ஹார்முஸ் நீரிணை: இஸ்ரேலுக்கான ஈரானின் எச்சரிக்கையும் உலகளாவிய எரிசக்தி அச்சுறுத்தலும்!
ஈரானிய எல்லைக்குள் இஸ்ரேலியக் கப்பல்கள் பிரவேசிப்பதற்குத் தடை விதிக்கப்படும் என்ற ஈரானின் அண்மைக்கால அறிவிப்பு, மத்திய கிழக்கில் பெரும் பதற்றத்தை ஏற்படுத்தியுள்ளது.
உலகின் மிக முக்கியமான கடல்வழிப் போக்குவரத்துப் பாதைகளில் ஒன்றான ஹார்முஸ் நீரிணை (Strait of Hormuz) ஊடாக இஸ்ரேலிய மற்றும் அமெரிக்கத் தொடர்புடைய கப்பல்கள் பயணிப்பதை ஈரான் கட்டுப்படுத்த முனைந்துள்ளதாக அண்மைக்கால அறிக்கைகள் சுட்டிக்காட்டுகின்றன.
சர்வதேச கடல்சார் சட்டங்களின்படி, ஹார்முஸ் நீரிணை ஒரு நாட்டின் முழுமையான கட்டுப்பாட்டில் இல்லை என்ற போதிலும், ஈரான் மற்றும் ஓமான் நாடுகளின் எல்லைகளைத் தொட்டுச் செல்லும் இந்தப் பாதையில் ஈரான் தனது இராணுவ வலிமையைப் பயன்படுத்தி அழுத்தங்களை பிரயோகித்து வருகின்றது.
உலகளாவிய கச்சாய் எண்ணெய் மற்றும் எரிவாயு விநியோகத்தில் ஐந்தில் ஒரு பங்கு இந்தப் பாதை வழியாகவே நடைபெறுகிறது. இதன் காரணமாக, ஈரான் முன்னெடுத்துள்ள இந்த மறைமுகக் கட்டுப்பாட்டு நடவடிக்கைகள் சர்வதேச அமைதிக்கும் பாதுகாப்புக்கும் விடுக்கப்பட்ட அச்சுறுத்தல் என 20-க்கும் மேற்பட்ட நாடுகள் கூட்டாகக் கண்டனம் தெரிவித்துள்ளன.
இந்த இழுபறி நிலை நீடித்தால், கப்பல் காப்பீட்டுச் செலவுகள் அதிகரித்தல், எரிபொருள் விலை உயர்வு மற்றும் சர்வதேச வர்த்தகப் பாதைகளில் பாரிய மாற்றங்கள் ஏற்படக்கூடும். குறிப்பாக, இப்பாதையைத் திறந்து வைப்பதற்காக அமெரிக்கா உள்ளிட்ட நட்பு நாடுகளின் இராணுவத் தலையீடுகள் ஏற்படுவதற்கான சாத்தியக்கூறுகளும் அதிகரித்துள்ளன. தற்போதைய சூழலில், ஹார்முஸ் நீரிணையை ஈரான் ஒரு அரசியல் ஆயுதமாகப் பயன்படுத்தி வருகின்றமை குறிப்பிடத்தக்கது.
