குழந்தைகளை அடித்து வளர்ப்பது சரியா? பிரான்ஸ் பெற்றோர்களின் மனநிலை குறித்து வெளியானது அதிர்ச்சி அறிக்கை!
பிரான்ஸில் குழந்தைகளை அடிப்பதோ அல்லது தண்டிப்பதோ சட்டப்படி குற்றமாக அறிவிக்கப்பட்டு ஏழு ஆண்டுகள் நிறைவடைந்துவிட்டன. ஆனால், இன்றும் கால்வாசி பெற்றோர்கள் (25%) குழந்தைகளை நல்வழிப்படுத்தச் சிறு அடிகொடுப்பது (Spanking) மிகவும் பயனுள்ள முறை என்று கருதுவதாக ஒரு புதிய ஆய்வு முடிவுகள் தெரிவிக்கின்றன.
இது குறித்து ‘குழந்தைகளுக்கான அறக்கட்டளை’ (Fondation pour l’enfance) இன்று (வெள்ளிக்கிழமை) வெளியிட்டுள்ள அறிக்கையின் சுவாரசியமான மற்றும் அதிர்ச்சியளிக்கும் தகவல்கள் இதோ:
சுவீடன் நாட்டைத் தொடர்ந்து, சுமார் 40 ஆண்டுகளுக்குப் பிறகு 2019-ஆம் ஆண்டு பிரான்ஸ் அரசு ஒரு முக்கியச் சட்டத்தைக் கொண்டுவந்தது. ‘பெற்றோர்களின் அதிகாரம் என்பது குழந்தைகளுக்கு எதிரான உடல் மற்றும் உளவியல் ரீதியான வன்முறையின்றிச் செயல்பட வேண்டும்’ என்பதை சிவில் சட்டத்தில் சேர்த்தது. இதன் மூலம் இத்தகைய “அடிக்கு எதிரான சட்டத்தை” (Loi anti-fessée) அமல்படுத்திய உலகின் 56-வது நாடாகப் பிரான்ஸ் மாறியது.
சட்டம் வந்து ஏழு ஆண்டுகள் ஆகியும், நடைமுறையில் பிரெஞ்சுப் பெற்றோர்களின் மனநிலையில் பெரிய மாற்றம் ஏற்படவில்லை என்பதைப் புதிய ஆய்வு சுட்டிக்காட்டுகிறது.
0 முதல் 17 வயதுடைய குழந்தைகளின் பெற்றோர்களிடம் நடத்தப்பட்ட இந்த ஆய்வில் வெளிவந்த தகவல்கள்:
32% பெற்றோர்கள், சில குழந்தைகள் சரியாக நடந்துகொள்ள உடல் ரீதியான தண்டனை கட்டாயம் தேவை என்று உறுதியாக நம்புகின்றனர்.
23% பேர், உடல் ரீதியான தண்டனைகளைக் கையாளும் பெற்றோர்கள் செய்வது சரிதான் என அவர்களுக்கு ஆதரவு தெரிவிக்கின்றனர்.
40% பேர், ‘சரி’ மற்றும் ‘தவறு’ என்ன என்பதை உடல் ரீதியான தண்டனைகள் மூலமாகவே குழந்தைகள் எளிதாகக் கற்றுக்கொள்கிறார்கள் என நினைக்கின்றனர்.
கடந்த 12 மாதங்களில் குழந்தைகளை எப்படி நடத்தினீர்கள் என்று கேட்கப்பட்டபோது, பல உண்மைகள் வெளிவந்துள்ளன:
68% பெற்றோர்கள் தங்கள் குழந்தைகளைப் பார்த்துக் கடுமையாகக் கத்தியுள்ளனர்.
30% பேர் குழந்தைகளின் கை அல்லது கால்களில் தட்டியுள்ளனர் (அடித்துள்ளனர்).
19% பேர், ‘முட்டாள்’ அல்லது ‘சோம்பேறி’ என குழந்தைகளின் மனதைப் புண்படுத்தும் வார்த்தைகளைப் பயன்படுத்தியுள்ளனர்.
ஒட்டுமொத்தமாகக் கடந்த ஓராண்டில் மட்டும், 83 சதவீதப் பெற்றோர்கள் குறைந்தது ஒரு முறையாவது குழந்தைக்கு எதிராக வாய்மொழி அல்லது உளவியல் ரீதியான வன்முறையைப் பயன்படுத்தியுள்ளனர். அதேபோல, 37 சதவீதம் பேர் சிறு அடிகொடுப்பது போன்ற உடல் ரீதியான வன்முறையைக் கையாண்டுள்ளனர்.
சட்டம் இயற்றப்பட்டாலும், குழந்தைகளை வளர்ப்பதில் சிறு அடிகளைக் கையாளுவது என்பது இன்னும் பல பெற்றோர்களின் அன்றாடப் பழக்கங்களில் ஒன்றாகவே தொடர்கிறது என்பதை இந்த அறிக்கை அப்பட்டமாகக் காட்டுகிறது.
