ஈரான் போர்: அமைதிக்கான நிபந்தனைகளை விதித்தது தெஹ்ரான்; ரியாத் மீதான தாக்குதலை முறியடித்ததாக சவூதி அறிவிப்பு!
மத்திய கிழக்கில் அமெரிக்கா, இஸ்ரேல் மற்றும் ஈரான் இடையிலான தீவிர மோதல்கள் தொடரும் நிலையில், போரை முடிவுக்குக் கொண்டுவருவதற்கான நிபந்தனைகளை தெஹ்ரான் முன்வைத்துள்ளதாகவும், அதேவேளை சவூதி அரேபியாவின் தலைநகரான ரியாத்தை இலக்கு வைத்து முன்னெடுக்கப்பட்ட வான்வழித் தாக்குதலை அந்நாட்டுப் பாதுகாப்புப் படைகள் முறியடித்துள்ளதாக தெரிவிக்கப்பட்டுள்ளது.
தெஹ்ரானின் அமைதி நிபந்தனைகள்:அனைத்து முனைகளிலும் போர் நடவடிக்கைகளை உடனடியாக முடிவுக்குக் கொண்டுவருதல் மற்றும் அமெரிக்கா விதித்துள்ள கடற்படை முற்றுகையை முற்றாக நீக்குதல் உள்ளிட்ட முக்கிய நிபந்தனைகளை ஈரான் முன்வைத்துள்ளதாக அந்நாட்டுப் பாதுகாப்புப் பிரிவுத் தகவல்கள் தெரிவிக்கின்றன.
பேச்சுவார்த்தைகளை ஆரம்பிப்பதற்கு வாஷிங்டன் தங்கள் உரிமைகளையும் கோரிக்கைகளையும் ஏற்றுக்கொள்ள வேண்டும் என ஈரான் வலியுறுத்தியுள்ளது.
ரியாத் மீதான தாக்குதல் முறியடிப்பு:சவூதி தலைநகர் ரியாத் பகுதியை இலக்கு வைத்து ஏவப்பட்ட எறிகணை மற்றும் ஆளில்லா விமானத் (Drone) தாக்குதலை சவூதி வான் பாதுகாப்புப் படைகள் இடைமறித்து முறியடித்துள்ளதாகத் தெரிவிக்கப்பட்டுள்ளது.
இப்பிராந்தியத்தில் தொடரும் மோதல்களுக்கு மத்தியில் சவூதி அரேபிய எல்லைப் பாதுகாப்பு மற்றும் வான் பாதுகாப்பு நிலைகள் தீவிர எச்சரிக்கையுடன் இயங்கி வருகின்றன.
மத்திய கிழக்கு பிராந்தியத்தில் பதற்றம் அதிகரித்துள்ள சூழலில், அமெரிக்கா தனது படைகளைத் தயார்நிலையில் வைத்திருப்பதுடன், ஏமனின் ஹூதி கிளர்ச்சியாளர்கள் சவூதி எல்லைகள் மற்றும் வான்நிலைகளை இலக்கு வைத்து அவ்வப்போது தாக்குதல்களை முன்னெடுத்து வருகின்றனர்.
இந்நிலையில், தற்போதைய சமாதான நிபந்தனைகள் குறித்து அமெரிக்கா அல்லது அதன் நட்பு நாடுகள் இன்னும் உத்தியோகபூர்வமாகத் தனது நிலைப்பாட்டை அறிவிக்கவில்லை.
