிக்கலை உடனடியாகத் தீர்க்க முடியாது என்றும், இதற்குச் சிறிது காலம் பிடிக்கும் என்றாலும் இஸ்ரேல் அதைத் தீவிரமாகக் கையாண்டு வருவதாகவும் தெரிவித்துள்ளார்.
