இலங்கை மின்சார சபை மற்றும் பெற்றோலிய சட்டக் கூட்டுத்தாபனம் உட்பட மின்சக்தி அமைச்சின் கீழ் உள்ள நிறுவனங்களின் செலவை குறைக்கும் வேலைத்திட்டம் தற்போது முன்னெடுக்கப்பட்டு வருவதாக மின்சாரம் மற்றும் எரிசக்தி அமைச்சர் காஞ்சன விஜேசேகர தெரிவித்துள்ளார்.
நாடாளுமன்றத்தில் நேற்று (09) நடைபெற்ற அமைச்சர்கள் ஆலோசனைக் குழுவில் அமைச்சர் இதனைத் தெரிவித்தார்.
புதிய பணியாளர் ஆட்சேர்ப்பு மேற்கொள்ளப்பட மாட்டாது
சனி மற்றும் ஞாயிற்றுக்கிழமைகளில் பெற்றோலியத் தொழிலாளர்களுக்கு வழங்கப்பட வேண்டிய 20 மில்லியன் ரூபா மேலதிக நேரச் செலவுகளை மிச்சப்படுத்துவதற்காக கடந்த செவ்வாய்க்கிழமை எரிபொருள் ஒதுக்கீட்டை QR குறியீட்டின் மூலம் புதுப்பிக்கப்பட்டதாக அமைச்சர் கூறினார்.
இந்த நிறுவனங்களில் புதிய பணியாளர் ஆட்சேர்ப்பு மேற்கொள்ளப்பட மாட்டாது எனவும், தற்போது பணிபுரியும் ஊழியர்களின் நிர்வாகத்தினூடாக செலவுகள் முடிந்தவரை குறைக்கப்பட்டுள்ளதாகவும் அமைச்சர் குறிப்பிட்டார்.
இதேவேளை, கூடிய விரைவில் ஸ்மார்ட் அளவீடு (Smart metering) அறிமுகப்படுத்தப்படும் எனவும், அதன் முன்னோடித் திட்டம் தெஹிவளை – கல்கிசை மாநகர சபைப் பகுதியில் ஆரம்பிக்கப்படும் எனவும் அமைச்சர் காஞ்சன விஜேசேகர தெரிவித்தார்.
ஆசிய வளர்ச்சி வங்கியின் ஆதரவின் கீழ் இது செயல்படுத்தப்படும் என்றும், 31,000 வாடிக்கையாளர்கள் ஸ்மார்ட் பில்கள் மூலம் பில் பெறுவார்கள் என்றும் தெரிவிக்கப்பட்டுள்ளது.
மேலும், நிதி நெருக்கடியால் தாமதமாகி வரும் 36,000 புதிய இணைப்புகளை 6 வார காலத்திற்குள் வழங்க நடவடிக்கை எடுக்கப்படும் என்றும் அமைச்சர் காஞ்சன விஜேசேகர மேலும் தெரிவித்தார்.
