Voice of Americaமீண்டும் ஒலிக்கிறது:
ட்ரம்பால் பணிநீக்கம் செய்யப்பட்ட 1,000 ஊழியர்களை மீண்டும் பணியில் அமர்த்த நீதிமன்றம் அதிரடி உத்தரவு!
அமெரிக்காவின் அதிகாரப்பூர்வ பொதுத்துறை வானொலி சேவையான “வாய்ஸ் ஆஃப் அமெரிக்கா” (Voice of America) மீண்டும் உலகளவில் ஒலிக்கத் தயாராகி வருகிறது.
கடந்த ஒரு ஆண்டாக முடக்கப்பட்டிருந்த இந்தச் சேவையை உடனடியாகத் தொடங்கவும், பணிநீக்கம் செய்யப்பட்ட ஆயிரத்திற்கும் மேற்பட்ட ஊழியர்களை மீண்டும் பணியில் அமர்த்தவும் அமெரிக்க மத்திய நீதிமன்றம் (Juge fédéral) அதிரடி உத்தரவைப் பிறப்பித்துள்ளது.
நீதிபதி ரொய்ஸ் லம்பேர்த் (Royce Lamberth) நேற்று செவ்வாய்க்கிழமை வழங்கிய இந்தத் தீர்ப்பின்படி, வரும் மார்ச் 23-ஆம் திகதிக்குள் சுமார் 1,042 ஊழியர்களை மீண்டும் வேலையில் சேர்க்க வேண்டும்.
கடந்த 2025-ஆம் ஆண்டு ஜூன் மாதம் டொனால்ட் ட்ரம்ப் அரசால் மேற்கொள்ளப்பட்ட இந்த அதிரடி பணிநீக்கங்கள் சட்டவிரோதமானவை என்று நீதிமன்றம் சுட்டிக்காட்டியுள்ளது. குறிப்பாக, இந்த ஊடக அமைப்பைக் கண்காணிக்க கார்ரி லேக் (Kari Lake) என்பவர் நியமிக்கப்பட்டதே முறைப்படி நடக்கவில்லை என்பதால், அவர் எடுத்த அனைத்து முடிவுகளும் செல்லாது என்று அறிவிக்கப்பட்டுள்ளது.
இரண்டாம் உலகப் போர் காலத்தில் தொடங்கப்பட்ட இந்த வானொலி நிலையம், உலகெங்கிலும் அமெரிக்காவின் கருத்துக்களைக் கொண்டு செல்லும் முக்கிய கருவியாக விளங்கியது. ஆனால், இந்த ஊடகம் இடதுசாரி எண்ணம் கொண்டதாகவும், அமெரிக்காவிற்கு எதிராகச் செயல்படுவதாகவும் குற்றம் சாட்டி, கடந்த ஆண்டு இதன் நிதி மற்றும் ஊழியர் எண்ணிக்கையை அதிபர் ட்ரம்ப் பெருமளவு குறைத்தார். தற்போது நீதிமன்றம் தலையிட்டுள்ளதால், சர்வதேச அளவில் மீண்டும் தனது ஒலிபரப்பைத் தொடங்க ஒரு முறையான திட்டத்தை (Plan de reprise) சமர்ப்பிக்கவும் அமெரிக்க உலகளாவிய ஊடக முகமைக்கு (USAGM) உத்தரவிடப்பட்டுள்ளது.
நீதிமன்றத்தின் இந்த முடிவை ஊழியர்கள் மகிழ்ச்சியுடன் வரவேற்றுள்ளனர். கடந்த ஓராண்டாகத் தங்களால் செய்ய முடியாமல் போன செய்திப் பணிகளை மீண்டும் தொடரவும், இழந்த நம்பிக்கையை மீட்கவும் ஆவலாக இருப்பதாக அவர்கள் தெரிவித்துள்ளனர். இருப்பினும், கார்ரி லேக்கின் நியமனம் செல்லாது என்ற தீர்ப்பை எதிர்த்து மேல்முறையீடு (Appel) செய்யப்போவதாக ட்ரம்ப் நிர்வாகம் அறிவித்துள்ளது. இதனால் இந்த விவகாரத்தில் அடுத்தடுத்த சட்டப் போராட்டங்கள் தொடரும் என்று எதிர்பார்க்கப்படுகிறது.
