ஈரானுக்கு ஆதரவாகக் களமிறங்கியது ரஷ்யா:
லாரிஜானி படுகொலை மற்றும் அணு உலை மீதான தாக்குதலுக்குக் கடும் கண்டனம்!
இறையாண்மை மிக்க ஈரானின் தலைவர்கள் அலி லாரிஜானி மற்றும் பாசிஜ் படைத் தளபதி சுலைமானி ஆகியோர் படுகொலை செய்யப்பட்டமைக்கும்,
ஈரானின் ‘புஷேர்’ (Bushehr) அணுமின் நிலையத்திற்கு அருகே நடத்தப்பட்ட தாக்குதலுக்கும் ரஷ்யா தனது கடுமையான கண்டனங்களை உத்தியோகபூர்வமாகப் பதிவு செய்துள்ளது.
இதன் மூலம் ஈரான்-இஸ்ரேல் போரில் ரஷ்யா ஈரானுக்கு ஆதரவான தனது நிலைப்பாட்டைத் தெளிவுபடுத்தியுள்ளது.
கிரெம்ளின் மாளிகையின் கண்டனம்:
ரஷ்ய அதிபர் மாளிகையான கிரெம்ளினின் செய்தித் தொடர்பாளர் டிமிட்ரி பெஸ்கோவ் (Dmitry Peskov) செய்தியாளர்களிடம் பேசுகையில், “இறையாண்மை மற்றும் சுதந்திரம் கொண்ட ஈரானின் தலைவர்களைக் குறிவைத்துக் கொலை செய்வதையும், நாட்டின் ஸ்திரத்தன்மையைக் குலைக்கும் இத்தகைய நடவடிக்கைகளையும் ரஷ்யா வன்மையாகக் கண்டிக்கிறது” எனத் தெரிவித்துள்ளார்.
அணு உலை மீதான தாக்குதல்:
இதற்கிடையில், செவ்வாய்க்கிழமையன்று ஈரானின் புஷேர் அணுமின் நிலையத்தின் ஆற்றல் தொகுதிக்கு (Energy unit) சில மீட்டர்கள் தொலைவில் அமெரிக்க மற்றும் இஸ்ரேலியப் படைகள் ஏவுகணைத் தாக்குதல் நடத்தியுள்ளதாக ரஷ்ய வெளிவிவகார அமைச்சு குற்றம் சாட்டியுள்ளது.
அமைச்சின் செய்தித் தொடர்பாளர் மரியா சாகரோவா (Maria Zakharova), ஈரானின் அணு உலைகள் மீதான தாக்குதல்களை உடனடியாக நிறுத்துமாறு அமெரிக்காவிற்கும் இஸ்ரேலுக்கும் கடும் எச்சரிக்கை விடுத்துள்ளார்.
எனினும், சர்வதேச அணுசக்தி முகவரகத்திடம் (IAEA) ஈரான் அளித்துள்ள அறிக்கையில், இந்தத் தாக்குதலால் அணு உலைக்கு எந்தவொரு சேதமும் ஏற்படவில்லை எனவும், உயிரிழப்புகள் ஏதும் நிகழவில்லை எனவும் உறுதிப்படுத்தப்பட்டுள்ளது.
