பங்களாதேஷில் ஆடைத் தொழிற்சாலை ஊழியர்கள் 30,000 பேர் குறைந்தபட்சச் சம்பளம் கோரி போராட்டம்! 529 தொழிற்சாலைகள் மூடல்!
பங்களாதேஷில் ஆடை உற்பத்தித் தொழிற்துறையில் பணியாற்றும் ஆயிரக்கணக்கான தொழிலாளர்கள் சம்பள உயர்வு கோரி முன்னெடுத்துள்ள போராட்டம் தீவிரமடைந்துள்ளது. 2026 நவம்பர் 1ஆம் திகதி ஞாயிற்றுக்கிழமை டாக்கா மற்றும் அதனைச் சுற்றியுள்ள தொழிற்துறைப் பகுதிகளில் இடம்பெற்ற போராட்டங்கள் நவம்பர் 2ஆம் திகதியான இன்றும் தொடர்ந்துள்ளன. தொழிலாளர்கள் குறைந்தபட்ச மாதச் சம்பளத்தை தற்போதைய 12,500 டாக்காவிலிருந்து 30,000 டாக்காவாக உயர்த்த வேண்டும் என வலியுறுத்துகின்றனர்.
உணவு, வீட்டு வாடகை, போக்குவரத்து மற்றும் மருத்துவச் செலவுகள் தொடர்ந்து அதிகரித்து வரும் நிலையில் தற்போதைய சம்பளத்தில் குடும்பத்தை நடத்த முடியாத நிலை ஏற்பட்டுள்ளதாகத் தொழிலாளர்கள் தெரிவிக்கின்றனர். இதனால் டாக்காவின் Mirpur, Savar, Ashulia மற்றும் Gazipur உள்ளிட்ட முக்கிய தொழிற்துறைப் பகுதிகளில் ஆயிரக்கணக்கான தொழிலாளர்கள் வீதிகளில் இறங்கி ஆர்ப்பாட்டங்களில் ஈடுபட்டுள்ளனர். சில இடங்களில் முக்கிய நெடுஞ்சாலைகள் மறிக்கப்பட்டதுடன் காவல்துறையினருக்கும் போராட்டக்காரர்களுக்கும் இடையில் மோதல்களும் ஏற்பட்டுள்ளன. காவல்துறையினர் கண்ணீர்ப்புகைக் குண்டுகள் மற்றும் நீர்த்தாரைப் பிரயோகங்களை மேற்கொண்டு போராட்டக்காரர்களைக் கலைக்க முயன்றுள்ளனர். சில இடங்களில் பொலிஸ் வாகனங்களும் பாதுகாப்புக் கூடங்களும் தீக்கிரையாக்கப்பட்டுள்ளன.
இந்தப் போராட்டங்களின் காரணமாக நவம்பர் 1ஆம் திகதி குறைந்தது 529 ஆடைத் தொழிற்சாலைகள் தற்காலிகமாகச் செயல்பாடுகளை நிறுத்தியதாக பங்களாதேஷ் ஆடை உற்பத்தியாளர்கள் மற்றும் ஏற்றுமதியாளர்கள் சங்கம் தெரிவித்துள்ளது. இதனால் சுமார் 9 இலட்சத்து 87 ஆயிரம் தொழிலாளர்கள் வேலைக்குச் செல்ல முடியாத நிலை ஏற்பட்டதாகவும் தெரிவிக்கப்பட்டுள்ளது. டாக்காவின் Mirpur பகுதியில் இடம்பெற்ற மோதல்களால் சில மெட்ரோ ரயில் நிலையங்களும் தற்காலிகமாக மூடப்பட்டு பின்னர் மீண்டும் சேவைகள் ஆரம்பிக்கப்பட்டன.
தொழிலாளர்களின் கோரிக்கையைப் பரிசீலிப்பதற்காக பங்களாதேஷ் அரசாங்கம் நவம்பர் 1ஆம் திகதி ஆறு உறுப்பினர்களைக் கொண்ட புதிய சம்பள நிர்ணயக் குழுவை அமைத்துள்ளது. தொழிலாளர் பிரதிநிதிகள், தொழிற்சாலை உரிமையாளர்கள் மற்றும் அரசாங்கத் தரப்பினர் அடங்கிய இந்தக் குழு புதிய குறைந்தபட்சச் சம்பளத்தைப் பரிந்துரைக்கவுள்ளது. இதற்கிடையில் தொழிலாளர்கள் உடனடியாகப் பணிக்குத் திரும்ப வேண்டும் என அரசாங்கம் வலியுறுத்தியுள்ளது.
பங்களாதேஷின் ஆடை உற்பத்தித் துறை அந்நாட்டின் பொருளாதாரத்தில் மிக முக்கியமான இடத்தைப் பெற்றுள்ளது. சுமார் 40 இலட்சம் பேர் இத்துறையில் பணியாற்றுவதுடன், நாட்டின் ஏற்றுமதி வருமானத்தில் 80 சதவீதத்திற்கும் அதிகமான பங்களிப்பை இந்தத் தொழிற்துறை வழங்குகிறது. இந்நிலையில் நீடிக்கும் தொழிலாளர் போராட்டங்கள் சர்வதேச ஆடை விநியோகத்தையும் ஏற்றுமதி நடவடிக்கைகளையும் பாதிக்கக்கூடும் என்ற கவலை எழுந்துள்ளது.
தொழிலாளர்களின் வாழ்க்கைத் தரத்தையும் சம்பளத்தையும் உயர்த்த வேண்டும் என்ற கோரிக்கைக்கும் தொழிற்சாலை உரிமையாளர்கள் எதிர்கொள்ளும் உற்பத்திச் செலவு மற்றும் சர்வதேசப் போட்டி சவால்களுக்கும் இடையில் தீர்வு காண வேண்டிய நிலை பங்களாதேஷ் அரசாங்கத்திற்கு ஏற்பட்டுள்ளது. புதிய சம்பள நிர்ணயக் குழு எத்தகைய முடிவை எடுக்கப்போகிறது என்பதையும் தொழிலாளர்களின் போராட்டம் முடிவுக்கு வருமா என்பதையும் சர்வதேச தொழில்துறை வட்டாரங்கள் உன்னிப்பாகக் கவனித்து வருகின்றன.
