அமெரிக்கா – ஈரான் மோதலில் சிக்குகிறதா குவைத்?

அமெரிக்கா – ஈரான் மோதலில் சிக்குகிறதா குவைத்?

நீண்ட கால அமைதிக்கு பிறகு, மத்திய கிழக்கு நாடுகள் மீண்டும் ஒரு தீவிரமான போர் பதற்றத்திற்கு தள்ளப்பட்டுள்ளன.

இந்த முறை நடக்கும் மோதலின் நேரடி மற்றும் கடுமையான பாதிப்பு குவைத் நாட்டிற்கு தான் ஏற்பட்டிருக்கிறது.

சமீபத்தில் குவைத் சர்வதேச விமான நிலையத்தின் முதல் முனையத்தை குறிவைத்து நடத்தப்பட்ட மாபெரும் ஏவுகணை மற்றும் ட்ரோன் தாக்குதல்களால் ஒட்டுமொத்த பிராந்தியத்தின் பாதுகாப்புக்கும் பெரும் அச்சுறுத்தல் உருவாகியுள்ளது.

இந்த தாக்குதலுக்கு யார் உண்மையான காரணம் என்பதில் அமெரிக்காவும் ஈரானும் மாற்றி மாற்றி கடுமையான குற்றச்சாட்டுகளை முன்வைத்து வருகின்றன.

குவைத் விமான நிலையத்தில் ஏற்பட்ட இவ்வளவு பெரிய சேதத்திற்கு அமெரிக்காவின் பேட்ரியாட் (Patriot) ஏவுகணை தடுப்பு அமைப்பிலிருந்து தவறுதலாக பாய்ந்த ஏவுகணையே காரணம் என்று ஈரான் புரட்சிகர காவல் படை கூறுகிறது.

ஆனால், அமெரிக்க மத்திய கட்டுப்பாட்டு மையம் இந்த குற்றச்சாட்டை ஒரு தகவல் தொடர்பு தந்திரம் என்று மறுத்ததோடு, இது ஈரானால் திட்டமிட்டு நடத்தப்பட்ட கொடூரமான தாக்குதல் என்றும் திட்டவட்டமாக தெரிவித்துள்ளது.

இந்த போர் பதற்றம் உருவாவதற்கு முக்கிய காரணம் ஹார்முஸ் ஜலசந்தியில் கடல் வழி கட்டுப்பாட்டை மையமாக வைத்து ஏற்பட்ட மோதல் தான்.

ஈரான் துறைமுகத்தை நோக்கி சென்று கொண்டிருந்த காலி எண்ணெய் கப்பல் மீது அமெரிக்க படைகள் தாக்குதல் நடத்தியதை அடுத்து, ஈரான் அதற்கு பதிலடி கொடுக்க தொடங்கியது.

அதன்படி, குவைத்தில் உள்ள அலி அல் சலீம் அமெரிக்க விமானப்படை தளம் மற்றும் பஹ்ரைனில் உள்ள அமெரிக்காவின் ஐந்தாவது கடற்படை தலைமையகம் ஆகியவற்றை குறிவைத்து இந்த தொடர் தாக்குதல்கள் நடத்தப்பட்டதாக தகவல்கள் தெரிவிக்கின்றன.

ஐக்கிய அரபு அமீரகம் மற்றும் சவுதி அரேபியா போன்ற பிராந்திய ராணுவ பலம் கொண்ட நாடுகளுடன் ஒப்பிடும்போது குவைத் பாதுகாப்பு ரீதியாக சற்று சென்சிட்டிவான நிலையில் உள்ளது.

இருப்பினும், தங்கள் நாட்டில் 13,500-க்கும் மேற்பட்ட அமெரிக்க ராணுவ வீரர்களுக்கு இடமளித்துள்ளதால் அவர்கள் இப்படி ஒரு கடுமையான ஆபத்தை எதிர்கொண்டுள்ளனர்.

இந்த சம்பவத்திற்கு பிறகு, ஒரு ராஜதந்திர நடவடிக்கையாக, குவைத் அரசாங்கம் தனது நாட்டில் உள்ள இரண்டு ஈரான் தூதரக அதிகாரிகளை 24 மணி நேரத்திற்குள் நாட்டை விட்டு வெளியேறுமாறு உத்தரவிட்டுள்ளது.

இரு தரப்புக்கும் இடையே திரைமறைவில் நடக்கும் அமைதி பேச்சுவார்த்தைகள் வெற்றி பெற்று வருவதாக அமெரிக்க அதிபர் டொனால்ட் ட்ரம்ப் தெரிவித்தாலும்,

தங்கள் அணுசக்தி திட்டங்களை கட்டுப்படுத்துவது குறித்தோ அல்லது ஜலசந்தியில் வரி வசூலிப்பதை கைவிடுவது குறித்தோ எந்தவொரு உடன்பாடும் எட்டப்படவில்லை என்று ஈரான் தரப்பில் கூறப்படுகிறது. ஈரானுக்கு விதிக்கப்பட்டுள்ள பொருளாதார தடைகளை நீக்க வேண்டும் என்றால்,

அவர்கள் தங்களது அணுசக்தி திட்டங்களை முழுமையாக கைவிட வேண்டும் என்று அமெரிக்க வெளியுறவுத்துறை அமைச்சர் மார்கோ ரூபியோ திட்டவட்டமாக தெரிவித்துள்ளார்.

உலக அரசியல் அதிகாரப் போட்டி மற்றும் பொருளாதார தடைகளால் ஏற்படும் இது போன்ற போர்களில் குவைத் போன்ற நாடுகள் பலியாவது, அங்கு வசிக்கும் லட்சக்கணக்கான வெளிநாட்டு தொழிலாளர்களின் பாதுகாப்பையும், உலகப் பொருளாதாரத்தையும் எந்த அளவுக்கு பாதிக்கும்?

இது குறித்த உங்களுடைய பார்வைகளை கீழே கமெண்ட் பண்ணுங்க. தொடர்ந்து இது போன்ற அப்டேட்ஸ்களுக்கு follow பண்ணுங்க.