ட்ரம்பின் கருத்து “நேர்த்தியானவை அல்ல, தரம் குறைந்தவை”

ட்ரம்பின் கருத்து “நேர்த்தியானவை அல்ல, தரம் குறைந்தவை” (Neither elegant nor up to standard). என மக்ரோன் கண்டனம்!

ஏப்ரல் 1, 2026 அன்று வெள்ளை மாளிகையில் நடைபெற்ற ஈஸ்டர் மதிய உணவு விருந்தின் போது, அமெரிக்க ஜனாதிபதி டொனால்ட் டிரம்ப், பிரான்ஸ் ஜனாதிபதி இம்மானுவேல் மக்ரோனின் தனிப்பட்ட வாழ்க்கை குறித்து சர்ச்சைக்குரிய கருத்துகளைத் தெரிவித்துள்ளார்.

தனியார் விருந்து ஒன்றில் பேசிய டிரம்ப், மக்ரோன் பற்றி குறிப்பிடும்போது: “மக்ரோனுடைய மனைவி அவரை மிகவும் மோசமாக நடத்துகிறார். அவர் இன்னும் அந்தத் தாடையின் வலது பக்க அடியில் இருந்து மீண்டு வருகிறார்,” என்று கிண்டலாகக் கூறினார்.

இது 2025-ஆம் ஆண்டு மே மாதம் அவர்கள் இருவரும் வியட்நாம் சென்றிருந்தபோது, மக்ரோனின் மனைவி பிரிஜிட் மக்ரோன் அவரது முகத்தைத் தள்ளுவது போல் வெளியான ஒரு வைரல் வீடியோவை அடிப்படையாகக் கொண்டு சொல்லப்பட்ட கருத்தாகும். மேலும், மக்ரோன் பேசுவது போல பிரெஞ்சு உச்சரிப்பைப் போலி செய்து டிரம்ப் கேலி செய்துள்ளார்.

இந்த நிலையில் தென் கொரியாவிற்குப் பயணம் மேற்கொண்டிருந்த மக்ரோன், டிரம்பின் இந்தக் கருத்துகளுக்குத் தனது கடும் அதிருப்தியைத் தெரிவித்துள்ளார். குறிப்பாக, டிரம்பின் கருத்துகள் “நேர்த்தியானவை அல்ல, தரம் குறைந்தவை” (Neither elegant nor up to standard). என குறிப்பிட்டுள்ளார். இத்தகைய கருத்துகள் ஒரு நாட்டின் தலைவருக்கு அழகல்ல என்றும், இதற்குப் பதில் அளிப்பதற்குக் கூடத் தகுதியற்றவை என்றும் அவர் விமர்சித்துள்ளார்.

இந்த மோதலுக்குப் பின்னால் வலுவான அரசியல் காரணங்கள் உள்ளன: ஈரான் மீது அமெரிக்கா மற்றும் இஸ்ரேல் எடுத்து வரும் இராணுவ நடவடிக்கைகளில் பிரான்ஸ் பங்கேற்க மறுத்துவிட்டது. “இது எங்களுடைய போர் அல்ல” என்று மக்ரோன் திட்டவட்டமாகக் கூறியுள்ளார்.

அமெரிக்காவின் இராணுவ நடவடிக்கைகளுக்கு உதவாத நேட்டோ அமைப்பை டிரம்ப் “காகிதப்புலி” (Paper tiger) என்று விமர்சித்துள்ளார்.

பிரெஞ்சுப் பொருட்கள் மீது வரிகளை விதிக்கப்போவதாக டிரம்ப் மிரட்டி வருவதும் இரு நாடுகளுக்கும் இடையிலான விரிசலை அதிகரித்துள்ளது.

பிரான்சின் எதிர்க்கட்சித் தலைவர்கள் உட்படப் பல அரசியல்வாதிகளும் மக்ரோனின் குடும்பத்தைத் தனிப்பட்ட முறையில் தாக்கிப் பேசிய டிரம்பின் செயலுக்குக் கண்டனம் தெரிவித்துள்ளனர்.