இந்தியாவின் தங்கம் தாயகம் திரும்பியது: பொருளாதார பலத்தின் புதிய அடையாளம்!
இந்தியப் பொருளாதார வரலாற்றில் ஒரு முக்கிய மைல்கல்லாக, மார்ச் 2023 முதல் இதுவரை சுமார் 274 தொன் தங்கத்தை இங்கிலாந்து வங்கியிலிருந்து (Bank of England) இந்திய ரிசர்வ் வங்கி (RBI) வெற்றிகரமாக தாயகம் கொண்டு சென்றுள்ளது.
1991-ம் ஆண்டுக்குப் பிறகு, இவ்வளவு பெரிய அளவிலான தங்கம் வெளிநாட்டிலிருந்து இந்தியாவுக்குக் கொண்டு செல்லப்படுவது இதுவே முதல் முறை. சமீபத்தில் (செப்டம்பர் 2025 நிலவரப்படி) கொண்டுசெல்லப்பட்ட 64 டன் தங்கத்தையும் சேர்த்து, மொத்தமாக 274 தொன் தங்கம் கடந்த இரண்டு ஆண்டுகளில் பாதுகாப்பாக இந்தியாவிற்கு மாற்றப்பட்டுள்ளது. இந்தத் தங்கம் மும்பை மற்றும் நாக்பூரில் உள்ள ரிசர்வ் வங்கியின் உயர் பாதுகாப்பு கொண்ட நிலத்தடி பெட்டகங்களில் (Vaults) பாதுகாப்பாக வைக்கப்பட்டுள்ளது.
நாட்டின் செல்வத்தை அந்நிய மண்ணில் வைப்பதை விட, சொந்த நாட்டில் வைத்திருப்பது கூடுதல் பாதுகாப்பையும், நெருக்கடி காலங்களில் உடனடி கட்டுப்பாட்டையும் வழங்குகிறது. உக்ரைன்-ரஷ்யா போர் போன்ற உலகளாவிய பதற்றங்கள் மற்றும் சர்வதேச பொருளாதார மாற்றங்களைக் கருத்தில் கொண்டு, சொத்துக்களைப் பாதுகாப்பாக உள்நாட்டிற்கு மாற்றுவது அவசியமாகிறது.
லண்டனில் தங்கத்தைச் சேமித்து வைப்பதற்காக இங்கிலாந்து வங்கிக்கு வழங்கப்பட்டு வந்த பெரும் தொகையிலான ‘சேமிப்புக் கட்டணம்’ இனி மிச்சமாகும்.
1991-ல் தங்கம் அடகு வைக்கப்பட்ட நிலைக்கு நேர்மாறாக, இன்று இந்தியா தனது தங்கத்தை மீட்டுக்கொண்டு வருவது நாட்டின் பொருளாதார வளர்ச்சியை உலகிற்குப் பறைசாற்றுகிறது.
தற்போது இந்தியாவின் மொத்தத் தங்க இருப்பு சுமார் 880 தொன் ஆகும். இதில் பாதிக்கும் மேற்பட்ட தங்கம் (சுமார் 575 தொன்) இப்போது இந்தியாவிலேயே பாதுகாப்பாக உள்ளது என்பது குறிப்பிடத்தக்கது.
