லண்டனுக்கு வடக்கே இரு தொடருந்துகள் ஒன்றுடன் ஒன்று மோதி விபத்து

முக்கியச் செய்தி :லண்டனுக்கு வடக்கே இரு தொடருந்துகள் ஒன்றுடன் ஒன்று மோதி விபத்து: ‘பேரழிவுச் சம்பவம்’ என அவசர மருத்துவப் பிரிவு பிரகடனம்!

பிரித்தானியா தலைநகர் லண்டனுக்கு வடக்கே உள்ள பெட்ஃபோர்ட் (Bedford) பிராந்தியத்தில் இன்று ஜூன் 19 (வெள்ளிக்கிழமை) இரு பயணிகள் தொடருந்துகள் ஒன்றுடன் ஒன்று மோதி விபத்துக்குள்ளாகியுள்ளன..

இக்கோர விபத்தை ஒரு ‘பேரழிவுச் சம்பவம்’ (Major incident) எனப் பிரகடனப்படுத்தியுள்ள இங்கிலாந்து அவசர மருத்துவப் பிரிவினர், சம்பவ இடத்திற்குப் பெருமளவிலான மீட்புக் குழுவினரையும் மருத்துவ ஊர்திகளையும் அதிரடியாக முடுக்கிவிட்டுள்ளனர்.

விபத்தின் பின்னணியும் தற்போதைய நிலவரமும்

பிரித்தானிய போக்குவரத்து காவல் துறையினர் விடுத்துள்ள முதற்கட்ட அறிவிப்பின்படி, பெட்ஃபோர்ட் பகுதியில் இரு தொடருந்துகள் மோதிக்கொண்டதாகக் கிடைத்த அவசரத் தகவல்களின் அடிப்படையில் மீட்புப் பணிகள் உடனடியாகத் தொடங்கப்பட்டுள்ளன.

பாதிக்கப்பட்ட வழித்தடம்: ‘ஈஸ்ட் மிட்லண்ட்ஸ் ரெயில்வே’ (EMR) நிறுவனத்திற்குச் சொந்தமான இரு தொடருந்துகள் லண்டன் செயின்ட் பான்கிராஸ் (St Pancras) மற்றும் லெஸ்டர் (Leicester) நகரங்களுக்கு இடையிலான பாதையில் பயணித்துக் கொண்டிருந்தபோது இந்த விபத்து நேர்ந்துள்ளது.

சமூக வலைத்தளங்களில் வெளியாகியுள்ள சரிபார்க்கப்படாத சில காட்சிகள், ஒரு தொடருந்தின் பெட்டி மற்றொரு தொடருந்துப் பெட்டிக்குள் பலமாக மோதிச் செருகியிருப்பதை உணர்த்துகின்றன.

விபத்திற்குள்ளான பயணிகள் பலர் அவசர அவசரமாகத் தரையிறங்கித் தண்டவாளங்களின் ஓரமாகத் தஞ்சம் புகுந்துள்ளனர். எனினும், நல்வாய்ப்பாக இரு தொடருந்துகளும் தடம் புரளாமல் தண்டவாளத்தின் மீதே நிற்கின்றன.

இந்தத் திடீர் மோதலின் காரணமாகத் தொடருந்துகளில் பயணித்த பல பயணிகள் காயமடைந்துள்ளதாக உள்ளூர் ஊடகங்கள் செய்தி வெளியிட்டுள்ளன. எனினும், மீட்புப் பணிகளின் முதற்கட்டமாக இருப்பதால் அதிகாரப்பூர்வக் காயமடைந்தோர் விபரங்களை மீட்புச் சேவைகள் இன்னும் முறைப்படி வெளியிடவில்லை.

“கிழக்கு இங்கிலாந்து அவசர மருத்துவப் பிரிவினர் தங்களின் சமூக வலைத்தளப் பக்கத்தில், பெட்ஃபோர்ட் பகுதிக்குத் தெற்கே நிகழ்ந்துள்ள இத்துயரச் சம்பவத்தைக் கையாள்வதற்காக வான்வழி மருத்துவஉலங்குவானுர்திகள் (Air ambulances) உள்ளிட்ட அதிநவீன உள்கட்டமைப்புகளும், ஏராளமான அவசர மருத்துவக் குழுவினரும் சம்பவ இடத்திற்குப் பெருமளவில் அனுப்பி வைக்கப்பட்டுள்ளதாகக் குறிப்பிட்டுள்ளனர்.”

தற்பொழுது விபத்து நிகழ்ந்த பகுதியில் இரு வழித்தடப் போக்குவரத்தும் முழுமையாக நிறுத்தப்பட்டு, பயணிகள் பாதுகாப்பாக வெளியேற்றப்பட்டு வருகின்றனர்.