ஈரான் மீது தரைவழித் தாக்குதலுக்குத் தயாராகும் அமெரிக்கா

ஈரான் மீது தரைவழித் தாக்குதலுக்குத் தயாராகும் அமெரிக்கா: பென்டகனின் அதிரடித் திட்டம் கசிவு!

ஈரான் மீது பல வாரங்கள் நீடிக்கக்கூடிய வரையறுக்கப்பட்ட தரைவழி இராணுவ நடவடிக்கைகளை (Ground Operations) மேற்கொள்வதற்கு அமெரிக்கத் பாதுகாப்புத் தலைமையகமான பென்டகன் தயாராகி வருவதாக ‘தி வாஷிங்டன் போஸ்ட்’ (The Washington Post) செய்தித்தாள் செய்தி வெளியிட்டுள்ளது. இந்தத் திட்டமானது ஒரு முழு அளவிலான ஊடுருவலாக (Full Invasion) இருக்காது என்ற போதிலும், சிறப்புப் படைப்பிரிவுகள் மற்றும் காலாட்படை வீரர்களைக் கொண்டு ஈரானின் கார் தீவு (Kharg Island) மற்றும் ஹோர்முஸ் ஜலசந்திக்கு அருகிலுள்ள கடலோரப் பகுதிகளில் திடீர்ச் சோதனைகளை (Raids) நடத்துவதை நோக்கமாகக் கொண்டுள்ளது.

இராணுவக் குவிப்பு மற்றும் தற்போதைய நிலை:

அமெரிக்க அதிபர் டொனால்ட் ட்ரம்ப் இந்தத் திட்டங்களுக்கு இன்னும் உத்தியோகபூர்வ ஒப்புதல் அளிக்கவில்லை என்றாலும், வெள்ளை மாளிகை ஊடகச் செயலாளர் கரோலின் லெவிட் இது குறித்துக் கூறுகையில், “அதிபர் முடிவெடுப்பதற்கான அனைத்துச் சூழல்களையும் தயார் நிலையில் வைத்திருப்பது பென்டகனின் கடமை” எனக் குறிப்பிட்டுள்ளார். கடந்த மார்ச் 27ஆம் திகதி USS திரிப்போலி கப்பல் மூலம் சுமார் 3,500 மேலதிக இராணுவத்தினர் மத்திய கிழக்கு பிராந்தியத்திற்கு வந்து சேர்ந்துள்ளனர். குறிப்பாக, ஈரானின் எண்ணெய் ஏற்றுமதி மையமான கார் தீவைக் கைப்பற்றுவது மற்றும் வர்த்தகக் கப்பல்களை இலக்கு வைக்கும் ஆயுதங்களை அழிப்பது குறித்து ஆலோசனைகள் முன்னெடுக்கப்பட்டு வருகின்றன.

ஈரானின் கடும் எச்சரிக்கை:

அமெரிக்காவின் இந்தத் திட்டங்களுக்கு ஈரான் கடும் பதிலடி கொடுத்துள்ளது. ஈரானிய நாடாளுமன்ற சபாநாயகர் முகமது பாகர் காலிபாப் (Mohammad Bagher Ghalibaf) கருத்துத் தெரிவிக்கையில், “எதிரி பேச்சுவார்த்தை பற்றிப் பேசிக்கொண்டே இரகசியமாகத் தரைவழித் தாக்குதலுக்குத் திட்டமிடுகிறான்; எமது ஏவுகணைகள் தயார் நிலையில் உள்ளன, அமெரிக்க வீரர்கள் தரையிறங்கினால் அவர்கள் எரிக்கப்படுவார்கள்” என எச்சரித்துள்ளார். மேலும், ஈரானியக் கடற்படைத் தளபதி ஷாராம் இரானி, அமெரிக்காவின் USS ஆபிரகாம் லிங்கன் விமானம் தாங்கி கப்பல் தமது எல்லைக்குள் வந்தால் அது ஏவுகணைகளால் தகர்க்கப்படும் எனக் கூறியுள்ளார்.

பிராந்தியப் பதற்றம்:

ஈரானுடன் 900 கிலோமீட்டர் எல்லையைப் பகிர்ந்து கொள்ளும் பாகிஸ்தான், இந்தப் பதற்றத்தைத் தணிக்க சவுதி அரேபியா, துருக்கி மற்றும் எகிப்து ஆகிய நாடுகளின் வெளியுறவு அமைச்சர்களுடன் இணைந்து பேச்சுவார்த்தைகளை முன்னெடுத்து வருகிறது. அதேவேளை, ஏமன் நாட்டின் ஹூதி கிளர்ச்சியாளர்களும் பாப் அல்-மண்டேப் (Bab al-Mandeb) ஜலசந்தியைக் கட்டுப்படுத்தி அமெரிக்காவிற்குப் பதிலடி கொடுக்கத் தயாராக இருப்பதாகத் தகவல்கள் தெரிவிக்கின்றன.