புற்றுநோய், உயர் இரத்த அழுத்தம், நீரிழிவு… உணவு நிறமூட்டிகள் மற்றும் பதப்படுத்திகளால் ஏற்படும் சுகாதார அபாயங்களை உறுதிப்படுத்தும் புதிய ஆய்வுகள்!

புற்றுநோய், உயர் இரத்த அழுத்தம், நீரிழிவு… உணவு நிறமூட்டிகள் மற்றும் பதப்படுத்திகளால் ஏற்படும் சுகாதார அபாயங்களை உறுதிப்படுத்தும் புதிய ஆய்வுகள்!

பிரான்சின் ‘இன்செர்ம்’ (Inserm) நிறுவனம் நடத்திய புதிய ஆய்வுகளில், அதிதீவிரமாகப் பதப்படுத்தப்பட்ட உணவுகளில் (Aliments ultra-transformés) சேர்க்கப்படும் நிறமூட்டிகள் மற்றும் பதப்படுத்திகளால் மனிதர்களுக்கு ஏற்படும் கொடிய சுகாதார அபாயங்கள் உறுதிப்படுத்தப்பட்டுள்ளன.

2009-ஆம் ஆண்டு முதல் 100,000-க்கும் மேற்பட்ட மக்களிடம் இந்தத் தொடர் ஆய்வு நடத்தப்பட்டது.

உணவுகளில் சேர்க்கப்படும் செயற்கைப் பொருட்கள் (Additifs), உணவு நிறமூட்டிகள் (Colorants – E100 முதல் E199 வரை) மற்றும் உணவுப் பதப்படுத்திகள் / ஆக்ஸிஜனேற்றத் தடுப்பான்கள் (Conservateurs et antioxydants – E200 முதல் E399 வரை) மனித உடலில் ஏற்படுத்தும் தாக்கங்கள் குறித்து விரிவாக ஆராயப்பட்டது.

உணவு நிறமூட்டிகளை அதிகம் உட்கொள்பவர்களுக்கு ‘வகை 2’ நீரிழிவு நோய் (Diabète de type 2) வருவதற்கான அபாயம் 38% அதிகமாக உள்ளது. மேலும், புற்றுநோய் (Cancer) ஏற்படும் அபாயம் 14% அதிகரிக்கிறது; குறிப்பாக மார்பகப் புற்றுநோய் (Cancer du sein) அபாயம் 21% முதல் 32% வரை (மாதவிடாய் நிற்றலுக்குப் பிறகு) அதிகரிக்கிறது.

பொட்டாசியம் சார்பேட் (Sorbate de potassium – E202) மற்றும் சிட்ரிக் அமிலம் (Acide citrique – E330) போன்ற பதப்படுத்திகளை அதிகம் உட்கொள்வோருக்கு உயர் இரத்த அழுத்த (Hypertension) அபாயம் 24% அதிகரிக்கிறது. இதய மற்றும் இரத்த நாள நோய்களுக்கான (Maladies cardiovasculaires) அபாயமும் 16% கூடுதலாக உள்ளது.

உலகளவில் நடத்தப்பட்ட 104 ஆய்வுகளில் 93 ஆய்வுகள், பதப்படுத்தப்பட்ட உணவுகள் உடல்நலத்திற்குக் கேடு விளைவிப்பதைத் (Effets délétères) தெளிவாக உணர்த்துவதாக ‘இன்செர்ம்’ ஆய்வாளர் மாத்தில்டே டூவியர் (Mathilde Touvier) சுட்டிக்காட்டியுள்ளார். இயற்கையான அல்லது மிகக் குறைவாகப் பதப்படுத்தப்பட்ட உணவுகளை மட்டுமே மக்கள் தேர்ந்தெடுக்க வேண்டும் என அவர் வலியுறுத்துகிறார்.

பொதுமக்களின் சுகாதாரத்தைக் கருத்தில் கொண்டு, பிரான்சில் விற்கப்படும் உணவுப் பொருட்களின் மீது அவற்றின் ஊட்டச்சத்துத் தரத்தைக் குறிக்கும் ‘நியூட்ரி-ஸ்கோர்’ (Nutri-Score) தரவரிசையைக் கட்டாயமாக்கும் புதிய சட்ட முன்மொழிவு நாடாளுமன்றத்தில் முன்வைக்கப்பட்டுள்ளது. இதற்கு 8 அரசியல் குழுக்கள் ஆதரவு தெரிவித்துள்ளன.

இந்தத் தரவரிசையை அச்சிட மறுக்கும் உணவு நிறுவனங்களுக்கு அவர்களின் பிரெஞ்சு விற்பனை வருவாயில் 2% அபராத வரியாக விதிக்கப்பட்டு, அந்தத் தொகை தேசிய மருத்துவக் காப்பீட்டு அமைப்பிற்கு (Assurance maladie) வழங்கப்படும் எனப் பரிந்துரைக்கப்பட்டுள்ளது.

மோசமான உணவுப் பழக்கத்தால் ஏற்படும் உடல் பருமன் (Obésité) மற்றும் நீரிழிவு போன்ற நோய்களால் மருத்துவக் காப்பீட்டு அமைப்பிற்கு ஆண்டுக்கு 11.7 பில்லியன் யூரோக்கள் இழப்பு ஏற்படுவதாகச் செனட் (Sénat) அறிக்கை தெரிவிக்கிறது. பிரான்சில் 17% பெரியவர்கள் (சுமார் 8 மில்லியன் மக்கள்) உடல் பருமனால் பாதிக்கப்பட்டுள்ளனர் என்பது குறிப்பிடத்தக்கது.