சுவிட்சர்லாந்தில் இளைஞர்களின் மாபெரும் போராட்டம் – 11 நகரங்களில் ஆர்ப்பாட்டம்; பாசலில் வன்முறை
போராட்ட ஏற்பாட்டாளர்களின் கணக்குப்படி சுமார் 40,000 பேர் இதில் பங்கேற்றுள்ளனர்.
போராட்டத்திற்கான முக்கிய கோரிக்கைகள்
இராணுவத்திற்கான செலவினங்களை அதிகரிப்பதைக் கைவிட்டு, அந்த நிதியை மக்கள் நலனுக்காகப் பயன்படுத்த வேண்டும் எனப் போராட்டக்காரர்கள் வலியுறுத்தினர்.
அவர்களின் முக்கிய கோரிக்கைகள்:
– காலநிலைப் பாதுகாப்பிற்கான நிதியை அதிகரித்தல்.
– கல்வித்துறைக்கு கூடுதல் நிதி ஒதுக்குதல்.
– சுகாதாரம் மற்றும் சமூக நலத்துறையை வலுப்படுத்துதல்.
– இராணுவ ஆயுதமயமாக்கலைக் கட்டுப்படுத்துதல்.
– பயிலுநர்களுக்கு 35 மணிநேர வேலைவாரம் மற்றும் கூடுதல் விடுமுறை.
– கல்வி நிலையங்களில் மூன்று பிராங்கிற்கு உணவு வழங்குதல்.
பாசலில் பதற்றம் – பொலிஸார் நீர்த்தாரைப் பிரயோகம்
பெரும்பாலான நகரங்களில் போராட்டங்கள் அமைதியாக நடைபெற்ற போதிலும், பாசலில் நிலைமை மோசமடைந்தது. சில போராட்டக்காரர்கள் தடுப்புகளை அமைத்து, கற்கள் மற்றும் பட்டாசுகளைப் பயன்படுத்தியதாகத் தெரிவிக்கப்பட்டுள்ளது.
இதையடுத்து பொலிஸார் நீர்த்தாரைப் பிரயோகம் செய்து நிலைமையைக் கட்டுப்படுத்த முயன்றனர். வங்கிக் கட்டடங்கள் உள்ளிட்ட இடங்களிலும் சேதங்கள் ஏற்பட்டதாகத் தகவல்கள் தெரிவிக்கின்றன.
சூரிச்சில் ஆயிரக்கணக்கானோர் பங்கேற்பு
சூரிச்சில் நடைபெற்ற ஆர்ப்பாட்டத்தில் சுமார் 3,000 பேர் கலந்துகொண்டதாக மதிப்பிடப்பட்டுள்ளது. முன்னதாக சமூக ஊடகங்களில் வன்முறையைத் தூண்டும் வகையிலான பதிவுகள் தொடர்பாக சர்ச்சை எழுந்திருந்தது. இதனால் பொலிஸார் பலத்த பாதுகாப்பு ஏற்பாடுகளை மேற்கொண்டனர்.

