30 ஆண்டுகள் கடந்தும் 3.6 பில்லியன் யூரோ முதலீட்டை இன்னும் திரும்பப் பெறாத ‘டிஸ்னிலேண்ட் பாரிஸ்’ (Disneyland Paris)!
1992 ஏப்ரல் 12 -இல் திறக்கப்பட்ட ஐரோப்பாவின் மிகப் பிரபலமான ‘டிஸ்னிலாண்ட் பாரிஸ்’ கேளிக்கை பூங்கா, தனது உருவாக்கத்திற்காக முதலீடு செய்யப்பட்ட 3.6 பில்லியன் யூரோக்களை முப்பதாண்டுகளுக்கு மேலாகியும் இன்னும் திரும்பப் பெறவில்லை என ‘தி கார்டியன்’ (Guardian) நாளிதழின் சமீபத்திய அறிக்கை சுட்டிக்காட்டுகிறது.
முப்பத்து மூன்று ஆண்டுகளுக்கு முன்பு (1987-இல்) ‘யூரோ டிஸ்னி அசோசியேட்ஸ்’ (Euro Disney Associés) நிறுவனத்திற்கும் பிரெஞ்சு அரசாங்கத்திற்கும் இடையே கையெழுத்தான பொது மற்றும் தனியார் கூட்டு ஒப்பந்தமே இந்த நிதிப் பற்றாக்குறைக்கு முக்கியக் காரணமாகும். 22.3 சதுர கிலோமீட்டர் நிலத்தைக் கையகப்படுத்த, டிஸ்னி நிறுவனம் அரசுடன் இந்த ஒப்பந்தத்தை ஏற்க வேண்டியிருந்தது.
இதன்படி, பூங்காவின் 51% பங்குகள் பிரெஞ்சு அரசாங்கத்திடமும், 49% பங்குகள் மட்டுமே டிஸ்னி நிறுவனத்திடமும் இருந்தன. பெரும்பான்மைப் பங்குதாரராக இல்லாததால், அமெரிக்கப் பூங்காக்களைப் போல் டிஸ்னியால் இங்குப் பெரிய அளவில் முதலீடு செய்ய முடியவில்லை. எனவே, கட்டமைப்புச் செலவுகளில் சுமார் 60% வங்கிக் கடன்கள் மூலம் பெறப்பட்டதால், கடன்கள் மிக வேகமாக அதிகரித்தன.
டிஸ்னிலேண்ட் பாரிஸ் பல எதிர்பாராத துரதிர்ஷ்டவசமான காலங்களையும் சந்தித்தது. 2002-ஆம் ஆண்டு இதன் இரண்டாவது பூங்கா திறக்கப்பட்டபோது, அமெரிக்காவின் செப்டம்பர் 11 தாக்குதல்களால் சுற்றுலாத்துறை கடும் சரிவைச் சந்தித்தது. பின்னர், 2015 மற்றும் 2016-ஆம் ஆண்டுகளில் பாரிஸில் நடந்த ‘சார்லி எப்டோ’ (Charlie Hebdo) மற்றும் நவம்பர் 13 பயங்கரவாதத் தாக்குதல்களாலும் சுற்றுலாப் பயணிகளின் வருகை கணிசமாகக் குறைந்தது.
இந்த நெருக்கடியிலிருந்து மீள, தாய் நிறுவனமான ‘வால்ட் டிஸ்னி’ (Walt Disney) ‘யூரோ டிஸ்னி அசோசியேட்ஸ்’ நிறுவனத்தை முழுமையாக விலைக்கு வாங்கியது. இதன்மூலம் வங்கிக் கடன்கள் அடைக்கப்பட்டு, பிற பங்குதாரர்களின் பங்குகளும் திரும்பப் பெறப்பட்டன. பூங்கா லாபத்தை ஈட்டத் தொடங்கும் தருவாயில் இருந்தபோது, கோவிட்-19 பெருந்தொற்று மீண்டும் ஒரு பெரும் தடையாக அமைந்தது.
2025: ஒரு சாதனை ஆண்டு
இவ்வளவு நிதிப் பற்றாக்குறைகள் இருந்தாலும், தற்போது பூங்கா மிகச் சிறப்பாகச் செயல்பட்டு வருகிறது. ஆண்டுதோறும் சுமார் 16 மில்லியன் மக்கள் இங்கு வருகை தருகின்றனர். கடந்த ஆண்டு (2025), தேவைக்கு ஏற்ப விலையை மாற்றியமைக்கும் (Tarification dynamique) புதிய கட்டண முறையின் மூலம் 260 மில்லியன் யூரோக்கள் லாபத்தை ஈட்டிப் பூங்கா மாபெரும் சாதனை படைத்தது. இது 2024-ஆம் ஆண்டை விட மூன்று மடங்கு அதிகமாகும்!
சுற்றுலாப் பயணிகள் அதிக அளவில் வருவதோடு மட்டுமின்றி, அவர்கள் தங்கும் விடுதிகள், உணவகங்கள் மற்றும் டிஸ்னிப் பொருட்களில் அதிக அளவில் செலவிடுவதே இந்தச் சாதனைக்குக் காரணமாகும். இதன்மூலம், அமெரிக்காவிற்கு வெளியே அதிக லாபம் ஈட்டும் டிஸ்னி பூங்காவாக இது உருவெடுத்துள்ளது.
மேலும், கடந்த மார்ச் மாத இறுதியில் சுமார் 2 பில்லியன் டொலர் (1.7 பில்லியன் யூரோ) பிரம்மாண்ட முதலீட்டில் புதிதாகத் திறக்கப்பட்டுள்ள ‘ஃப்ரோஸன்’ (La Reine des neiges) பூங்கா, எதிர்காலத்தில் சுற்றுலாப் பயணிகளை மேலும் ஈர்க்கும் என எதிர்பார்க்கப்படுகிறது.
